Рим 15

Ижми хъугъувал айидар

1Ухьу, ижми рюгь айидари, зяиф рюгь айидарин гъалатӀар сабурлуди аьгь дапӀну ккунду, хъа жвуваз ккуниб дапӀну ккундар. 2Ухькан гьарсари багахь хьайириз, дугъан рюгь мюгькам шлуб, дугъаз хайир кайиб дапӀну ккунду. 3Гьеле Месигьдира Чан хайирназ фукӀа гъапӀундар. Хъа Гирами китабариъ дупна:

«Уву беябур апӀрударин люкьнар Узʼин алахьнийи».

4Гирами китабариъ дибикӀнайиб вари, диди туврайи сабурлувалин ва ккарцрувалин кюмекниинди ихь умуд ктадабтӀбан бадали, ухьуз насигьят вуди, дибикӀнайиб ву. 5-6Гъит сабурлувал ва ккарцрувал туврайи Аллагьди, Иса Месигь мисал вуди Гьадгъахъди гъяри, ухьу сатӀиди, саб гьарайниинди Аллагьдин, ихь Агъа Иса Месигьдин Адашдин тяриф апӀруси, ичв мясляаьтнаъ яшайиш туври. 7Гьаци вуйиган, Месигьди учву фици кьабул гъапӀнуш, учвура, Аллагьдин ад бадали, гьаци сари-сар кьабул апӀинай. 8Месигь суннат гъапӀдарин гъуллугънаъ Аллагьдин гьякьвал дурариз улупуз, Аллагьди дурарин абйирин абйириз тувнайи гаф гьякь вуйивал улупуз ади гъахьну. 9Гьадмуган жара халкьарира Аллагьди чпиз гъапӀу ужувлантина Дугъан ад апӀиди. Гирами китабариъ дупнайиси:

«Гьаци вуйиган, узу Уву

Аллагь аьгъдру халкьарин арайиъ

адлу апӀидизаву

ва Яв ччвурназ

тярифнан мяълийир апӀидиза».

10Ва хъана:

«Аллагьдин халкьдихъди сабси

Шадвалин гьарай ипай, Аллагь аьгъдру халкьар!»

11Гьамцира дупна:

«Агъа адлу апӀинай, Аллагь аьгъдру вари халкьар!

Гъит вари миллетари

мяълийириинди

Дугъан тярифар апӀри!»

12Ишаяйира кӀура:

«Ессей тухмиан таза кюл ачмиш хьибди.

Дугъу миллетариин гьюкум гъабхиди,

ва Аллагь аьгъдру халкьари Гьадгъак чпин

миж кивди».

13Гъит, умуд тувру Аллагьди учву ичв хъугъувалилантина, Гирами Рюгьнан кьувватниинди ичв умуд артухъ хьпан бадали, шадвали ва мясляаьтну ацӀричву.

Павелин кагъзикан ва ляхнарикан

14Йиз гъардшар, учву ужувлу ацӀнайиб, учвуз гизафубдикан аьгъю гъабхьиб ва сар-сариз учвхьан насигьятар тувуз шлуб якьинди аьгъязуз. 15Хъа Аллагьди узуз багъиш тувнайиган, узу учвуз лап кӀубанвал кади, сакьюдар ляхнарикан учвуз кӀваин алауз ккунди гъибикӀунзачвуз. 16Йиз вакилвалин бурж вуди, Аллагьди жара миллетариз, Иса Месигьдин гаф ва Ужувлан хабар рабгъру багъиш тувназуз. Гьамци дурар Дугъаз, Гирами Рюгьниинди марцц духьну, Аллагьдиз ккуниси гъурбан хьиди.

17Иса Месигьдихъ хъади, узура йиз Аллагь бадали апӀурайи ляхнариин фурслу вуза. 18-19Узлантина Аллагь аьгъдру халкьар гафнииндина ляхниинди Аллагьдиз мютӀюгъ апӀбан бадали, аьжайиб лишнарииндина аьламатариинди ва Аллагьдин Рюгьнан кьудратниинди Месигьди гъапӀубдикантӀан пидарза. Магьа гьамци, Ерусалим ва дидин гъирагъарихъан тап Иллирик уьлкейихънакьан Месигьдикан Ужувлан хабар деебтунза. 20Узу Месигьдин ччвур аьгъдру йишвариъ, жарари шибритӀ ккиву йишвʼин хал дидривди, Ужувлан хабар рабгъуз чалишмиш гъахьунза. 21Гирами китабариъ дупна:

«Дугъкан дупнадрудариз

Думу рякъиди,

хъа деебхьнадрудар гъавриъ ахъди».

Павелиз Римдиз гъягъюз ккунди а

22Узу учвухьна гъюз гизаф ражари гьязур гъахьунза, хъа гьамцдар алахьиган гъюз гъабхьундарзухьан.

23УхдитӀан узуз учвухьна гъюз ккунди айзуз. Хъа гьамус узу му вари юрдариъ дилихну ккудубкӀунза. 24Испанияйиз гъягърур, учвʼин улукьидиза. Улукьиган, учвухъди, юкӀв хъади, цӀибди сюгьбатар апӀбалан кьяляхъ, учву узу дина гьаърувалик миж кайиз. 25Гьамус узу Ерусалимдиз душваъ айи Аллагьдин адмийирин гъуллугънаъ хьуз гъягъюраза. 26Фицики Македония ва Ахая уьлкйирин хъугърудари Ерусалимдиъ касибди айи Аллагьдин адмийириз, пул уч дапӀну, кюмек апӀуз кьаст гъапӀнийи. 27Дурари дици апӀуб ужу гъапӀну, хъа Ерусалимдиъ айидариз дурар буржлу вуйи. Жугьдарихъди сабси дураризра рюгьнан ужувлар гъахьну. Дурари жугьдариз бедендин ужувларикан пай гъяпӀну ккунду. 28Узу гьаму месэла гьял гъапӀиган ва чпиз хътапӀу вари пул дурарихьна гъурубкьиган, Испанияйиз рякъюъ учӀвдиза ва рякъюъ учвʼинра улуркьидиза. 29Узуз аьгъязуз, узу учвухьна гъафиган, Месигьди туву ужувлар гьуркӀну хидизачвуз.

30Учвкан, ихь Агъа Иса Месигь бадали, Гирами Рюгьнан масанвал бадали, миннат апӀураза, гъардшар, узу бадали Аллагьдиз узухъди учвура юкӀв абцӀну ккарагай. 31Ягьудия юрднаъ хътругърударин хиларигъ узу гъядряхъбан бадали, Ерусалимдиъ Аллагьдин адмийири узʼин илипнайи ляхин кьабул апӀбан бадали, 32эгер Аллагьдин ният гъабшиш, учвухьна шадвалиинди гъюбан бадали ва учвухъди рягьятвал гъадабгъбан бадали, ккарагай. 33Гъит, ислягьвалин булагъ – Аллагь учвухъди варидарихъди ишри. Амин.

Currently Selected:

Рим 15: ТабГК

Highlight

Copy