Насигьятар 14
14
1Аькьюл айи дишагьлийи хал дивру,
хъа ахмакь дишагьлийи чан хилариинди рабгъуру.
2Дишди алдагъура ликар РАББИЙИХЬАН гучӀрури,
хъа Думу гьясбикк ккадрури – цӀаркури.
3Ахмакьин лагълагъʼвал – му чан фурсназ гъирмаж,
хъа аькьюл айидарин улхбар – чпиз гъалхан.
4Йицар адар – ичӀиди ву тӀуннахъишв,
хъа гужли йицар айишваъ бегьер ву бул.
5Дугъри шагьидди дарапӀур кучӀал,
хъа гьякьсуз шагьиддин нефесра ву кучӀал.
6Ягьсузри абгура аькьюл, дабгну ккудубкӀурадар,
хъа фикирлуйиз рягьятди аьгъю шула аьгъювалар.
7Ярхлади гъуз абдлихьан,
фагьумлу гафариз миккилиган дугъкан.
8Аьяндрин аькьюл чан жилгъайин гъавриъ айивал ву,
хъа абдлар чпин ахмакьвали алдатмиш апӀура.
9Ахмакьри фу-вуш чӀуруб гъапӀиш, думу дугъаз аьлхъюбтӀан дар,
аммаки дюзидариин РАББИ рази ву.
10Инсандин дердер, чан кӀвазтӀан аьгъдар,
ва шадваларра дугъан, жарадариз каидар.
11Хулаз гьякьсузарин – дабгъувал,
дюздарин ужагъдиз – кюкю адабшвувал.
12Саспи рякъяр дишдар вуди гьигъри шулу,
хъа аьхирна-аьхир аьжалихьна гъахуру.
13Шадлугънаъ ашра, юкӀв дердлу шулу,
ва шадвалихъди пашманвал гъюру.
14Харжи касдиз, учв фтихьна гъяраш, дугъаз гьадму хьибди,
хъа ужур касдиз чан жафйириз дилигну тувди.
15Рягьятди хъугърур гьарсаб гафнахъ хъугъру,
ихтиятури гьарсаб ляхнин улихь фикир апӀуру.
16Аькьюл айир ихтиятди шулу, писвалихьан гъирагъ йивури,
хъа абдли фикирсуз ляхнар апӀуру гучӀ ктарди.
17Ухди хъял гъюрури ахмакьвалар апӀиди,
чӀуру кьастар айир даккун хьиди.
18Авамарин пай – ахмакьвалар,
фагьумлударин таж – аьгъювалар.
19Писдари гъяни адмийирин улихь кӀул ис апӀиди,
гьякьсузар тӀалаб апӀури дийигъиди гьякьлуйин хулан улихь.
20Касиб кас гъуншдизра дяркъну ккундар,
хъа девлетлу гизафдариз ккунду.
21Гунгьиъ а жарар гьясбикк ккадрур,
хушбахтавар ву пай дурубкьдарин гъайгъу зигрур.
22ЧӀуру ният кӀваъ бисрур жилгъайилан алдахъиди;
гьякьна рягьим гъяниб апӀрурихъди гъягъюра.
23Вари гъагъи зегьметарикан – хайир,
ичӀи гафарикан – ичӀи хал.
24Аькьюл айидарин таж – чпин девлет,
абдлар балгруб ахмакьвал ву, гьелбет.
25Дугъри шагьидди уьмур уьбхюра,
хъа чӀуру кьастар айири кучӀлин ил хътабгъура.
26РАББИЙИХЬАН гучӀ хьайивал – жвув уьрхру ижми йишв ву,
душвайишв увузна яв хизандиз – мюгькам гъала ву.
27РАББИЙИХЬАН гучӀ хьайивал – булагъ уьмрин,
диди уьрхюра чуларихьан аьжалин.
28Хликк ккайидар гизаф айиган, паччагь машгьур ву,
хъа дурар кам гъахьиган, регьбрин аьжал хътубкьуру.
29Фикирлу ву, хъял дяргърур ухди,
хъа хъял кубчӀврури ахмакьвал улупиди.
30Архаин юкӀв – бедендиз сагъʼвал,
бахилвал – кӀурбарик камк кайивал.
31Касибариз илзигрури дурар халкь ГъапӀур беябур апӀура,
хъа касибарин гъайгъу зигрури, Думу адлу апӀура.
32Гьякьсузарин писвал чипʼин алабхъиди,
хъа гьякьлур чан ктрацӀували уьрхиди.
33Аькьюл фагьумлу кӀваъ яшамиш шула,
хъа абдларин арайиъра думу рябкъюру.
34Гьякьлували халкь кьувватлу апӀура,
хъа гуннагь аьйиб ву вари халкьариз.
35КӀул али лукӀраз паччагьди майил апӀуру,
хъа нач шлу ляхнар апӀру лукӀ хъюлакк дисуру.
Currently Selected:
Насигьятар 14: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
