Матта 19

Хпир гъадагъбакан

1Гьаму вари гафар дупну ккудукӀхъан, Иса Галилей уьлкейиан удучӀвну, Ярдан нирин тлихъан терефнаъ айи Ягьудияйин аьтрафариз гъягъюру. 2Дугъан кьяляхъди гизаф инсанар гъюру, ва Дугъу душваъ гизафдар сагъ апӀуру. 3Хъасин Исайихьна фарисйир гъюру, дурари, Думу ахтармиш апӀуз ккунди, гьерху:

– Фициб себеб гъабхьишра, Къанундиинди жилириз хпир гьадауз ихтияр айин?

4Дугъура дурариз жаваб вуди кӀуру:

– Инсанар халкь ГъапӀури дурар сифтейиан жилирна хпир вуди халкь гъапӀуб Гирами китабарик гъурхунданчвахъа? 5Гьаддиз жилир, адашна дада гъитну, чан хпирик карсди ва дурар кьюрид саб беден хьиди. 6Гьаци вуйиган, дурар сарун кьюб ваъ, хъа саб беден ву. Гьамци Аллагьди китӀдар инсанди жара дапӀну ккундар.

7Фарисйири Дугъан жавабназ кӀуру:

– Дици вуш Муса пайгъамбри, жара хьпан кагъаз тувну, хпир гьадауз шулу, гьаз дупнахъа?

8Исайи дурариз жаваб тувру:

– Мусайи, ичв гъициркъу юкӀвариз дилигну, учвуз ичв хпарихъди жара хьуз ихтияр тувну, хъа сифтейиан дици дайи. 9Амма кӀуразачвузки: кьяппавал себеб дарди шли чан хпир гьадаъну, жарар гъахиш, гьадгъу чав кьяппавал апӀура.

10Гьадмуган Исайин ученикари дугъаз кӀуру:

– Эгер гьамциб гьял вуш, зат хпир дархуб ужу ву.

11Исайи дурариз гъапну:

– Му гаф варидарихьан кьабул апӀуз шулдар, думу чпиз удукьувал тувнайи жиларихьантӀан кьабул апӀуз даршул. 12Гьацисдар жилар аки, садар бабкан шлуган эвлемиш хьуз даршлудар, садар адмийири хаси апӀуру, хъа гьацдарра аки, Аллагьдиз гъуллугъ апӀури гъузбан бадали, чиб эвлемиш даршули гъузру. Гъавриъ ахъуз шлур, гъит, гъавриъ ахъри.

Исайи бицӀидариз ужʼвал ккун апӀуб

13Хъасин Исайихьна, хилар иливну, дурариз ужʼвал ккун апӀбан бадали бицӀидар хуру, хъа ученикари дурар хътӀурккури шулу. 14Амма Исайи гъапи:

– БицӀидар узухьна гъюз гъитай, гъадагъа мапӀанай, фицики Аьршарин Паччагьлугъ гьацдаринуб ву.

15Исайи дурариин хилар иливну, хъасин Думу дилин удучӀвну гъягъюру.

Девлетлуйир ва Аллагьдин паччагьлугъ

16Саб ражари, сар живан дуфну, Исайихьан гьерху:

– Я Мялим, узуз ккудудубкӀру уьмур рубкьбан бадали, узу фициб ужуб ляхин дапӀну ккунду?

17Исайира дугъаз кӀуру:

– Узхьан ужувлакан гьаз гьерхрава? Ужур вуйир анжагъ сар АллагьтӀан адар. Аллагьди увуз ккудудубкӀру уьмур тувну ккундуш, Дугъу Мусайилантина тувнайи табшуругъар вари тамам апӀин.

18– Фу табшуругъар? – гьерхру Дугъхьан живанди.

Исайи кӀуру:

– «Адми миликӀан», «кьяппавал мапӀан», «мигьитӀибкӀан», «кучӀлин шагьидвал мапӀан», 19«Адашдизна дадайиз гьюрмат апӀин» ва «яв багахь хьайир жвуваз жвувси ккун апӀин».

20Живанди Исайиз кӀуру:

– Узу гьамрар вари тамам апӀураза, сарун фу ккими узуз?

21Исайи дугъаз гъапи:

– Эгер увуз гьуркӀу кас хьуз ккундуш, душну, яв айи-адруб масу тув, гьадмуган аьршариъ яв девлет хьибдивуз. Хъасин Узухъди гъач.

22Му гафар гъеерхьу живан пашманди гьудучӀвну гъягъюру, гьаз гъапиш думу гизаф девлетлу вуйи. 23Исайи мушвʼин Чан ученикариз гъапи:

– Дюзди кӀуразачвузки, девлетлуйиз Аьршарин Паччагьлугъдиъ учӀвуз читинди алабхъиди. 24Хъанара кӀуразачвуз: девлетлуйиз Аьршарин Паччагьлугъдиъ учӀвубтӀан девейиз рубдин гъюнʼан удубчӀвуз рягьят ву.

25Му гафар деерхьну, мюгьтал гъаши ученикари Исайихьан гьерху:

– Дици вуйиган, шилхьан учв уьрхюз хьиди?

26Дурарихьинди дилигну, Исайи гъапи:

– Инсанарихьан му удукьруб дар, хъа Аллагьдихьан удудукьруб адар.

27Гьадмуган Петри жаваб вуди Дугъаз гъапи:

– Магьа учу, вари гъибтну, Увухъди хъача: хъа учуз фу хьибди?

28Исайира дурариз гьамци кӀуру:

– Дюзди кӀуразачвуз: цӀийи дюнʼяйиъ, Инсаниятдин Бай Чан тахтниин деиган, Узухъди гъафи учвура йицӀикьюб тахтниин деъну, Израилин йицӀикьюб тухмин суд апӀидичва. 29Гьар шли Узу бадали чан хулар, вая чвйир, вая чйир, вая адаш, вая дада, вая чан веледар, вая хутлар дирчиш, дугъу гьадрар вари варж ражари артухъди гъадагъиди, ва дугъаз ккудудубкӀру уьмур рубкьиди. 30Му ражари гизаф сарпидар думуган ккудукӀрудар хьиди, хъа ккудукӀрудар – сарпидар.

Currently Selected:

Матта 19: ТабГК

Highlight

Copy