Матта 15

Абйирилантина гъузнайи аьдатар

1Мидин кьяляхъ Исайихьна Ерусалимдиан фарисйирна къанунчйир гъюру, дурари кӀуру:

2– Яв ученикари ихь абйирин аьдатар гьаз кӀули гъахурадар? Дурари, уьл ипӀруган, хилар жикӀурадар!

3Хьа Исайи дурариз жаваб вуди гъапи:

– Учвура, ичв аьдатар уьрхбан бадали, Аллагьдин табшуругъар гьаз кӀули гъахурадарчва? 4Аллагьди табшурмиш гъапӀундаринхъа, «адашдизна дадайиз гьюрмат апӀинай» ва «адашдизна дадайиз люкьнар апӀрур аьжализ лайикь ву», кӀури. 5Хъа учву фу кӀури шулчва? Эгер сари чан дадайиз вая адашдиз «Узу увуз буржлу вуйиб Аллагьдиз бахш дапӀназа», гъапиш, 6дугъу сарун чан адашдизна дадайиз гьюрмат апӀуб лазим дар, кӀурачва. Гьамци кӀури, Аллагьдин гаф тамам апӀурадарчва. 7Эй кьюб маш гъяйидар! Ишая пайгъамбри ичв гьякьнаан хуб ужуди дупна:

8«Гьаму адмийири Узуз гьюрмат ушвниинди апӀура,

хъа дурарин юкӀвар Узхьан ярхла ву.

9Давди дурари Узуз икрам апӀура,

фицики дурари инсанарин аьдатар уьрхюз улупура».

Инсан фти чиркин апӀуру

10Хъасин Исайи, халкьдиз дих дапӀну, кӀуру:

– Узухъ хъебехъай ва аннамиш апӀинай: 11ушвниъ убчӀврайибди ваъ, хъа ушвниан удубчӀвурайибди инсан чиркин апӀуру.

12Кьандиси Исайиз багахь духьну, ученикари кӀуру:

– Фарисйириз Уву гъапибдикан гиран гъабшиб, аьгъяйвуз?

13Исайи жаваб вуди гъапи:

– Чав ктриву гьарсаб рук-кюл Аьршарин Йиз Адашди ччивариан уьчӀюбгъиди. 14Дурарикан фикир мапӀанай. Дурар, улихь гьучӀвну, курар хъади гъягъюрайи курар ву. Хъа кури кур хъади гъягъруган, дурар кьюридра ичӀаъ ахьди.

15Мидиз жаваб вуди Петри кӀуру:

– Учуз тахалусдин мяна ачухъ апӀина.

16Исайи гъапи:

– Учвура гьамцдарин гъавриъ ахънаданчва? 17Ушвниъ убчӀвуб вари фуниз рубкьрувалин ва дилинтина чӀатинди удубчӀвну гъябгърувалин гьаз гъавриъ ахърадарчва? 18Хъа ушвниан удубчӀвурайиб кӀваанмина гъюра, ва диди инсан чиркин апӀура. 19Фицики чӀуру ниятар, йивбар-йихбар, кьяппавалар, аьрбатанвалар, икӀ апӀбар, кучӀлар, футнйир – гьамрар вари кӀваан удучӀвурайидар ву. 20Гьамцдари инсан чиркин апӀуру, хъа дижрикӀру хиларихьди уьл гъипӀну кӀури, инсан чиркин шлуб дар.

Дишагьлийин хъугъувал

21Хъасин дилин удучӀву, Иса Тир ва Сидон шагьрарин аьтрафариз гъягъюру. 22Магьа Хананей уьлкейиан вуйи сар дишагьлийи, ишури дуфну, Исайиз кӀуру:

– Я Агъа, Давудгъярин Бай, йиз язухъ апӀина! Йиз риш, жинар кучӀвну, аьхю балайикк кка. 23Хъа Исайи дугъаз чӀалкьан гъапундайи. Ученикари, багахь духьну, Исайикан ккун апӀуру:

– Думу дишагьли хъутӀуркк, гьаз гъапиш дугъу ихь кьяляхъ чӀигъ хъипна. 24Дугъу жаваб вуди кӀуру:

– Узу анжагъ Израилин хъудургнайи чарвйирихьна Гьаънайир вуза. 25Хъа дишагьлийи, дуфну, дугъаз икрам дапӀну, кӀуру:

– Я Агъа, узуз кюмек апӀин сарун.

26Хъа Исайи гъапи:

– Баяр-шубарихьан тадабгъну, уьл хуйириз ккипуз хай даршул.

27Хъа дишагьлийи жаваб туву:

– Дюзди кӀурава, Агъа, хъа хуйирира чпин эйсийин суфрайилан ахьу уьлин урклар итӀуру.

28Гьадмуган Исайи дугъаз кӀуру:

– Эй дишагьли! Яв хъугъувал зурбаб вуяв. Гъит увуз ккуниганси ибшри.

Ва дугъан риш гьадмусяаьт сагъ гъахьнийи.

Исайи гизафдар сагъ апӀуб

29Гьадлин гьудучӀвну, Иса Галилей гьюлихьна гъюру ва, саб тепейиина за духьну, деъру. 30Дугъахьна ликудар, дярябкърайидар, чӀал дибиснайидар ва гизаф жара уьзрар кайидарра хъади аьхючӀвеъ халкь уч шулу. Уьзурлуйир Дугъан багахь дитру, Дугъу дурар сагъ апӀуру. 31Ва гьаддиз, чӀал дибиснайидар чӀалниина дуфну, сакьатлудар сагъ духьну, ликудар рягьятди лицури ва кур духьнайидарин уларихь акв гьибшну гъябкъган, халкь мюгьтал гъахьнийи ва Израилин Аллагьдин адар апӀуз хъюгънийи.

Исайи юкьуд агъзур кас тухъ апӀуб

32Хъасин Исайи, ученикариз дих дапӀну, кӀуру:

– Узуз адмийир гьяйиф вузуз. Магьа, дурарин Узухъди хъади шубуд йигъ ву, хъа дурариз ипӀруб адар. Мурар рякъюъ зяиф дархьбан бадали, фукӀа-мукӀа дирипӀди, дурар деетидарза.

33Ученикари Дугъаз кӀуру:

– Гьаму вари халкь тухъ апӀрубкьан уьл му ичӀи йишваъ наънан абгуча?

34Исайи дурариз кӀуру:

– Учвухь швнуб уьл хьачвухь?

Дурари кӀуру:

– Ургуб уьлна сакьюдар балугъар.

35Исайи, халкьдикан жилиин деуб ккун дапӀну, 36гьаму ургуб уьлна балугъар гъадагъуру ва, Аллагьдиз чухсагъул кӀури ккарагну, уьлер гьудутӀну – ученикарихьна, хъа ученикари халкьдиз тувру. 37ДипӀну вари ацӀру, хъа хъиригъу кьацӀари ургуб тавра ацӀру. 38Уьлна балугъ гъипӀу жиларин кьадар юкьуд агъзурихьнакьан вуйи, дурарихьна хъана дишагьлийирира, бицӀидарира гъипӀнийи. 39Хъасин Иса, халкь деетну, Учв люткейиъ эъну, Магдала кӀуру юрдназ гъафнийи.

Currently Selected:

Матта 15: ТабГК

Highlight

Copy