Ягьудайин 1

КучӀлар деетрудариз жаза ккилибгура

1Иса Месигьдин гъуллугънаъ айи Якьубдин гъардаш Ягьудайи Адаш Аллагьдиз масан вуйи ва Иса Месигьди уьрхюрайи дих дапӀнайидариз саламар хътаура.

2Ужʼвал, мясляаьт ва масанвал гьубкӀну ибшричвуз!

3Йиз ккунидар, гьеле узуз ихь сатӀлан вуйи уьрхюваликан бикӀуз гизаф ккунди ашра, саб ражари ва гьаргандиз Аллагьдин гирами халкьдиз тувнайи хъугъвалиан женг гъабхуз аьшкь капӀру кагъаз учвуз бикӀуб лазим вуди гьисаб апӀураза. 4Суддин йигъаз ухдихъанмина кадагънайи адмийир ичв арйириъ жиниди учӀвра. Гьадму аллагьсузари ихь Аллагьдин ужʼвал чпин чиркинвалариз дюз гъюрубси илбицура ва гьамци дурари Иса Месигьдихьан, сар ихь Гьюкумдарихьан ва Агъайихьан маш гьибицура.

5Узуз кӀваин апӀуз ккундузуз, учвуз гьацира вари аьгъяшра: Агъайи Чан халкь саб вахтна, Египетдин жиларилан алдаъну, гъюрхнийи, хъасин дурарикан хътругърудар пуч гъапӀнийи. 6Узуз гьацира малайикариканра кӀваин апӀуз ккундузуз: дурарихьан чпиз туву гьюкум уьбхюз гъабхьундайи ва чпи яшамиш шулайишвар гатӀахьнийи. Агъайи дурар, суд апӀру зурба Йигъ гъяйиз, гьаммишандин зунжрарихьди мучӀушнаъ уьрхюра. 7Гьаму малайикарси, Содомна Гомора, дурарин гъирагъарихъ хъайи жара шагьрарси, гизаф кьяппйирра ва ягьсузарра гьаргандин цӀиъ ургру жазайиз, гъи ухьуз дарс хьпан бадали, тувдар вуйи.

8Чпин нивкӀариин элеъну, чпин жанар чиркин апӀурайидарра гьацдар адмийириз ухшар ву. Дурари Агъайин гьюкум тина апӀура ва аьршарин кьудратариз люкьнар апӀура. 9Гьеле аьхюну малайик Жабраиликьана, иблисдихъди Мусайин бедендикан гьюжатар апӀурайи вахтна, дидиз люкьнар гъапӀундайи. Дугъу дидиз, анжагъ гьамцитӀан гъапундайи: «Гъит Агъайи увуз жаза гьадабтӀри!» 10Хъа гьаму касари чпи гъавриъ адрубдиз люкьнар апӀура. Дурариз саб аьгъя – чпин табиаьт. Вари гьамди дурар, фагьумсуз гьяйванатарси, пуч апӀура. 11Дердна хажалат ибшри чпиз! Дурар Каиндин рякъюъди гъушну. Девлет ккунди дурар, Баламси, улдугнийи. Корей кӀули ади къаршу гъедергдар фици пуч гъапӀнийиш, дурарра гьаци йихиди. 12Ичв масанвалин шадлугъариъ му касар ккеънайи сулариз барабар ву. Дурар гьич саб гучӀ адарди, суфрайихъ, чпин гъайгъушнаътӀан адарди, деъру. Мурар микӀари гьирчнайи мархь ктру дифарси ву. Чвну, бегьер дархури, ерццру, хъа кьабарианзина кчӀюгъру, кьюб ражари пуч шлу гьарарси ву. 13Гьюлин вягьши лепйирси, дурар, чпин ягьсуз ляхнар, чиркин кафси, зиина алдаърудар ву. Дурар аьсрариан-аьсрариз пис мучӀушназ гьязур дапӀнайи, улдугну завариъ уьргънайи хядар ву.

14Адамдихъанмина ургурпи насилди гъаши Енухди гьамрарикан гъапнийиштӀан гьамцдар пайгъамбарвалин гафар:

«Магьа, Агъа гъафну.

Дугъахъди агъзрар-агъзрариинди

гирамидарра хъа.

15Дугъу варидарин суд апӀиди,

вари аллагьсузари

гъапӀу аллагьсуз ляхнар

ашкар апӀиди,

ва, Исайиз къаршуди гъапи

нягьякь гафариз дилигну,

аллагьсуз гунагькрарин

суд апӀиди».

16Думу адмийирин ушв рабхбакан сикин дар. Дурар чпин кьисматнакк аьсси духьна. Дурар чпин тямягьярин хилиъ аьжуз духьна. Дурар, чпин авазйир апӀури, гъючӀвру ва чпиз хайирнахъди, сар шлин-вушра тярифар апӀури, хъюгъру.

17Хъа учву, йиз ккунидар, ихь Агъа Иса Месигьдин вакилари улихьмиди гъапи гафар кӀваин апӀинай. 18Дурари учвуз гъапнийи:

«Аьхиримжи вахтари кялхърудар,

намуссуз тямягьяр ади, ккуниб апӀури,

арайиз удучӀвиди».

19Гьамрари адмийир жара апӀиди. Гьамрар жандин хилиъ аьжуз духьнайидар ву. Мурариз Рюгь адар. 20Хъа учву, йиз ккунидар, ичв гирами хъугъувал артмиш апӀинай, Гирами Рюгьнаъди ккарагай. 21Ихь Агъа Иса Месигьди Чан ужувлиинди ухьуз тувру гьаргандин уьмриз ккилигури, Аллагьдин масанвалиъ гъузай.

22Шаклу духьнайидариз ужувлар апӀинай; 23саспидар, цӀигъян гъючӀюгъюри, уьрхяй; хъа тмундариз ичв рягьимлу юкӀвар улупай, аммаки, дурарин тӀулари чиркин гъапӀу палтарра кмиди даккун апӀури, ихтиятди гъузай.

24Учву алдакуз Гъидритруриз, Чан улихь учву марцциди ва лап шадди дерккуз Шлуриз – 25сар Аллагьдиз, ихь Агъа Иса Месигьдиланмина ухьу Гъюрхюриз, гъит, ад, зурбавал, кьудрат ва гьюкум, дюнʼя ккебгъайизра, гьамусра, ва гьамусдихъантина гьаммишандиз ибшри! Амин.

Currently Selected:

Ягьудайин 1: ТабГК

Highlight

Copy