Эвел 46

Якьуб хизанра хъади Египетдиз гъягъюб

1Израил чаз айиб вари хьади рякъюъ учӀвру. Думу Беэр-Шевайиз гъюру ва душваъ чан адаш Исакьди икрам апӀурайи Заануриз гъурбнар апӀуру. 2Йишвну нивкӀуъ Заанури Израилиз кӀуру:

– Якьуб! Я Якьуб!

– Гьай, – кӀуру Якьубди.

3Хъасин Заанури гъапи:

– Узу Заанур вуза, яв адашдин Заанур, Египетдиз гъягъюз гучӀ мапӀан, фицики Узу увлантина гьадушваъ зурба халкь артмиш апӀидиза. 4Узу увухъди Египетдиз гъягъидиза ва кьяляхъра душвʼан Узу уву адагъидиза. Уву кечмиш шлуган, яв улар хъяркьру хилар Юсуфдин хилар хьиди.

5Якьуб Беэр-Шевайиан удучӀвуру. Израилин (Якьубдин) баяри чпин адашна, бицӀидарна, дишагьлийир фяряуьнди дурар хуз хътау аьрабйириъ итну, рякьюъ учӀвнийи. 6Дурари чпихьди, Ханаандиъ гъазанмиш гъапӀу мал-къара ва имбу мутму гъадабгънийи. Магьа Якьуб вари чан насил хъади Египетдиз гъафнийи. 7Дугъу чахьди Египетдиз баяр, шубар ва худлар – вари чан насил гъадабгънийи.

8Египетдиз гъафи Израилин баярин ччвурар – Якьуб ва дугъан насил:

Якьубдин сарпи бай – Рувим.

9Рувимдин баяр:

Ханох, Фаллу, Хецрон ва Харми.

10Симеондин баяр:

Емуил, Ямин, Охад, Яхин, Цохар ва Ханаан дишагьлийикан гъахьи бай – Шаул.

11Левийин баяр:

Гершон, Кааф ва Мерари.

12Ягьудайин баяр:

Эр, Онан, Шелагь, Перез ва Зерагь. Эрна Онан Ханаандиъ имиди гъакӀнийи, хъа Перездиз Хецронна Хамул баяр гъахьнийи.

13Иссахардин баяр:

Тола, Пувва, Яшуб ва Шимрон.

14Забулундин баяр:

Серед, Элон ва Яхлел.

15Мурар Якьубдин Лияйикан, дурарин Дина ришси, Паддан-Арамдиъ гъахьи баяр ву. Вари мурар сумчӀурна шубур кас вуйи.

16Гаддин баяр:

Цифион, Хагги, Шуни, Эцбон, Ери, Ароди ва Арели.

17Ашерин баяр:

Имна, Ишʼва, Ишʼви ва Брия. Дурарин чи – Серах. Брияйин баяр: Хевер ва Малкиил.

18Му бицӀидар Якьубдиз Лаванди чан риш Лияйиз гъаравашди туву Зилфийикан гъахьидар ву. Вари – йицӀийирхьур кас.

19Якьубдин хпир Рахиликан гъахьи баяр:

Юсуф ва Вениамин. 20Египетдиъ Юсуфдиз Гелиополиъ диндин гъуллугъчи Потиперайин риш Аснатди Манасна Ефраим баяр хуру.

21Вениаминдин баяр:

Бел, Бехер, Ашбел, Гера, Нааман, Ехи, Рош, Муппим, Хуппим ва Ард.

22Мурар Якьубдин хпир Рахилин баяр вуйи. Вари – йицӀиюкьур кас.

23Дандин бай:

Хушим.

24Нефталимдин баяр:

Яхцел, Гуни, Ецер ва Шиллем.

25Му баяр Якьубдиз, Лаванди чан риш Рахилиз гъаравашди туву Билхайикан гъашидар вуйи. Вари – ургур кас.

26Якьубдихъди Египетдиз гъафидар, баярин хпар ктарди, дугъан вари диш наслар – йирхьцӀурна йирхьур кас вуйи. 27Думуганайиз Египетдиъ Юсуфдиз бабкан гъахьи баяр кьюр вуйи. Египетдиз гъафи Якьубдин хизан ургцӀур касдикан ибарат вуйи.

28Якьубди Юсуфдихьна, Гошендиз чпин улихьна Юсуф гъюри кӀури, улихьди Ягьуда гьаънийи. 29Юсуф, аьраба ккибтӀуз буйругъ тувну, чан адаш Израил къаршуламиш апӀуз Гошендиз гъушнийи. Магьа думу чан адашдин улихь хьа: Юсуф адашдин гардандиъ архьру. Юсуф адашдин хабаъ кьаназ ишури гъузнийи.

30Хъа Израили Юсуфдиз гъапи:

– Сарун уву йиз улариз чӀивиди гъяркъхъантина, гъачӀишра баладарзуз.

31Юсуфди чан гъардшаризна адашдин хуландариз гъапи:

– Узу фяряуьндихьна гъягъидиза ва дугъаз: «Ханаан жилариин яшамиш шулайи гъардшарна йиз адашдин хал-хизан узухьна дуфна. 32Му адмийир габнар ву; дурари мал-къара уьбхюри шулу. Дурари чпихьди чпин мал-къарайин лижарна чпин мутму гъабхну», – пидиза. 33Фяряуьнди учвуз дих дапӀну: «Фу кеспнан адмийир вучва?» кӀури гьерхиган, 34учву гьамци жаваб тувай: «Учу, яв лукӀар, ич абйирси, бицӀидихъанмина мал-къарайиин эллешмиш духьнайидар вуча». Хъа дугъу Гошен жилиин учву гъитди, гьаз гъапиш египтари марччар уьрхрудар чиркиндар вуди гьисаб апӀура.

Currently Selected:

Эвел 46: ТабГК

Highlight

Copy