Эвел 40

Юсуфди нивкӀарин мяна ктибтуб

1Гьадму гьядисйир духьну сацӀиб вахтналан фяряуьндин чяхрарин аьхюрикан ва фяряуьндиз уьл убжрударин аьхюрикан, чпин агъайин – фяряуьндин улихь тахсрар ктахьнийи. 2Фяряуьндиз чан кьюр гъуллугъчийикан – чяхрарин аьхюриканна уьл убжрударин аьхюрикан хъял гъюру 3ва дурар, паччагь уьрхру эскрарин аьхюрин хулаъ айи, Юсуф итнайи дустагъдиъ итру. 4Кьюридинра гъайгъу зигбан бадали, эскрарин аьхюри дурар Юсуфдин хиликкна тувнийи. Юсуф дурарин гъайгъушнаъ учӀвнийи.

Дустагъдиъ итну сацӀиб вахтналан 5дурариз кьюридизра – фяряуьндин чяхраринна уьлин аьхюдариз – сад йишван нивкӀар рякъюру. Дурариз гъяркъю гьарсаб нивкӀуъ чан мяна айи.

6Хъа йигъан гьиринган дурарихьна гъафи Юсуфдиз дурар фти-вуш пашман дапӀнади рякъюру. 7Чахъди чан аьхюрин хулаъ айи дустагъдиъ айи фяряуьндин гьадму гъуллугъчйирихьан Юсуфди гьерхру:

– Гъи гьаз мици пашманди ачва?

8– Учуз кьюридизра нивкӀар гъяркъюнчуз, – жаваб тувру дурари, – хъа дурарин мяна ктибтуз шлур мушваъ адар.

Юсуфди гъапи:

– Анжагъ ЗаанурихьантӀан шулдар инсанарихьди нивкӀарин мяна ачухъ апӀуз гъитуз. Кидитай ичв нивкӀар узуз.

9Чяхрарин аьхюри Юсуфдиз чан нивкӀ ктибтуру:

– Узуз нивкӀукди тӀумтӀин шир гъябкъюнзуз. 10Дидʼин шубуб циркил алийи. Ширну кьюкьяр гъапӀубси, дишла кюкю адабшвуру ва кюкйирра тӀумтӀин кабариз илтӀикӀуру. 11Йиз хилиъ фяряуьндин чяхрин кӀарч айиз. Узу, тӀумтӀар гъадагъну, тӀумтӀун шид чяхрин кӀарчназди кючӀюкьну, думу кӀарч фяряуьндин хилиз тувунза.

12– Магьа дидин мяна, – кӀуру Юсуфди. – Шубуб циркил – шубуд йигъ ву. 13Шубуд йигълан фяряуьнди уву за апӀиди ва яв муганайиздин гъуллугъниин дерккдиву. Уву фяряуьндиз, фяряуьндин чяхрарин аьхюр вуйи вахтариси, чан чяхрин кӀарч хидива. 14Думу ужуб вахт гъафиган, миннат апӀуразавукан, узу кӀваин апӀинава: узкан фяряуьндиз, узу дустагъдиан адаъбан бадали, узхъанди гаф йипава. 15Узу гужназ жугьдарин жиларилан гъурхунзу ва мушваъра, дустагъдиъ итузкьан, гъапӀуб фукӀара адариз.

16Уьл убжрударин аьхюри, Юсуфди сабпи нивкӀун мяна хайирназ ктибтуб дябкъну, кӀуру:

– Узузра нивкӀ гъябкъюнзуз. Йиз кӀулʼин шубуб гъярзинка иливнайи. 17Зиин алибдиъ фяряуьндиз гьар жюрейин дуржнайи итӀрудар айиз, аммаки йиз кӀулʼин али гъярзинкайиан дурар жакьвари удуйи.

18– Магьа дидин мяна, – кӀуру Юсуфди, – шубуб гъярзинка – шубуд йигъ. 19Шубуд йигълан фяряуьнди увура за апӀиди – яв кӀул алдабтӀиди, хъа яв жандак маргълиин улубччвиди, ва жакьвари думу убдиди.

20Фяряуьнди шубудпи йигъан, учв бабкан гъахьи йигъаз бахш вуди, чан гъуллугъчйириз шадлугъар ккергъру. Дурарин улихьна дугъу дустагъдиан чяхраринна уьл убжрударин аьхюдар хуз гъитру. 21Чяхрарин аьхюр чан ляхниин дерккру, ва дугъу фяряуьндин хилиъ чяхрин кӀарч ивру. 22Хъа уьл убжрударин аьхюр, Юсуфди гъапиганси, маргълиин улурччвуру.

23Аммаки чяхрарин аьхюри Юсуфдикан кӀваинкьан гъапӀундайи. Дугъаз Юсуф кӀваълан гьархнийи.

Currently Selected:

Эвел 40: ТабГК

Highlight

Copy