Эстер 1
1
Паччагьдин дем
1Му паччагь Ахашʼверушдин вахтари гъабхьиб ву – гьадму, варжна къанна ургуб вилаятдин, Индияйиан Эфиопияйизкьан, паччагь вуди гъахьи Ахашʼверушдин.
2-3Гьадму вахтна чав Сузы шагьрин гъалайиъ паччагьдин тахтниин алди шубуд кӀуру йисан Ахашʼверушди чаз багахь инсанариз ва гьякимариз аьхю дем апӀуру. Фарсарин ва мидийирин кьушмарин кӀулиъ айидар, бегзадйир ва вилаятарин аьхюдар паччагьдихьна гъафнийи, 4хъа дугъу дурариз паччагьлугъдин девлет, хазна, чан гюрчегʼвал ва заанвалин нурлувал улупнийи. Гьамци варжна миржцӀур йигъан давам гъабхьнийи. 5Гьаму йигъар гъушган, паччагьди Сузы шагьрин гъалайин вари халкьдиз, девлетлуйиризра, касибаризра, паччагьлугъдин дараматдин багъдиъ ургуд йигъан дем тешкил гъапӀнийи. 6Душваъ багьа лизи гинбин ва беневш хьайин парча илипну, уьру хьайин ва гъашдин лизи тӀурнариинди кибтӀну, арсран дукьнар ккирчну, мармардашдин дунар дурсну, пажар гьязур гъапӀнийи. Деъру йишвар арсрандар ва гъизилиндар вуйи, хъа жиликк мармардаш ва нур туврайи багьа гъван ккабхьнайи. 7Убхъруб жюрбежюр гъизилин гъабариъди туврайи, иллагьки паччагьдин чяхир кьадар адрубкьан айи. 8Фукьан ккундуш убхъуз ихтияр тувнийи – паччагьди чан паччагьлугъ дараматдин вари гьякимариз амур гъапӀу: гъит инсанари чпиз ккунибкьан убхъри.
9Хъа паччагьдин хпир Ваштийи Ахашʼверушдин паччагьлугъ дараматдиъ дишагьлийириз дем гъапӀнийи.
Вашти сарун паччагьдин хпир дар
10-11Ургуд кӀуру йигъан чяхир дубхъну гьевес ачухъ гъабхьи паччагь чан ургур дугъаз гъуллугъ апӀурайи гъаравашдихьна илтӀикӀуру – дурариз Мехуман, Биззета, Харвона, Бигта, Авагта, Зетар ва Къаркъас кӀуйи – ва, халкьдиз ва гьякимариз чан хпир Ваштийин успагьивал (хъа думу кьадарсуз гюрчегур вуди гъахьну) улупбан бадали, дурариз чахьна, паччагьдин тажра алабхьну, хпир хъади гъюб амур апӀуру. 12Гъаравашари Ваштийиз паччагьдин амрикан гъапнийи, амма думу гъюз рази гъахьундайи. Паччагьдиз яман хъял гъафнийи, дугъан ажугълувал кьадар адруб вуйи. 13Паччагь вахтарин гъавриъ айи зигьимлударихьна илтӀикӀуру, – думу къанунар ва ихтиярар аьгъю инсанарихьан насигьят гъадабгърур вуйи. 14Думуган дугъаз варитӀан багахьдар Каршена, Шетар, Адмата, Таршиш, Мерес, Марсена, Мемухан вуйи, фарсарин ва мидийирин му ургур гьякимдиз паччагьдихьна учӀвуз ихтияр айи ва паччагьлугъдиъ дурар садпи инсанар вуйи.
15«Ахашʼверуш паччагьдин амур тамам дарапӀу паччагьдин хпир Ваштийиз къанундиинди гьапӀуб лазим ву?» – гьерху паччагьди.
16Ва гъапи Мемуханди паччагьдиз ва гьякимариз: «Вашти неинки паччагьдин улихьси, Ахашʼверушдин паччагьлугъдиъ айи вари халкьарин ва гьякимарин улихьра тахсиркар ву. 17Му ляхникан вари дишагьлийириз аьгъю хьибди ва чпин жилариз гьюрматсузвал улупиди. „Чав Ахашʼверуш паччагьди чахьна чан хпир Вашти хъади гъюб амур гъапӀну, хъа думу гъафундар“, – пиди дурари. 18Фарсарин ва мидийирин мессеблу, адлу дишагьлийириз паччагьдин хпирин мициб гьюрматсузваликан гъеебхьну – гъи дурари гьякимариз дидкан ктибтиди, гьадмуган аьхир адру гъярхьувалар ва хъпебехъувалар арайиз гъиди. 19Эгер паччагьдиз ккун гъабхьиш, гьамусдихъантина Вашти Ахашʼверушдихьна дарифри кӀуру, батӀул апӀуз даршлу мялумат адабгъри ва Персияйин ва Мидияйин къанунариъ бикӀри. Хъа чаз хпирди дугъу жара дишагьли, гьадмутӀан ужур, гъадагъри. 20Паччагьди адабгъу гьадму къарарнакан вари паччагьлугъдиз хабар тувган, дишагьлийири, девлетлуйирилан гъадабгъну касибариинакьан, чпин жиларин гьюрмат уьбхиди».
21Му теклиф паччагьдиз ва гьякимариз кьабул гъабхьнийи. 22Ва паччагьди, Мемухандин насигьят тамам апӀури, чан вари мулкариина, гьарсаб вилаятдиз, гьарсаб халкьдиз чан чӀалниинди кагъзар хътауру. «Гъит жилижви чан ужагъдиъ агъа ишри», – вари чӀалариинди гьамциб мялумат тувнийи.
Currently Selected:
Эстер 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
