Ляхнар 14

Павелна Варнав Иконияйиъ

1Иконияйиъ Павелна Варнав, аьдат вуйиси, жугьдарин мистаз гъюру ва дурари душваъ ижмивалиинди аьгъювалар улупуру. Жугьдарикан ва жара миллетарикан гизафдар Исайихъ хъугънийи. 2Хъа хътругъу жугьдари, Варнавдизна Павелиз къаршу вуди, жугьуд дарударик хъял капӀру.

3Вушра, Варнавна Павел, душваъ кьаназ гъузну, Агъайикан дирбашди аьгъювалар улупури гъахьну. Агъайи дурарин хиларилантина Чан ужувлан шагьидвал вуди хайлин аьламатар ва аьжайиб лишнар улупури гъахьну. 4Шагьрин агьалйир кьюб дестейиз пай гъахьнийи: садар жугьдарихъанди, тмундар Исайин вакиларихъанди. 5Жугьуд дарударинна жугьдарин аьхюдари Павелна Варнав, гъван уьлюбхну, урччвуз кьаст гъапӀиган, 6вакилар, мидкан хабар дубхьну, Ликаонияйин шагьрар вуйи Листра, Дервия ва дурарин аьтрафарихъинди гъушнийи.

7Дурари душвариъра Ужувлан хабар рабгъури гъахьну.

Паралич духьнайир сагъ апӀуб

8Листрайиъ, ликарик паралич кади, бабкан гъахьихъанмина сабанна дилицу кас айи. 9Му кас Павелин гафарихъ хъпехъурайи. Павел дугъахьинди гъилигнийи. Дугъаъ сагъ хьуз хъугъвал айивал Павелиз гъябкънийи 10ва зарбди гъапнийи:

– Ликриина гъудужв!

Думу гъедергну лицуз хъюгъру. 11Гьадмуган, Павели гъапӀуб гъябкъиган, адмийири ликаон чӀалниинди чӀигъ апӀуру:

– Ухьухьна инсанарин суратнаъди аллагьар дуфна.

12Дурари Варнавдиз Зевс, хъа Павелиз Гермес кӀурайи, фицики дурарикан гизафси улхрур Павел вуйи.

13Шагьрин гъирагъдихъ Зевсдиз икрам апӀру мист хъайи. Му мистан гъуллугъчийи, кюкйирин кунцӀарна йицар хьади, шагьрин урнарихъна йицар хъаъну гъюру. Дугъазра халкьдихъди, Павелизна Варнавдиз икрам апӀбан лишан вуди, йицар дурккну гъурбан апӀуз ккунди айи. 14Мидкан гъеебхьу Варнавна Павел, хъюлʼан чпин палтар дячӀяргъну, чӀигъар апӀури, халкьдихьна жаргъуру:

15– Эй инсанар, учву гьапӀрачва? Учу аллагьар дарча! Учу учвусдар инсанар вуча! Учу учвухьна, учву идоларихьан маш гьибицну, завар-жилар, гьюлер ва дурариъ айикьандар вари яратмиш гъапӀу чӀиви Аллагьдихьинди илтӀикӀбан бадали, учвухьна Исайикан Ужувлан хабар хьади дуфнайидар вуча. 16-17Улихьди Аллагьди, ужувлар апӀури, Чакан учвуз гьаммишан кӀваин апӀури гъахьнушра, Дугъу гьарсаб халкьдиз чан рякъ дибисну гъягъюз ихтияр туври гъахьну. Дугъу, учвуз ужуб бегьер тувуз, мархьар гьаъри гъахьну. Дугъу учвуз ипӀуз ужуб тувра ва ичв юкӀвар шадвали ацӀра.

18Вари гьамцдар гафар гъапнушра, Павелихьанна Варнавдихьан йицар гъурбан апӀбахьан халкь саб гужа-гуждитӀан дерккуз удукьундайи.

19Вакилари Ужувлан хабар рабгъурайиган, Антиохияйианна Иконияйиан жугьдар дуфну, халкь дурариз гьамци кӀури къаршу адауру:

– Вакилари учвуз фукӀара гьякьлуб кӀурадар, хъа вари дурарин кучӀлар ву.

Мурарира, гъван уьлюбхну, Павел йивну дитру ва, думу гъакӀуншул пну, хъчӀюхюри, шагьрин гъирагъдихъ духну дитру. 20Ученикар дугълан илтӀишган, Павел гъудужвуру ва шагьриз гъягъюру. Хъайигъан думу, Варнавра хъади, Дервияйиз гъягъюру.

21Гьаму шагьриъ дурари, аьгъювалар улупури, чпиз хайлин ученикар гъазанмиш апӀуру. Хъасин дурар Листрайиз, Иконияйиз ва Антиохияйиз хътакуру. 22Душвариъ дурари чпин ученикарин юкӀвар хъугъвалиъ ижми хьпан бадали, дурар гьевеслу апӀуйи. Дурари гьамци кӀуйи:

– Ухьуз Аллагьдин Паччагьлугъдиъ учӀвайиз гизаф аьзабар алахьиди.

23Хъасин хъугънайидарин гьарсаб жямяаьтдиъ аьхюр ктагъбалан кьяляхъ, Павелина Варнавди, ккарагну ва ушвар дидисну, чпи хъугънайи Аллагьдиина дурар аманат апӀуру.

24Писидияйиантина душну, дурар Памфилияйиз гъюру 25ва Пергдиъ аьгъювалар улупуру. Хъасин дурар Атталияйиз ктучӀвуру. 26Хъа дилин дурар Аллагьдин амриинди чпи гъапӀу ляхнар апӀуз гьау Антиохияйиз сирнав апӀуру.

27Дина дуфну, вари хъугънайидар уч дапӀну, дурари Аллагьди чпиз гъапӀу вари ляхнарикан ва Агъайи жугьуд дарударизра хъугъувалихьна раккар арццбакан ктибтуру. 28Хъа дурар душваъ чпин ученикарихъди кьаназ гъузнийи.

Currently Selected:

Ляхнар 14: ТабГК

Highlight

Copy