Паччагьлугъар-2 7

Давуддиз Раббийи туву гаф

1Паччагь чан гъалайиъ яшамиш хьуз хъюгъбахъан ва РАББИЙИ дугъаз чан юкьуб терефнаъ айи душмнарихьан архаинвал тувбахъан, 2Давудди Натан пайгъамбриз гъапнийи:

– Лиг, узу кедрйин гакӀвликан дапӀнайи гъалайиъ яшамиш шулаза, хъа Заанурин сундух Чадрикк#7:2 Чадур: Заанурин амриинди Муса пайгъамбри тикмиш гъапӀу ибадат апӀрушв. Сулейман паччагьди РАББИЙИН Хал тикмиш апӀайиз, думу чадурин улихь Заануриз гъурбнар апӀуйи. Анжагъ Заанурин гъуллугъчйиризтӀан думу чадурин айитӀ учӀвуз ихтияр адайи. гъубзна.

3Натанди паччагьдиз жаваб тувнийи:

– Гъарах ва яв кӀваъ айиб вари апӀин, гьаз гъапиш РАББИ увухъди хъа.

4Думу йишван Натандихьна РАББИЙИН гаф дуфнади гъабхьну:

5– Гъарах ва йип Йиз лукӀ Давуддиз: «Гьамци кӀура РАББИЙИ: Узу ади хьуз вуйи хал Узуз тикмиш апӀрур уву вунахъа? 6Израилар Египетдиан адау йигъхъанмина гъийин йигъаз Узу хулаъ яшамиш гъахьундарза, хъа пажнаккди ва гирами Чадриккди мина-тина гъягъюри гъахьунза. 7Вари израиларихъди наан лицури гъахьнушра, Узу Йиз Израилин халкь уьбхюз амур гъапӀу регьбрарикан саризкьан гъапнийинхъа: „Учву Узуз кедр гьарин гакӀвлин хал гьаз тикмиш гъапӀундарчва?“»

8Гьаци, Йиз лукӀ Давуддиз йип: «Заварин Кьувватарин Аьхюри гьамци кӀура: уву чӀурариъ марччариз лигурайиган ва хъайивал апӀурайиган, уву Израилин Йиз халкьдин гьюкумдар хьпан бадали, гъадагънийзаву. 9Уву наана гъягъюрушра, Узу увухъди хъайза ва яв улихь вари яв душмнар дагъитмиш гъапӀнийза. Яв ччвур Узу жилин машгьур адмийирин ччвурариз ухшар апӀидиза. 10Йиз халкьдиз, Израилиз, Узу йишв ккабалгидиза ва думу чан хал ади хьуз ва сарун сарира думу инжик дарапӀуз биналамиш апӀидиза. Муганайизси, Йиз халкьдиин, Израилиин, 11Узу судйир деркку вахтнаси, намуссузари сарун дидиз истисмар апӀидар. Узу гьацира увуз яв вари душмнарихьан архаинвал тувидиза.

РАББИЙИ увуз мялум апӀураки, Чав яв хал тасдикь апӀиди. 12Яв йигъар ккудуркӀиган ва уву яв архйирихъди фаракьат гъахьиган, Узу тахтниин яв наслиан вуйир дерккидиза ва дугъан паччагьлугъ мюгькам апӀидиза. 13Дугъу Йиз ччвурназ хал тикмиш апӀиди, ва Узу дугъан паччагьлугъдин тахт гьаргандиз мюгькам апӀидиза. 14Узу дугъаз Адаш хьидиза, ва думу Узуз бай хьиди. Дугъу гунагь шлуб гъапӀиган, Узу дугъаз, адашди бализ маргълихъди йивруганси, жаза тувдиза. 15Амма Узу думу Йиз рягьимдиккан, уву бадали ярхла гъапӀу Саул рягьимдиккан ккадаъганси, ккадаидарза. 16Яв тухум ва яв паччагьлугъ Йиз улихь гьаргандиз мюгькамдар хьиди; яв тахт гьаргандиз мюгькам апӀидиза».

17Натанди Давуддиз му ачухъвалин вари гафар ктитнийи.

Давуддин дюаь

18Думуган Давуд паччагь учӀву, РАББИЙИН улихь деу, ва дугъу гъапи:

– Уву узу гьамкьан за апӀуз фуж ву узу ва фу ву йиз тухум, Агъа вуйи я РАББИ? 19Яв улариъ думу цӀиб вуйиганси, я Заанур, Уву Яв лукӀран тухмин гележегдиканра ктибтунва. Магьа инсандин гьякьнаан яв гъайгъушин, Агъа вуйи я РАББИ.

20Давуддихьан Увуз сарун фу пуз шулу? Увуз Яв лукӀ аьгъявуз аьхир, Агъа вуйи я РАББИ! 21Яв гаф гьякь хьпан бадали ва Яв хушниинди Уву му зурба ляхин гъапӀунва ва думу Яв лукӀраз улупунва.

22Уву фукьан машгьур дарна, Агъа вуйи я РАББИ! Увуз барабар вуйир адар ва увутӀан жара Заанур адар. Учуз ич ибариинди гъеебхьубди варибди гьаци вуйивал субут апӀура. 23Ва фуж ву жилиин ялгъуз чахьна, думу азад апӀбан ва Чан халкь апӀбан бадали, Заанур гъюри гъахьи Яв халкьдиз, Израилиз, барабар? Варидиз Яв ччвур аьгъю хьпан бадали, Уву Египетдиан Яв халкь адаъбиинди ва дидин улгьан жара халкьар ва дурарин бутар утӀурккбиинди зурба ва гучӀ ккапӀру ляхнар гъапӀунва. 24Уву Израиликан гьаргандиз Яв хусуси халкь гъапӀунва, ва Уву, я РАББИ, дидин Заанур гъахьунва.

25Ва гьамус, я РАББИ, я Заанур, гъит Уву Яв лукӀран ва дугъан тухумдин гьякьнаан туву гаф гьаргандиз тасдикь ибшри, ва Уву гаф тувганси апӀин. 26Гъит Яв ччвур даимайиз заан ибшри, инсанари кӀуруганси: «Заварин Кьувватарин Аьхюр – Израилин зиин Заанур!» ва Яв лукӀ Давуддин тухум Яв улихь тасдикь ибшри.

27Я Заварин Кьувватарин Аьхюр, Израилин Заанур, Уву Яв лукӀраз, «Узу увуз тухум ккабалгидиза» дупну, думу ашкар гъапӀунва. Гьаддиз Яв лукӀ Увуз гьаму дюаь апӀуз кӀубан гъахьну. 28Я РАББИ, Уву Заанур вува! Яв гафар гьякь ву, Уву яв лукӀраз гьаму ужʼвал апӀуз гаф тувунва. 29Гъит Увуз Яв лукӀран тухумдиз, думу гьаргандиз Яв улихь хьпан бадали, ужʼвал апӀуз хуш ибшри. Дици Уву, РАББИЙИ, Заанури, гьаци гъапунва, ва Яв лукӀран тухум гьаргандиз Яв ужʼваликан ужʼваликк ибшри!

Currently Selected:

Паччагьлугъар-2 7: ТабГК

Highlight

Copy