Паччагьлугъар-2 4
4
Иш-Бошет йивну йикӀувал
1Саулин бай Иш-Бошетдиз Авнер Хеврундиъ йикӀуваликан гъеебхьиган, дугъан рюгь ктабхънийи, ва вари Израилик гъалабалугъ кабхънийи. 2-3Саулин балин эскрар жара йишвариин алжагъбариз хъади гъягъру кьюр адми айи. Сариз Баана кӀуйи, хъа тмунуриз – Рехав. Дурар Вениаминдин наслиан вуйи Беэрот шагьрин агьали Риммондин баяр вуйи. Беэрот Вениаминдин юрд вуйи, гьаз гъапиш Беэротдин агьалйир Гиттаимдиз гьергну гъушнийи. Дурар гъийин йигъазкьан#4:2-3 Гъийин йигъазкьан: китаб гъибикӀу вахтнакан кӀура. гьадушваъ яд адмийирди гъузна.
4(Юнатандихъ, Саулин балихъ, кьюбиб ликарра лику бай хъади гъахьну. Изреелиан Сауликан ва Юнатандикан хабар гъюруган, дугъан хьуд йис яш вуди гъабхьну. БицӀириз лигурайи дишагьлийи думу бай хъади гъажаргъну, амма гьаци чкиди гъажаргънуки, бай алдакну ва лику гъахьну. Думу бализ Мефи-Бошет кӀури гъахьну.)
5Гьаци, Беэротдиан вуйи Риммондин баяр Рехав ва Баана Иш-Бошетдин хуларихъна гъушнийи, ва дурар дина йигъандин гизаф мани вахтна, думу лисхъан рягьятвал йивру вахтна даахнайиган, гъафнийи. 6Хуларин урнарихъ дяхин кюдюбхюрайи гъараваш-дишагьли, бизар духьну, даахнайи, ва чвйир Рехав ва Баана аьгъю даршлуганси ктучӀвнийи. 7Дурар хулариъ Иш-Бошет чан ахру хулаъ ахникк дахънайиган учӀвнийи. Йивну ва думу дукӀну, дугъан кӀул алдабтӀну, Риммондин баяр, кӀулра чпихьди гъадабгъну, дурар ярхи йишвди ярдан дерейин рякъюъди гъушнийи. 8Дурари Иш-Бошетдин кӀул Давуддихьна Хеврундиз гъабхнийи ва паччагьдиз гъапнийи:
– Магьа Иш-Бошетдин, Саулин балин, уву уьмрихъ мягьрум апӀуз чалашмиш гъахьи яв душмнин, кӀул. Гъи РАББИЙИ Саулилан ва дугъан наслилан йиз агъа вуйи паччагьдихъанди кьисас алдабгъну.
9Давудди Рехавдиз ва дугъан чве Баанайиз, Беэротдиан вуйи Риммондин баяриз, жаваб тувнийи:
– Узу бедбахтваликкан ккадау РАББИЙИИНДИ ху апӀурза, 10сар адмийи, ужуб хабар гъабхунза кӀуру фикир апӀури, узуз гъапиган: «Саул гъакӀну», узу думу Циклагдиъ гъидисунза ва аьжалин хлиз тувунза. Магьа дугъан хабрихъ дугъаз узу туву пешкеш! 11Хъа гьамус, гъачагъари тахсир ктру адми чан хусуси хулаъ ва чан хусуси ахникк йивну дукӀнайиган, узу дугъан ифи учвлан алдабгъидаринхъа ва жил учвхьан азад апӀидаринхъа!
12Давудди чан адмийириз амур гъапӀнийи, ва дурари Риммондин баяр йивну гъакӀнийи. Давуддин адмийири дурарин хилар ктатӀнийи, ликар ккадатӀнийи ва жандкар Хеврундин дагрин багахь дариан гъизигнийи. Хъасин дурари Иш-Бошетдин кӀул гъадабгънийи ва Хеврундиъ Авнерин майит айи гюмбетдиъ кивнийи.
Currently Selected:
Паччагьлугъар-2 4: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
