Паччагьлугъар-2 15
15
Авессалом къаршуди удучӀвуб
1Дидин кьяляхъ Авессаломди чаз гьяйвнар ккитӀнайи дявдин аьраба, гьяйвнар ва, учв уьрхбан ва чан улихьди жаргъбан бадали, чан гъуллугънаъ айидарин хьуцӀур касдикан ибарат вуйи десте гьязур гъапӀнийи. 2Думу гвачӀнин ухди гъудужвуйи ва шагьрин урнарихъна гъябгъру рякъюн гъирагъдихъ дийигъуйи. Гьарсаб ражну, фуж-вуш паччагьдихьна диванханайиз аьрз апӀрур гъягъруган, Авессаломди дугъаз чан багахьна дих апӀуйи ва гьерхуйи:
– Уву фуну шагьриан вува?
Гьадгъу жаваб тувуйи:
– Яв гъараваш израилин флану наслиан ву.
3Ва Авессаломди дугъаз кӀуйи:
– Ав, яв аьрз гьякьлуб вуяв, амма паччагьдин багахь увухъ хъпехъуз ужур хьтар.
4Хъасин Авессаломди аьлава апӀуйи:
– Магьа узу уьлкейин диванбеги вуди тяйин гъапӀнийиш! Думуган гьарсар аьрз ясан гьюжат айирихьан узухьна гъюз хьидийи, ва узу ляхниз дугъривалиинди лигидийза.
5Ва гьарсаб ражну, фуж-вуш чахьна икрам апӀуз гъафиган, Авессаломди хил гьачӀабккуйи, думу хабаъ ауйи ва дугъаз мак апӀуйи. 6Авессаломди паччагьдихьна дугъривал абгури гъюру вари израиларихъди учв гьамци гъахуйи; гьамци думу аьмлиинди вари израиларин юкӀвариъ учӀвуйи. 7Юкьудпи йисан аьхириъ Авессаломди паччагьдиз гъапнийи:
– Узуз Хеврундиз гъягъюз ва узу РАББИЙИЗ туву аьгьт тамам апӀуз ихтияр тув. 8Яв гъараваш вуйи узу Арамдин Гешуриъ айиган, гьамциб аьгьт тувнийза: эгер РАББИЙИ узу Ерусалимдиз кьяляхъ гъапӀиш, Узу РАББИЙИЗ Хеврундиъ ибадат апӀидиза.
9Паччагьди дугъаз гъапнийи:
– Ислягьвалиинди гъарах.
Ва думу Хеврундиз рякъюъ учӀвнийи. 10Авессаломди Израилин вари тухмариз гьамци пуз жини чархачйир гьаънийи:
– Учвуз кӀарчариан йивурайи сесер гъеерхьубси, йипай: «Авессалом Хеврундиъ паччагьди деъну».
11Ерусалимдиан Авессаломдихъди сатӀиди кьюдварж адми гъушнийи. Дурар, теклиф кӀваантӀан кьабул дапӀну, гъягъюрайи, ва дурариз думу ляхникан хабаркьан адайи. 12Гъурбнар апӀури, Авессаломди Гило шагьриан вуйи Ахитофел#15:12 Ахитофел: Давудди дявдиз гьаъну гъакӀи Урияйин хпир Батшевайин аьхю аба вуйи., Давуддин насигьятчи, хъади гъюз дугъан шагьур Гилойиз гьаънийи. Гьамци, пис кьастнан кьувват аьхю, хъа Авессаломдин терефкрарин кьадар артухъ шулайи.
Давуд гьергувал
13Давуддихьна чархачи гъафнийи ва дугъаз гъапнийи:
– Израиларин юкӀвар Авессаломдин терефнаъ а.
14Давудди Ерусалимдиъ чахъди хъайи чан гъуллугънаъ айидариз варидариз гъапнийи:
– Уч йихьай! Ухьу гьергну ккунду, дархьиш ухькан сарра Авессаломдиккан къутармиш хьидар. Ухьхьан гъягъюз хьпан бадали, гьялак йихьай, дархьиш думу ухьухъ ухди хъуркьди, дугъу ухьʼин бедбахтвал алапӀиди ва шагьур турикк ккапӀиди.
15Паччагьдин гъуллугънаъ айидари дугъаз жаваб тувнийи:
– Яв гъаравашар ич агъа вуйи паччагьди йикьрар адабгъуб вари тамам апӀуз гьязурди а.
16Ва паччагь чан вари тухумдихъди, амма йицӀур ашна гъалайиз лигуз гъитну, рякъюъ учӀвнийи. 17Паччагь рякъюъ учӀвнийи, вари халкьди думу гьаърайи, ва, саб кьадар манзилназ гъушиган, дурар дийигънийи. 18Вари дугъан адмийир паччагьдин кьяляхъди керетарихъди ва пелетарихъди#15:18 Керетар ва пелетар: му халкьарикан вуйидари паччагь уьрхюйи. Керетар Крит къураматдилан хьуз мумкин ву. сатӀиди гъюрайи, хъа Гъатдихъанмина дугъахъди хъайи йирхьудварж Гъат шагьриан вуйи адми паччагьдин улихьди гъягъюрайи.
19Паччагьди Гъатдиан вуйи Иттайиз гъапнийи:
– Яв учухъди дуфну гьаз вуяв? Кьяляхъ хъадарк ва Авессалом паччагьдихъди гъуз. Уву жара юрдариан вуйир, багъри жилилан ултӀуккнайир вува. 20Уву анжагъ накь гъафунва. Хъа гъи, узузра наана гъягъюруш аьгъдруган, узу уву учухъди мина-тина гъягъюз мажбур апӀидин? Кьяляхъ гъарах ва увухъди яв ватанагьлийирра гъадагъ. Ва гъит увухъди рягьим ва дугъривал ишри.
21Амма Иттайи паччагьдиз гъапнийи:
– РАББИЙИИНДИ ва йиз агъа вуйи паччагьдиинди ху апӀурза, йиз агъа вуйи паччагь наан гъахьиш, чӀивиди гъузрушра ясан йикӀурушра, гьадушваъ яв гъаравашра хьиди.
22Давудди Иттайиз гъапнийи:
– Дици вуш, гъарах, улихьна гъарах.
Ва Гъатдиан вуйи Иттай чахъди хъайи чан вари адмийир ва бицӀидар хъади улихьна гъушнийи.
23Паччагьдин адмийир гъягъруган, вари уьлке гьарйир апӀури ибшуйи. Паччагьди Кьидрун дере ккадапӀнийи, ва вари халкь буш чюлин терефназди диш гъабхьнийи.
24Гьадушвахь Цадукра, дугъахъди хъайи ва Заанурихъди Йикьрарин сундух гъабхурайи левитарра#15:24 Левитар: Левийин наслиан вуйидар, Заанурин гъуллугъчйирин кюмекчйир. хьайи. Дурари Заанурин сундух дивнийи, ва Авиатари вари халкь шагьриан удубчӀвайизкьан гъурбнар апӀурайи.
25Паччагьди Цадукдиз гъапнийи:
– Заанурин сундух шагьриз кьяляхъ апӀин. Узуз РАББИЙИН улариъ рягьим гъибихъиш, Дугъу узу кьяляхъ апӀиди ва цӀийикӀултӀан узуз сундух ва думу айишв рякъюз гъитди. 26Хъа эгер Дугъу узуз гъапиш: «Узу увʼин рази дарза», думуган узу гьязур вуза; гъит Дугъу узкан Чаз ккуниб апӀри. 27Паччагьди Заанурин гъуллугъчи Цадукдиз хъана гъапнийи:
– Увуз рябкъюрадарвуз? Шагьриз яв бай Ахимаацдихъди ва Авиатарин бай Юнатандихъди ислягьвалиинди кьяляхъ хъадарк. Увуна Авиатари учвухъди ичв кьюрид баярра гъадагъай. 28Узу буш чюлиъ ниркан ктучӀврушвахь учвхьан узухьна хабрар гъяйиз ккилигидиза.
29Цадукди ва Авиатари Заанурин сундух Ерусалимдиз кьяляхъ гъапӀу, ва чибра гьадушваъ гъузу.
30Хъа Давуд Зейтундин дагъдикна, ишури, гъушну; дугъан кӀулʼин улубкӀнайи, ликар гъяцӀалди вуйи, ва думу дерднак кахънайи. Дугъахъди хъайи вари адмийирра дерднак кахънайи ва, дагъдиина за шули, ишуйи.
31Давуддиз «Ахитофел пис кьаст дапӀнайидарин арайиъ Авессаломдихъди хъа» гъапиган, Давуд РАББИЙИЗ ккарагнийи:
– РАББИ, Ахитофелин насигьят мянасузуб апӀин.
32Давуд дагъдин кӀакӀниина, душвʼин Заануриз ибадат апӀуйи, хъуркьиган, аркижви Хушай дугъан улихьинди удучӀвнийи; дугъан палат дячӀябгънайи ва кӀулʼин бишируг алабхьнайи. 33Давудди дугъаз гъапнийи:
– Эгер уву узухъди гъафиш, узуз гъагъишин хьидива. 34Хъа эгер уву шагьриз кьяляхъ хътаркиш ва Авессаломдиз гъапиш: «Узу яв гъараваш хьидиза, паччагь. Мугагьназ узу яв адашдин гъараваш вуйза, хъа гьамус узу яв гъараваш хьидиза», увхьан, Ахитофелин насигьят чӀур дапӀну, узуз кюмек апӀуз хьидивухьан. 35Увухъди душваъ Заанурин гъуллугъчйир Цадук ва Авиатар хьиди. Увуз паччагьдин гъалайиъ гъеебхьуб вари дурарикна йип. 36Дурарин кьюр бай, Цадукдин бай Ахимаац ва Авиатарин бай Юнатан, дурарихъди гьадушваъ а. Учвуз гъеебхьуб дурарикди узухьна хъадапӀай.
37Ва Давуддин дуст Хушай Ерусалимдиз, Авессалом шагьриъ учӀврайиган, хъуркьнийи.
Currently Selected:
Паччагьлугъар-2 15: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
