Паччагьлугъар-2 12
12
Натан пайгъамбри Давуд тӀанкьид апӀуру
1РАББИЙИ Давуддихьна Натан гьау. Думу дугъахьна гъафи ва гъапи:
– Саб шагьриъ кьюр адми ади гъахьну, сар – девлетлур, сар – касибур. 2Девлетлуйиз лап гизаф чарвйир ва малар ади гъахьну, 3хъа касибриз, чав масу гъадабгъу саб бицӀи марччтӀан савайи, фукӀа ади гъабхьундар. Дугъу дидин гъайгъу зигури гъахьну, ва думу дугъан бицӀидарихъди сатӀиди аьхю апӀуру. Чарвайи дугъан захʼан ипӀури, дугъан гъабраан шид убхъури, ва думу гьятта дугъан багахь дабхъну абхури гъабхьну. Думу касибриз шурак гьисаб вуйи.
4Девлетлуйихьна юлчи гъюру, хъа девлетлуйиз чахьна дуфнайи юлчийиз хураг гьязур апӀуз чан чарвйиригъян ва маларигъян фукӀа гъядябгъюз гьяйиф шулу. Дидин ерина дугъу касибрин бицӀи марчч бисуру ва дидкан чахьна дуфнайи юлчийиз хураг гьязур апӀуру.
5Давуддиз думу касдикан гизаф яманди хъял гъюру, ва дугъу Натандиз кӀуру:
– РАББИЙИИНДИ ху апӀурза: думу ляхин гъапӀу адми аьжализ лайикь ву! 6Дугъу бицӀи марччлихъ юкьубди кьимат тувну ккунду, гьаз гъапиш дугъу думу ляхин жарарин язухъвал адарди гъапӀну.
7Думуган Натанди Давуддиз гъапи:
– Думу адми уву вува! РАББИЙИ, Израилин Заанури, фу кӀураш, магьа: «Узу увкан Израилин паччагь вуди ччим ктатунза ва уву Саулихьан къутармиш гъапӀунза. 8Узу увуз яв агъайин тухум ва яв хабаз яв агъайин хпар тувунза. Узу увуз Израилин ва Ягьудайин насил тувунза. Ва гьамрар вари лапра цӀиб вуйиш, Узу увуз хъана артухъди тувидийза. 9Хъа уву РАББИЙИН гаф Дугъан уларикк писвал апӀбиинди гьаз ликрикк ккивунва? Уву хеттжви Урия туриккна гьаунва ва дугъан хпир увуз хпирди гъадагъунва. Уву думу аммунарин турихъди йивну гъакӀунва. 10Гьаддиз яв тухумдилан тур кам хьибдар, гьаз гъапиш уву Узу гьяспикк ккаундарва ва увуз хпирди хеттжви Урияйин хпир гъадагъунва».
11Гьамци кӀура РАББИЙИ: «Узу увʼин яв тухумдиан бала алапӀидиза. Яв уларикк Узу яв хпар гъадагъидиза ва жарариз тувидиза, ва думу яв хпарихъди дидкан варидиз аьгъю шлуганси даахну дахъди. 12Уву думу ляхин жиниди гъапӀунва, хъа Узу думу ляхин вари Израилин улихь ва дидкан варидиз аьгъю шлуганси апӀидиза».
13Ва Давудди Натандиз гъапи:
– Узу РАББИЙИЗ къаршу гунагь гъапӀунза.
Натанди жаваб туву:
– Ва РАББИЙИ яв думу гунагьдилан хил алдабгъну. Уву йикӀидарву. 14Амма, думу ляхин дапӀну, уву РАББИ асуллагь гьясппикк ккадрувал улупунва, гьаддиз увуз гъахьи бай кечмиш хьиди.
Давуддин балин аьжал
15Дидин кьяляхъ Натан чан хулаз гъушну. Давуддиз Урияйин хпири гъахи бицӀириз РАББИЙИ гъиву, ва думу иццру гъахьнийи. 16Давуд бицӀирин гьякьнаан Заануриз ккарагнийи. Паччагьди ушвар дисуйи ва йишвар чан хулаъ жилиин дахъну адауйи. 17Дугъан тухмин гьюрматлу яшлуйир, думу жилилан за апӀуз чарйир апӀури, дугъан багахь дийигъуйи, амма думу дурарихъ хъпехъурдайи, ва дугъу дурарихъди саб жюрейинра хураг ипӀурдайи.
18Ургудпи йигъан бицӀир кечмиш гъахьну. Давуддин гъаравашариз бицӀир кечмиш хьуваликан дугъакна пуз гучӀуйи, гьаз гъапиш дурари фикир апӀуйи: «БицӀир гьеле чӀивиди имиди, ухьу Давуддихъди гафар апӀуйхьа, амма думу ухьухъ хъпехъурдайи. БицӀир кечмиш хьуваликан дугъаз фици пидихъа? Дугъу чав чаз фу-вуш апӀуз мумкин ву».
19Давуддиз чан гъаравашари кушкушар апӀурайивал гъябкънийи, ва бицӀир кечмиш хьувалин думу гъавриъ ахънийи.
– Кечмиш гъахьнийин бицӀир? – гьерху дугъу.
– Ав, – жаваб туву дурари, – кечмиш гъахьну.
20Думуган Давуд жилилан гъудужвнийи. ДижикӀну, ицци ниъ хъайи ччимар кадатну ва палтар гьюдюхну, думу РАББИЙИН Хулаз гъушу, дугъу ибадат гъапӀу. Хъасин думу чан хулаз гъафи, ва дугъан амриинди дугъаз хураг гьиву, ва дугъу хураг гъипӀу.
21Гъаравашари паччагьдихьан гьерхнийи:
– Уву мици гьаз апӀурава? БицӀир чӀивиди имиди, уву ушвар дисуйва ва ишуйва; гьамус бицӀир кечмиш духьна, хъа уву гъудужвунва ва хураг ипӀурава!
22Дугъу жаваб тувнийи:
– БицӀир чӀивиди имиди, узу ушвар дисуйза ва ишуйза. Узу фикир апӀуйза: «Шлиз аьгъя? Белки, РАББИ узухьна рягьимлу шул, ва бицӀир чӀивиди гъузур». 23Хъа гьамус думу кечмиш духьна, хъа узу ушвар гьаз дисурухъа? Узхьан думу кьяляхъ апӀуз шулинхъа? Узу дугъахьна гъягъиди, хъа думу узухьна кьяляхъ гъидар.
Сулейман бабкан хьувал
24Хъасин Давудди чан хпир Батшева ккаарцнийи, дугъахьна гъушнийи ва дугъахъди дахънийи. Дугъак бицӀир киршнийи, ва дугъу бицӀир гъахнийи. Давудди дугъʼин Сулейман ччвур иливнийи. РАББИЙИЗ думу ккун гъахьнийи, 25ва Дугъу пайгъамбар Натан РАББИЙИН амриинди паччагьди дугъʼин Едидия (РАББИЙИЗ кьабулди вуйир) ччвур иливуз гьаънийи.
Давудди Равва гъадабгъувал
26Гьадму вахтна Юавди аммунарин меркез Раввайиз къаршуди дяви гъабхурайи ва дурарин паччагьдин гъала айи шагьур гъадабгънийи. 27Юавди Давуддихьна гьамциб хабар хьади хабарчйир гьаънийи:
– Узу Раввайихъди дяви гъапӀунза ва дидин штун тадарук гъибисунза. 28Гьаци, имбу эскрар уч апӀин, шагьур кьялаъ апӀ ва думу бис. Дархьиш, узу думу бисурза, ва думу бисувал йиз ччвурнахъ хьибди.
29Давудди вари кьушум уч гъапӀнийи, думу Раввайиина гъушнийи, дяви дапӀну, думу гъибиснийи. 30Давудди дурарин паччагьдин кӀуллан гъизилин таж алдабгънийи, таждиъ саб талант#12:30 Саб талант: тахминан 34 килограмм. гъагъ айи ва думу багьалу гъванарихъди дабалгнайи, ва Давудди думу чан кӀулʼин улубкӀнийи. Гьацира дугъу шагьриъ зурба хюрч гъибиснийи. 31Дугъу душваъ айи агьалйир адаънийи, дурар дурхнарихъди, рукьан газйирихъди ва екӀварихъди лихуз, хъа гьацира кирпичар гьязур апӀуз мажбур гъапӀнийи. Дугъу аммунарин вари шагьрариъ гьациб ляхин гъапӀнийи. Дидхъан Давуд чан вари кьушмихъди Ерусалимдиз кьяляхъ гъафнийи.
Currently Selected:
Паччагьлугъар-2 12: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
