Паччагьлугъар-4 8
8
Шунем гъулʼан вуйи дишагьлийин жил кьяляхъ апӀуб
1Чав бай чӀиви гъапӀу дишагьлийиз Элиш пайгъамбри гъапнийи:
– Яв хизан хъади гъарах ва, увхьан наан шулуш, гьадушваъ бина йив, гьаз гъапиш РАББИЙИ уьлкейиина ургуд йисан давам шлу гаш гьапӀна.
2Дишагьлийи Заанурин инсанди кӀуруганси гъапӀнийи. Хизан хъади душну, думу ургуд йисан филистимарин жилиин яшамиш гъахьнийи.
3Ургуд йислан думу филистимарин жилилан кьяляхъ гъафнийи ва чан хулар ва жил кьяляхъ тувуб ккун апӀуз паччагьдихьна гъушнийи. 4Хъа паччагьди думу вахтна Заанурин инсандин гъараваш Гиезийихъди сюгьбат гъабхуради гъахьну. Паччагьди гъапнийи:
– Элиш пайгъамбри гъапӀу вари машгьур ляхнарикан узуз кидибт.
5Гиезийи паччагьдиз, Элиш пайгъамбри дукӀнайир фици чӀиви гъапӀнуш, гьаддикан ктибтурайи. Гьадму вахтна, Элиш пайгъамбри шлин бай чӀиви гъапӀнуш, гьадму дишагьли паччагьдикан чан хулар ва жил кьяляхъ тувуб ккун апӀуз гъафнийи. Гиезийи гъапнийи:
– Магьа гьаму ву гьадму дишагьли, йиз агъа вуйи паччагь, хъа му дугъан Элиш пайгъамбри чӀиви гъапӀу бай ву.
6Паччагьди дишагьлийихьан гьерхбар-хъерхбар гъапӀнийи, дишагьлийи паччагьдиз вари ктибтнийи. Думуган паччагьди дишагьлийин ляхниз лигуз гьяким тяйин гъапӀнийи. Паччагьди гъапнийи:
– Мугъаз ади гъабхьиб вари кьяляхъ апӀин, хъа гьацира думу уьлкейиан гъушу йигълан гъийин йигъаз дугъан жилилан гъадагъу вари гъазанжарра.
Бен-Гьадад йивну йикӀуб
7Элиш пайгъамбар Дамаскдиз Арамдин паччагь Бен-Гьадад иццурайиган гъафнийи. «Мина Заанурин инсан дуфна», – хабар тувнийи паччагьдиз. 8Паччагьди Хазаилиз гъапнийи:
– Увухьди пешкеш гъадабгъ ва Заанурин инсан къаршуламиш апӀуз гъарах. Дугълантина РАББИЙИХЬАН, узу гьаму уьзрихьан сагъ шулуш, гьерх.
9Хазаил, пешкешди ягъчӀвур девейин гъагъар Дамаскдин варитӀан ужударсдар шейʼар гъадагъну, Элиш пайгъамбар къаршуламиш апӀуз гъушнийи. Думу Элиш пайгъамбрихьна гъафнийи, дугъан улихь дийигънийи, ва дугъу гъапнийи:
– Яв бай#8:9 Яв бай: му гафари пайгъамбрихьна гьюрмат улупуру. Бен-Гьададди, Арамдин паччагьди, узу увхьан, думу гьаму уьзрихьан сагъ шулуш, гьерхуз гьаъну.
10Элиш пайгъамбри гъапнийи:
– Гъарах ва дугъаз йип: «Уву чарасузди сагъ хьидива». Амма РАББИЙИ узуз гьякьикьатдиъ думу йикӀрувал ачмиш гъапӀну.
11Элиш пайгъамбар Хазаилиз, дугъаз нач хьайизкьан, ул алдадабгъри, гъилигнийи. Думуган Заанурин инсан гъишнийи.
12– Йиз агъа гьаз ишура? – гьерхнийи Хазаили.
Элиш пайгъамбри жаваб тувнийи:
– Гьаз гъапиш, уву израилариз фициб писвал апӀуруш, узуз аьгъязуз. Уву дурарин гъалйирик цӀа кипдива, дурарин жигьилар турихъди йивну йихидива, дурарин никкдихъ хъайи бицӀидар жиликан йивидива ва дурарин бицӀир кайи дишагьлийирин фунар турихъди уркидива.
13Хазаили гъапнийи:
– Анжагъ хутӀан дару яв гъаравашдихьан гьадмукьан аьхю ляхин апӀуз хьибдин?
– Уву Арамдин паччагь шлувал РАББИЙИ узуз ашкар гъапӀну, – жаваб тувнийи Элиш пайгъамбри.
14Думуган Хазаил Элиш пайгъамбрихьан гъушнийи ва чан агъайихьна гъафнийи. Бен-Гьададди гьерхнийи:
– Фу гъапунвуз Элишди?
Хазаили жаваб тувнийи:
– Дугъу узуз уву чарасузди сагъ хьиди гъапну.
15Хъайигъан Хазаили леэф штухъди кьяши гъапӀнийи ва дидихъди паччагьдин маш элебкнийи. Паччагь гъакӀнийи. Хъа Хазаил дугъан йишвʼин паччагь гъахьнийи.
Ягьудайин паччагь Ярам
16Ахавдин бай Юрам паччагьди Израилиъ паччагьвал апӀбан хьудпи йисан, Ярам Ягьудайиъ паччагьвал апӀуз хъюгънийи. Гьеле дугъан адаш Югьушафат Ягьудайин паччагьди имийи. 17Паччагь шлуган, Ярамдин сумчӀурна кьюд йис вуйи, ва дугъу Ерусалимдиъ миржид йисан паччагьвал гъапӀнийи. 18Думу, Ахавдин тухумдихъан мисал гъадабгъну, Израилин паччгьарин рякъюъди гъушнийи, гьаз гъапиш Ахавдин риш чаз хпирди гъадагънийи. Дугъу РАББИЙИН уларикк писвал апӀуйи. 19Амма Чан гъараваш Давуддин гьюрматназ РАББИЙИЗ Ягьуда талаф апӀуз ккунди адайи. РАББИЙИ Давуддиз дугъан насларин гамдигъ цӀа уьбхюз гаф тувнийи.
20Ярамдин вахтари Эдум уьлкейин халкь Ягьудайи идара апӀбаз къаршуди удубчӀвнийи, душваъ дурари чпиз паччагь дерккнийи. 21Думуган Ярам чан вари дявдин фургънар хъади Цаир шагьриз гъушнийи. Эдумари думу душваъ кьялаъ аънийи. Йишвну Ярам эдумарин дявдин фургънариин алархьнийи. Амма Ярамдин кьушум хулаз гьебгнийи. 22Гьамусра#8:22 Гьамусра: китаб гъибикӀу вахтнакан кӀура. Эдум уьлке Ягьудайин идара апӀбаз мютӀюгъ дубхьнадар. Гьадму саб вахтна Ливна шагьур Ягьудайиз къаршуди удубчӀвнийи.
23Ярамди паччагьвал гъапӀу вахтнан гьядисйирикан ва дугъан ляхнарикан «Ягьудайин паччгьарин тарихарин китабдиъ» дибикӀна. 24Ярам чан архйирихъди архаин гъахьну ва Давуддин Шагьриъ накьвдик кивну. Ярамдин бай Ахазия дугъан кьяляхъ паччагь гъахьну.
Ягьудайин паччагь Ахазия
25Ахавдин бай Юрамди Израилиъ паччагьвал апӀурайи йицӀикьюдпи йисан Ягьудайиъ Ярамдин бай Ахазияйи паччагьвал апӀуз хъюгънийи. 26Учв паччагь шлуган, Ахазияйин къанна кьюд йис вуйи, ва дугъу Ерусалимдиъ сад йисан паччагьвал гъапӀнийи. Дугъан дадайиз Аталия кӀуйи, думу Израилин паччагь Омрийин худул вуйи. 27Ахазия Ахавдин тухумдин рякъюъди гъягъюйи. Дугъу, Ахавдин тухумдихъан нумуна гъадабгъну, РАББИЙИН уларикк писвал апӀуйи, дугъу Ахавдин риш чаз хпирди гъадагънийи аьхир.
28Ахавдин бай Юрамдихъди Ахазия Арамдин паччагь Хазаилихъди дяви апӀуз Галаад вилаятдин Рамот шагьриккна гъягъюйи. Арамари Юрамдиз зийнар гъапӀнийи. 29Юрам паччагь, Арамдин паччагь Хазаилихъди Рамотдикк дявдиъ чаз гъапӀу зийнар сагъ апӀбан бадали, Изреелиз кьяляхъ гъафнийи.
Ярамдин бай, Ягьудайин паччагь Ахазияра, зийнар духьнайи Юрамдиин, Ахавдин балʼин, улуркьуз Изреелиз гъушнийи.
Currently Selected:
Паччагьлугъар-4 8: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
