Паччагьлугъар-4 5
5
Нааман гъидкьин уьзрихьан сагъ апӀуб
1Нааман Арамдин паччагьдин кьушмин аьхюр вуйи. Чан агъайин улихь думу машгьур ва гьюрмат айи инсан вуйи, гьаз гъапиш дугълантина РАББИЙИ Арамдиз гъалибвал тувуйи. Думу дирбаш эскер вуйи, амма дугъак гъидкьин уьзур кайи.
2Арамарин дестйири алжагъбарикан сабдиъ Израилиъ бицӀи риш йисирвализ гъидиснийи. Дугъу Наамандин хпириз гъуллугъ апӀурайи. 3Дугъу чан агъа дишагьлийиз гъапнийи:
– Йиз агъа Наамандихьан Самарияйиъ айи пайгъамбар рякъюз гъахьнийиш! Дугъу думу гъидкьин уьзрихьан сагъ апӀидийи.
4Нааман чан агъайихьна гъушнийи ва Израилиан вуйи шуру гъапиб дугъакна гъапнийи.
5– Гьелбетда, гъарах. Узу Израилин паччагьдиз кагъаз бикӀидиза, – жаваб тувнийи Арамдин паччагьди.
Ва Нааман, чахьди йицӀуб талант#5:5 ЙицӀуб талант: тахминан 340 килограмм. арснан, йирхьуд агъзур шекел#5:5 Йирхьуд агъзур шекел: тахминан 70 килограмм. гъизил ва йицӀуб раж палтар гъадагъну, гъушнийи. 6Дугъу Израилин паччагьдиз гъабхи кагъзиъ дибикӀнайи: «Гьаму кагъаз увухьна гъурубкьиган, аьгъю йибхь: узу увухьна йиз гъараваш Нааман уву думу гъидкьин уьзрихьан сагъ апӀбан бадали гъаъназа».
7Израилин паччагь, думу кагъаз гъубхиган, чан палтар дячӀяргъну, дерднак кахънийи. Дугъу гъапнийи:
– ЙикӀуз ва чӀиви апӀуз мегер узу Заанур вуйин? Гъидкьин уьзрихьан сагъ апӀуз дугъу узухьна гьаз гьаъра? Лигай, думу узухъди гъалмагъал ккебгъуз чалишмиш шула!
8Заанурин инсан вуйи Элиш пайгъамбриз Израилин паччагь дерднак кахънайиваликан гъеебхьиган, дугъу паччагьдиз гьамци пуз гьаънийи:
– Гьаз уву дерднак кахънава? Гьадму инсан узухьна гьаъ, ва дугъаз Израилиъ пайгъамбар айивал аьгъю хьибди.
9Нааман гьяйвнариинди ва дявдин фургънар хъади гъафнийи ва Элиш пайгъамбрин хуларин раккнихь дийигънийи. 10Элиш пайгъамбри дугъахьна гьамци пуз чархачи гьаънийи:
– Гъарах, ургуб ражну Ярдан нирик жикӀ, яв жандак сагъ хьибди ва уву марцц хьидива.
11Амма Наамандик хъял кубчӀвнийи ва, гьамци кӀури, гъушнийи:
– Узу фикир апӀуйза: «пайгъамбар узухьна чарасуз удучӀвиди, дийигъиди, чан Заанур вуйи РАББИЙИЗ ккарагиди, иццрушвлан хил алдатиди ва гъидкьин уьзрихьан узу сагъ апӀиди». 12Дамаск шагьрин багагь хьайи нирар Амана ва Парпар Израилин вари штартӀан ужудар даринхъа? Марцц хьпан бадали, узхьан думу нирарик жикӀуз шулдайинхъа?
Думу кьяляхъ илдицнийи ва хъял кади гъушнийи. 13Наамандин гъаравашар дугъан багахьна гъафнийи ва гъапнийи:
– Агъа, эгер пайгъамбри саб фу-вуш зурба ляхин апӀин гъапнийиш, уву думу ляхин апӀидайвахъа? Хъа дугъу увуз варина-вари гъапну: «ЖикӀ ва марцц хьидива».
14Думуган Нааман гъушнийи ва, Заанурин инсанди чаз гъапиганси, ургуб ражну Ярдан нирик кахънийи, ва дугъан жандак, бабкан духьну имбу бицӀиринси, марцц гъабхьнийи. 15Нааман чан дестера хъади Заанурин инсандихьна кьяляхъ гъафнийи. Дугъу, пайгъамбрин улихь дийигъну, гъапнийи:
– Гьамус узуз аьгъязуз: вари дюнʼяйиъ жара Заанур адар, Израилин ЗаануртӀан. Хъа гьамус, ккун апӀурза, яв гъаравашдихьан пешкеш кьабул апӀин.
16Пайгъамбри жаваб тувнийи:
– Узу гъуллугъ апӀурайи РАББИЙИИНДИ ху апӀурза, узу фукӀа кьабул апӀидарза.
Думу разивалихъна хуз Нааман фукьан чалишмиш гъахьнушра, пайгъамбри кӀул ккивундайи.
17Нааманди гъапнийи:
– Эгер уву пешкеш кьабул апӀурдарш, ккун апӀурза увкан: узуз, яв гъаравашдиз, саб жут гъятрари гъабхуз шлубкьан руг туври, гьаз гъапиш узу сарун РАББИЙИЗ дарди, сар заануризра гъурбнар апӀидарза. 18Гъит, РАББИЙИ узлан саб ляхнин хил алдабгъри: йиз паччагьди, чав бут Риммондин ибадатханайиъ ибадат апӀбан бадали учӀвруган, йиз хилхъан бисуру. Ва узура ибадат апӀурза. Узу бут Риммондин ибадатханайиъ ибадат апӀруган, гъит РАББИЙИ узлан дици апӀбан хил алдабгъри.
19– Ислягьвалиинди гъарах, – гъапнийи Элиш пайгъамбри.
Гиезийиз гъидкьин уьзур кивбиинди жаза тувуб
Нааман саб кьадар манзилназ гъушган, 20Заанурин инсан вуйи Элиш пайгъамбрин гъараваш Гиезийи чав чаз гъапнийи: «Йиз агъайи гьаму арамжви Нааман лап гизаф рягьятди, саб жюрейинра пешкешар дидрисди, деетну. РАББИЙИИНДИ ху апӀурза, узу дугъахъ жаргъури хъчӀарккидиза ва дугъхьан фу-вуш бисидиза». 21Гиезий Наамандихъ хъчӀарккнийи. Чахьна Гиезий жаргъури гъяркъиган, думу къаршуламиш апӀуз Нааман фургъниан эдеънийи.
– Вари сагъ-саламатди вуйин? – гьерхнийи дугъу.
22Гиезийи жаваб тувнийи:
– Вари сагъ-саламатди ву. Йиз агъайи узу гьамци пуз гьаъну: «Ефраимдин тепйирилан узухьна кьюр урхрур гъафну. Ккун апӀурза увкан, дурариз саб талант#5:22 Саб талант: тахминан 34 килограмм. арс ва кьюб раж палтар ча».
23– Гьелбетда! Гъадагъ кьюб талант, – гъапнийи Нааманди.
Дугъу Гиезий кьюб шишлиъди кьюб талант арс, кьюб раж палтарра хъади гъадагъуз разивалихъна гъахнийи. Нааманди шишлар чан кьюр гъаравашдихьна тувнийи, ва дурари шишлар Гиезийин улихьди гъурхнийи. 24Тепейиина хъуркьиган, Гиезийи шишлар гъаравашарихьан гъидиснийи ва чан хулазди дивнийи. Гиезийи Наамандин гъаравашар деетнийи, ва дурар гъушнийи. 25Хъасин думу чан агъа Элиш пайгъамбрихьна гъушнийи ва дугъан улихь дийигънийи.
– Уву наан айва, Гиезий? – гьерхнийи Элиш пайгъамбри.
– Яв гъараваш наанкӀа гъушундар, – жаваб тувнийи Гиезийи.
26Амма Элиш пайгъамбри дугъаз гъапнийи:
– Уву къаршуламиш апӀуз думу инсан фургъниан эдеъруган, мегер йиз рюгь увухъди хътайкӀан? Арс бисуз ясан палтар, зейтундин гьарар, тӀумтӀин багълар, сюрйир, лижар, гъараваш жилар ясан гъараваш дишагьлийир кьабул апӀуз вахт вуйинхъа? 27Гъит, Наамандин гъидкьин уьзур увук ва яв насларик гьаргандиз кубчӀври.
Ва Гиезий Элиш пайгъамбрихьан удучӀвруган, думу гъидкьин уьзриан, йифси, лизи духьнайи.
Currently Selected:
Паччагьлугъар-4 5: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
