Паччагьлугъар-4 15
15
Ягьудайин паччагь Азария
1Израилин паччагь Юравамдин паччагьвалин къанна ургудпи йисан Ягьудайиъ Амасияйин бай Азарияйи паччагьвал апӀуз хъюгънийи. 2Паччагь шлуган, дугъан йицӀийирхьуд йис вуйи, ва дугъу Ерусалимдиъ хьцӀурна кьюд йисан паччагьвал гъапӀнийи. Дугъан дадайиз Ехулия кӀуйи, тухумдиинди думу Ерусалимдиан вуйи. 3Дугъу РАББИЙИН улариъ дюз вуйиб апӀуйи, чан адаш Амасияйиси. 4Анжагъ тепйириин гирами йишвар терг дапӀнадайи. Халкьди душвариъ гъурбнар апӀувал ва ицциб ниъ хъайи шейʼар ургувал давам апӀуйи.
5РАББИЙИ паччагьдик тап думу кечмиш хьайизкьан жазан уьзур кивнийи. Паччагь жаради вуйи хулариъ яшамиш шуйи. Ютамди, паччагьдин бали, паччагьдин гъалайиъ буйругъар тувуйи ва уьлкейин халкьдиин идара апӀуйи.
6Азарияйи паччагьвал гъапӀу вахтнан жара гьядисйирикан, дугъу гъапӀу вари ляхнарикан «Ягьудайин паччгьарин тарихарин китабдиъ» дибикӀна. 7Азария чан архйирихъди архаин гъахьнийи ва Давуддин Шагьриъ дурарин багахь накьвдик кивнийи. Дугъан кьяляхъ паччагь дугъан бай Ютам гъахьнийи.
Израилин паччагь Захария
8Ягьудайин паччагь Азарияйин паччагьвалин сумчӀурна миржидпи йисан Израилин паччагь Юравамдин бай Захария гъахьнийи. Дугъу Самарияйиъ йирхьуб вазли паччагьвал гъапӀнийи. 9Дугъу, чан абйириси, РАББИЙИН улариъ писвал апӀуйи. Думу Наватдин бай Яравамдин чав Израил ял гъапӀу гунгьарихьан гьидицурдайи.
10Явешдин бай Шаллумди Захарияйиз къаршуди жини йикьрар гъийитӀнийи. Шаллумди, вари халкьдин уларикк йивну, Захария гъакӀнийи. Дугъан ерина Шаллум паччагь гъахьнийи. 11Захарияйи паччагьвал гъапӀу вахтнан жара гьядисйирикан «Израилин паччгьарин тарихарин китабдиъ» дибикӀна. 12Гьамци тамам гъабхьну РАББИЙИ Егьуяйиз гъапи гаф: «Яв наслар Израилин тахтниин юкьубпи кьамдихъна деиди».
Израилин паччагь Шаллум
13Явешдин бай Шаллум Ягьудайин паччагь Уззияйин#15:13 Уззия: Муганаз дугъаз китабдиъ Азария кӀуйи (лиг 4 Пачч. 14:21). паччагьвалин сумчӀурна урчӀвудпи йисан паччагь гъахьну. Дугъу Самарияйиъ саб вазли паччагьвал гъапӀну. 14Тирца шагьриан Самарияйиз Гадияйин бай Менахем гъафнийи. Дугъу Явешдин бай Шаллумдиз Самарияйиъ гъивнийи, думу гъакӀнийи ва дугъан ерина учв паччагь гъахьнийи.
15Шаллумди паччагьвал гъапӀу вахтнан жара гьядисйирикан ва дугъу гъийитӀу жини йикьрарикан «Израилин паччгьарин тарихарин китабдиъ» дибикӀна.
16Думу вахтна Менахем, Тирцайиан удучӀвну, Тифсах шагьриин ва дидин гъирагъарихъ хъайидариин варидариин алархьнийи, гьаз гъапиш дурари дугъаз шагьрин урнар арццуз кӀул ккивундайи. Дугъу Тифсахдиъ вари бицӀир кайи дишагьлийирин фунар турихъди гъурккнийи.
Израилин паччагь Менахем
17Ягьудайин паччагь Уззияйин паччагьвалин сумчӀурна урчӀвудпи йисан Израилин паччагь Гадияйин бай Менахем гъахьнийи. Дугъу Самарияйиъ йицӀуд йисан паччагьвал гъапӀнийи. 18Дугъу РАББИЙИН улариъ писвал апӀуйи. Чав паччагьвал гъапӀу вари йигъари думу Наватдин бай Яравамдин чав Израил ял гъапӀу гунгьарихьан гьидицундайи.
19Думуган уьлкейиъ Ашурдин паччагь Пулл#15:19 Пулл: дугъаз гьацира Тиглат-Паласар кӀуру (лиг 4 Пачч. 15:29). архьнийи. Менахемди, паччагьлугъдиин чан гьюкум мюгькам апӀбаъ дугъу кюмек апӀбан бадали, дугъаз агъзур талант#15:19 Агъзур талант: тахминан 34 тонндихьна. арс тувнийи. 20Менахемди думу пул Израиликан ктабгънийи. Гьарсар девлетлу инсан, Ашурдин паччагьдиз тувбан бадали, хьцӀур шекел#15:20 ХьцӀур шекел: тахминан гьацӀ килограмм. арс хуз буржлу вуйи. Думуган Ашурдин паччагь кьяляхъ гъушнийи, Израилиъ гъузундайи.
21Менахемди паччагьвал гъапӀу вахтнан жара гьядисйирикан ва дугъу гъапӀу вари ляхнарикан «Израилин паччгьарин тарихарин китабдиъ» дибикӀна. 22Менахем чан архйирихъди архаин гъахьнийи. Дугъан ерина паччагь дугъан бай Пекахия гъахьнийи.
Израилин паччагь Пекахия
23Ягьудайин паччагь Уззияйин паччагьвалин хьцӀурпи йисан Израилин паччагь Менахемдин бай Пекахия гъахьнийи. Дугъу Самарияйиъ кьюд йисан паччагьвал гъапӀнийи. 24Пекахияйи РАББИЙИН улариъ писвал апӀуйи. Думу Наватдин бай Яравамдин чав Израил ял гъапӀу гунгьарихьан гьидицундайи. 25Пекахияйин гъуллугъчи Пекахди, Ремалияйин бали, дугъаз къаршу жини йикьрар гъийитӀнийи. Чахъди хьцӀур инсан Галааддиан вуйидар гъадагъну, Аргувдихъди ва Арʼейихъди сатӀиди Самарияйиъ паччагьдин гъалайиъ думу Пекахияйиин алархьнийи. Пекахди Пекахия йивну гъакӀнийи, ва думу дугъан ерина паччагь гъахьнийи.
26Пекахияйи паччагьвал гъапӀу вахтнан жара гьядисйирикан ва дугъу гъапӀу вари ляхнарикан «Израилин паччгьарин тарихарин китабдиъ» дибикӀна.
Израилин паччагь Пеках
27Ягьудайин паччагь Уззияйин паччагьвалин хьцӀурна кьюдпи йисан Израилин паччагь Ремалияйин бай Пеках гъахьнийи. Дугъу Самарияйиъ къад йисан паччагьвал гъапӀнийи. 28Пекахди РАББИЙИН улариъ писвал апӀуйи. Думу Наватдин бай Яравамдин чав Израил ял гъапӀу гунгьарихьан гьидицундайи.
29Израилин паччагь Пекахдин паччагьвалин вахтна Ашурдин паччагь Тиглат-Паласар#15:29 Тиглат-Паласар: Муганайиз дугъаз Пулл кӀуйи (лиг 4 Пачч. 15:19). Израилиин алархьнийи. Ашурдин паччагьди Ийон, Авел-Бет-Мааха, Янух, Къедеш, Хацор шагьрар, Галаад, Галилея вилаятар, Нефталим тухумдин вари жил гъибиснийи. Душварин халкь Ашур уьлкейиз йисирвализ гъубхнийи. 30Элайин бай Гьушайи Ремалияйин бай Пекахдиз къаршуди жини йикьрар гъийитӀнийи. Думу паччагьдиин алархьнийи, думу йивну гъакӀнийи ва Уззияйин бай Ютамдин паччагьвалин къадпи йисан Пекахдин ерина паччагь гъахьнийи.
31Пекахди паччагьвал гъапӀу вахтнан жара гьядисйирикан ва дугъу гъапӀу вари ляхнарикан «Израилин паччгьарин тарихарин китабдиъ» дибикӀна.
Ягьудайин паччагь Ютам
32Израилин паччагь Пекахдин, Ремалияйин балин, паччагьвалин кьюдпи йисан Уззияйин бай Ютам Ягьудайиъ паччагьвал апӀуз хъюгънийи. 33Паччагь шлуган, дугъан къанна хьуд йис яш вуйи. Дугъу Ерусалимдиъ йицӀийирхьуд йисан паччагьвал гъапӀнийи. Дугъан дадайиз Еруша кӀуйи, думу Цадукдин риш вуйи. 34Дугъу РАББИЙИН улариъ дюз вуйиб апӀуйи, чан адаш Уззияйиси. 35Анжагъ тепйириин гирами йишвар терг дапӀнадайи. Халкьди душвариъ гъурбнар апӀувал ва ицци ниъ хъайи шейʼар ургувал давам апӀуйи. Ютамди РАББИЙИН Хулан Заан урнар тикмиш гъапӀнийи.
36Ютамди паччагьвал гъапӀу вахтнан жара гьядисйирикан ва дугъу гъапӀу вари ляхнарикан «Ягьудайин паччгьарин тарихарин китабдиъ» дибикӀна. 37Ютамдин паччагьвалин вахтна РАББИЙИ Ягьудайиз къаршуди Арамдин паччагь Рецин ва Ремалияйин бай Пеках гьауз хъюгънийи. 38Ютам чан архйирихъди архаин гъахьнийи ва чан арха Давуддин Шагьриъ дурарин багахь накьвдик кивнийи. Хъа дугъан бай Ахаз дугъан ерина паччагь гъахьнийи.
Currently Selected:
Паччагьлугъар-4 15: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
