Коринф-2 4

Рюгьнан хазна

1Му гъуллугъ учуз Аллагьди Чан ужувлиинди тувнайиб ву ва юкӀв дар гъабхьундарич. 2Учу нач шлу, намус ктру ляхнар тина апӀурача. Учу сабанра аьмалдар тӀулар ва Аллагьдин гаф дацӀабкну апӀдарча. Учу гьякьнакан хабар дебккрача, ва гъит гьарсар касди, чан намусназ дилигну, Аллагьдин улихь учуз кьимат туври. 3Эгер учу туврайи Хабар шлихьна рубкьурадарш, думу аьжалихьна гъягъюрайихьна рубкьурадар. 4Гьаму дюнʼяйин аллагь-иблисди хътругърударин фагьум, Чаъ Аллагь ачмиш апӀурайи Месигьдин адлуваликан вуйи Ужувлан хабарнан акв дярябкъюз, кур апӀура. 5Учу ичуб ктибтури адарча, хъа Иса Месигь Агъайин Хабар ктибтурача, ва Месигь бадали ичв гъуллугънаъ айидар вуча. 6Гьаз гъапиш «МучӀушнаан, гъит, акв удубчӀври», – гъапи Аллагьди, Иса Месигьдин машниин рябкъюрайи Аллагьдин аднакан аьгъювалар туври, ич юкӀвар аку апӀура.

7Учу гьамциб хазна ругдин гъабариъси, уьбхюрача. Му ккудудубкӀру кьувват, ич ваъ, хъа Аллагьдин вуйиб улупурача. 8Вари терефарихъанди учу чӀюркьюра, амма дюргънадарча. Учу миж кимдру гьялнаъ ача, амма умуд кадабтӀнадарич. 9Учухъ хъергри шулу, амма улʼан идитнадарчу. Бегьем дурччвначу, амма йивну дукӀнадар. 10Исайин уьмур учуъ арайиз гъюбан бадали, Дугъан аьжал гьаммишан ич бедендиъ айич. 11Учу чӀивидимиди Исайилантина гьарган аьжализ туврачу. Исайин уьмур ич аьжал хъайи жанариз гъюбан бадали аьжалин улихь дийигънача. 12Уьмри учвуъ чан ляхин тамам апӀбан бадали, аьжали учуъ чан ляхин апӀура.

13Учуъ хъугъвалин рюгь айиган, «Узу хъугъунза ва кӀурира аза» дибикӀнайиси, учу хъугърача ва гьаддиз кӀурира ача. 14Учуз аьгъячуз: Агъа Иса Месигь чӀиви ГъапӀури, Исаси учура чӀиви апӀиди ва учвухъди сабси учура Чан улихь дерккди. 15Му вари, артухътӀан артухъ инсанар ужувлакк ккаърайи ужʼвали Аллагьдин адлувализ хъана артухъ чухсагъул пубан бадали, учвуз вуйи ужʼвал ву.

16Гьаддиз учу ккагънадарчу. Гьеле учу ликрилан алдахънашра, хъа айтӀан йигълан-йигъаз таза шулача. 17Фицики ич пчӀу ва вахтназтӀан дару аьзабари учуз артухъ ва гьаммишандиз вуйи адлувал хура. 18Учу рябкърубдиз лигурадарча, хъа – дярябкърубдиз, гьаз гъапиш улариз рябкъруб вахтназтӀан дар, хъа дярябкърайиб – гьаммишандиз.

Currently Selected:

Коринф-2 4: ТабГК

Highlight

Copy