Паччагьлугъар-1 5
5
Заанурин сундух – филистимарихь
1Заанурин сундух тадабгъган, филистимари думу Эвен-Эзериан Ашдоддиз гъабхнийи. 2Душваъ дурари думу Дагон кӀуру чпин бутдин#5:2 Бут: думу гъвандикан, металликан, ясана гакӀвликан ктапӀуйи. Дурар заанурарси гьисаб апӀуйи, дурариз ибадат апӀуйи. хулаъ Дагон кӀуру бутдин багахь дивнийи. 3Хъайигъан гвачӀнинган Ашдоддин агьалйириз Дагон кӀуру бут РАББИЙИН сундхин улихь жилиин маш исизди дабхънади рябкъюру. Дурари думу за гъапӀну ва мугагьназ али йишвʼин дивну. 4Хъайигъан гвачӀнинган Дагон кӀуру бут РАББИЙИН сундхин улихь жилиин маш исизди дабхънади гъабхьну, хъа Дагондин кӀул алдабтӀну, ва тӀубарихъан хилар хъадатӀну, гурзлиин дахьнади гъахьну; Дагондин жандактӀан имдайи. 5Гьаддиз гъира#5:5 Гъира: китаб гъибикӀу вахтнакан кӀура. Дагондин гъуллугъчйири ва Дагондин хулаъ учӀврудари вариди Ашдоддиъ айи Дагондин хулан гурзлиин ликар дивурдар.
6РАББИЙИ Ашдоддин агьалйириин Чан гъагъи хил иливну; пис гучӀ кабхъну дурарик. Шагьрин ва дидин гъирагъарин агьалйирик Дугъу кесмейинсдар аьмгълар каъну. 7Шулайиб дябкъну, Ашдоддин агьалйири къарар адабгъуру:
– Израилин Заанурин сундух ухьухь гъубзну ккундар! Ухьуз, ихь гирами бут Дагондиз гъиву Дугъан хил гъагъиб ву!
8Дурари чпихьна вари филистим гьюкумдрариз дих апӀуру, ва дурар гьюкумдрарихьна илтӀикӀуру:
– Учу Израилин Заанурин сундхикан гьапӀча?
Дурари жаваб тувну:
– Израилин Заанурин сундух Гъат кӀуру шагьриз хъадапӀри.
Ва дурари Израилин Заанурин сундух дина гъубху. 9Думу дина гъабхиган, РАББИЙИ шагьриин Чан хил иливу, ва инсанарик зурба гучӀ кабхъу. РАББИЙИ, бицӀирихъан аьхюрихъна, вари инсанарик уьзур киву: дурар вари кесмейинсдар аьмгъларин аьзиятнакк ккахъу. 10Думуган Заанурин сундух Экрондиз хътапӀу. Думу дина хъубкьубси, Экрондин агьалйир дишлади ишуз хъюгъю:
– Учу, ич вари халкь тӀанкь апӀуз мина Израилин Заанурин сундух гъабхну!
11Дурари вари филистим гьюкумдрариз дих гъапӀу ва гъапи:
– Израилин Заанурин сундух мушвʼан хъадапӀай! Гъит думу чан йишвахьна кьяляхъ гъарабхри, дархьиш диди учу, ич вари халкь тӀанкь апӀиди.
Вари шагьриъ аьжлихьансиб гучӀ абхънийи, гьаз гъапиш дидʼин Заанурин гъагъи хил иливнайи. 12Сасдар агьалйир йикӀурайи, тмундар кесмейинсдар аьмгъларин аьзиятнакк ккайи ва, завкан чпи уьрхюб ккун апӀури, гьарйир апӀуйи.
Currently Selected:
Паччагьлугъар-1 5: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
