Паччагьлугъар-1 30
30
Амалекарихъди дяви
1Шубудпи йигъан Давуд чан эскрарихъди Циклагдиз хъуркьу. Гьаддиз улихьна амалекар Негевдиин ва Циклагдиин алархьуз хъуркьнийи. Дурари Циклаг гъибиснийи ва дидик цӀа кипнийи, 2хъасин чпин йишваз гъушнийи. Дишагьлийир ва шагьриъ гъуздар вари, бицӀирихъан аьхюрихъна, йисирвализ гъурхнийи – сарра йивну гъакӀундайи.
3Давуд ва дугъан адмийир шагьриз багахь гъахьиган, рябкъюрайиб цӀа кабхъну гъубгу йишвтӀан дайи. Хпар ва бицӀидар йисирвализ гъурхнийи.
4Давуд ва вари эскрар кьувватнаан адахъайизкьан ижмиди гъишнийи. 5Давуддин кьюрид хпарра йисирвалиъ ахънийи: Изреелиан вуйи Ахиноамра ва муганайиз Кармилиан вуйи Навалин ачӀни хпир Авигаилра. 6Давуддиз гизаф гъагъиди алабхънийи: чпин баярихъ ва шубарихъ мягьрум гъахьи эскрариз думу гъвандихь гьитуз ккун дубхьнайи. Амма Давуддиз РАББИЙИЪ, чан Заануриъ, даягъ гъибихъу 7ва дугъу Заанурин гъуллугъчи Авиатариз, Ахимелехдин бализ, гъапи:
– Узухьна, тупут гьипбан бадали, улгьани#30:7 Улгьани: Заанурин гъуллугъчийи алабхьрударикан саб. Заанурин аьхюну гъуллугъчийин улгьанийиъ кьюб гирами гъван ади гъахьну. РАББИЙИН амур аьгъю апӀбан бадали, думу гъванарихъди тупут гьипри гъахьну. абкъин.
Авиатари дугъахьна улгьани гъабхи. 8Давудди РАББИЙИХЬАН гьерху:
– Узу дурарин дестейихъ хъергуб лазим вуйин? Узхьан дурарихъ хъуркьуз хьибдин?
РАББИЙИ жаваб туву:
– Гъарах. Уву дурарихъ хъуркьидива ва яв вуйиб кьяляхъ апӀидива.
9Давуд йирхьудварж касдикан ибарат вуйи кьушмихъди рякъюъ учӀву, ва, Бесор гъярихъна хъуркьган, дугъу душвахь саб пай эскрар гъиту. 10Бесор гъяркан ктучӀвуз кьувват адру кьюдварж адми душвахь гъузу. Давуд кӀули ади, юкьудварж адмийи хъергувал давам гъапӀу.
11ИчӀи чюлиъ дурариз египетлу алахъу. Думу Давуддихьна хъади гъафи, ипӀруб ва шид туву. 12Дугъаз сацӀиб гъеебццу инжил ва кишмиш кайи кьюб лаваш туву. ДипӀну, египетлу чан амриз гъафи: шубуб суткайиъ дугъу я гъипӀундайи, я шид гъубхъундайи аьхир. 13Давуд дугъхьан гьерхбар-хъерхбар апӀуз хъюгъю:
– Уву шлин ва наънан вува?
– Узу Египетдиан, сар амалекжвуван лукӀ вуза. Узу иццру гъахьиган, шубуд йигъ улихьна эйсийи узу гатӀархьну. 14Негевдиин, керетарин, Ягьудайин ва Калевдин ругариин алжагъдар ва Циклагдик цӀа кипдар учу вуча.
15Давудди гьерху:
– Ичв десте фици абгуруш, узуз улупидива?
– Анжагъ, – жаваб туву египетлуйи, – узу йивну диликӀуз ва эйсийихьна кьяляхъ дарапӀуз узуз Заануриинди ху апӀин. Гьадмуган улупидиза.
16Ва египетлуйи Давуд дурар хьайишвахьна хъади гъушу. Давуддиз дурар, филистимарин уьлкейиъ ва Ягьудайиъ гъибису девлетлу хючан машквар апӀури, ипӀури, убхъури, вари хутӀил вуйибси дараргъну гъябкъю. 17ГвачӀниндин акв алабхьру вахтна Давуд дурариин алархьу, ва дугъу дурар хябяхъдизкьан тӀанкь апӀури гъахьи. Саркьан чӀивиди гъитундар, анжагъ юкьудварж адми девйириинди гьергу. 18Амалекари гъибисуб вари, гьадму гьисабнаан чан кьюр хпирра, дугъу кьяляхъ гъапӀу. 19Вари йисирар, бицӀирихъан аьхюрихъна, баярра, шубарра къутармиш гъахьи; амалекари тӀараш гъапӀу вари девлетра Давудди кьяляхъ гъапӀу. 20Дугъу гьацира марччарин ва хюнйирин лижар гъидису. «Магьа Давуддин хюч!» кӀури, эскрари лижан улихь хьайи мал-къара хъапӀрайи.
21Давуд хъергувал давам апӀуз дархьи ва Бесор гъярихъ гъузу кьюдварж эскрихьна гъафи. Дурар Давуддин ва дугъан дестейин улихьна удучӀву. Багахь гъахьиган, Давудди дурариз салам туву. 22Думуган Давуддихъди гъушдарин арайиъ «Дурари ухьухъди сатӀиди дяви гъапӀундар, гьаддиз ухьу гъибису хюрчкан дурариз фукӀа тувидархьа. Гъит чпин хпар ва бицӀидар гъадагъри ва гъарахри» кӀуру мердимазарарра алчгъарра гъахьнийи.
23Амма Давудди гъапи:
– Чвйир, дици мапӀанай: гьаму хюч ухьуз РАББИЙИ пешкеш гъапӀну аьхир! Гьадгъу ухьу гъюрхну ва ухьʼин алархьдар ихь хилариз тувну. 24Учвухъди рази хьуз фици шул? Аьрабйирихъди гъузурира дяви гъапӀурисиб пай гъадабгъиди. Варидигъна сабси пай апӀидихьа!
25Гьаддихъанмина гьамусдизкьан#30:25 Гьамусдизкьан: китаб гъибикӀу вахтнакан кӀура. думу Израилиъ дигиш даршлу къанун дубхьна.
26Циклагдиз гъафиган, Давудди хючан пай ягьударин аьхюдариз, чан дустариз, дурарикна «Магьа РАББИЙИН душмнарихьан тадабгъу хючкан учвуз пешкеш» гафар пуз амур дапӀну, хътапӀу.
27Дугъу пешкешар Бетулиз, Рамот-Негевдиз, Яттирдиз, 28Ароэриз, Сифмотдиз, Эштемоайиз, 29Ракализ, Ерахмеэлин шагьрариз, кенеярин шагьрариз, 30Хормайиз, Бор-Ашандиз, Атахдиз, 31Хеврундиз – Давуд ва дугъан адмийир учӀву вари гъулариз хътау.
Currently Selected:
Паччагьлугъар-1 30: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
