Паччагьлугъар-1 27

Давуд филистимарин уьлкейиъ

1Давудди фикир гъапӀу: «Ухди вая кьанди узу Саулиз ккахъди. Филистимарин уьлкейиз гьергубтӀан, узуз фукӀа гъубзрадар. Думуган дугъан умуд ктабтӀиди, вари Израилиъ узу агувал дипди, ва узу дугъхьан къутармиш хьидиза».

2Ва Давуд йирхьудварж касдикан ибарат вуйи чан дестейихъди Ахишдихьна, Маохдин балихьна, Гъатдин паччагьдихьна, гъушу. 3Давуд ва дугъан адмийир Ахишдихь Гъатдиъ ерлешмиш гъахьи. Дурар вари чпин хизанар хъади гъафнийи; Давуддихъди чан кьюр хпир хъайи: Изреелиан вуйи Ахиноам ва Кармилиан вуйи Навалин ачӀни шив Авигаил. 4Давуд Гъатдиз гьергувал Саулиз аьгъю гъабхьи, ва дугъу думу агувал дебкку.

5Давудди Ахишдиз гъапи:

– Узухьна рягьимлу йихь, узуз наан-вуш аьхю дару гъулаъ ерлешмиш хьуз ихтияр тув. Узуз, яв лукӀраз, паччагьдин меркездиъ, яв багахь яшамиш хьуб фтиз ву?

6Ва Ахишди дугъаз Циклаг бицӀи шагьур туву. (Гъира#27:6 Гъира: китаб гъибикӀу вахтнакан кӀура. Циклаг Ягьудайин паччгьарин хусусият ву.) 7Давуд филистимарин юрднаъ варина-вари сад йисна юкьуб вазли яшамиш гъахьну.

8Давуд чан адмийирихъди гешурлуйириин, гирзеяриин ва амалекариин алжагъури гъахьну – думу халкьар ухдихъанмина тап Шурихъна ва Египетдин сяргьятдихъна вуйи ругариин яшамиш шули гъахьну. 9Давудди вари агьалйир, я жилариз, я дишагьлийириз рягьим дарапӀди, йивну йикӀури, палтар ттадагъури, марччар ва йицар, девйир ва дажйир хъаъну гъягъюри гъахьну. Гьар ражну думу Ахишдихьна кьяляхъ гъафиган, 10Ахишди гьерхри гъахьну:

– Му ражну шлиин алархьунчва?

Давудди жаваб туври гъахьну: «Негевдиан вуйи ягьудариин» вая «Негевдиан вуйи ерахмеэлеяриин», вая «Негевдиан вуйи кенеяриин». 11Давудди Гъатдиз йисирар хури гъахьундар, хъа, «Дурари ухьлан, магьа Давудди фу гъапӀнуш кӀури, аьрзар апӀуз мумкин ву» кӀуру фикир апӀури, вари – жиларра, дишагьлийирра – йивну йикӀури гъахьну. Филистим юрднаъ имидикьан гагьди, Давудди гьаци апӀури гъахьну, 12ва Ахишди, «Думу Израилин чан халкьдиз лап гизаф даккун гъахьну ва гьарган йиз гъараваш хьиди» кӀуру фикир апӀури, Давуддиин ихтибар апӀуз хъюгъю.

Currently Selected:

Паччагьлугъар-1 27: ТабГК

Highlight

Copy