Петрин-1 5

Аллагьдин лиж

1Гьаци вуйиган, гьамус узу ичв аьхюдарихьна илтӀикӀураза. Даршуз узура йиз марччарин – хъугърударин аьхюр вуза. Мидлан гъайри, Месигьдикан кчӀикьу аьзабарин шагьид вуза ва, магьа, гьамус – хъа дюнʼяйиз гъиямат йигъ хьади гъюрайи Дугъан ад рубкьрударикан сар духьназа. 2Ичв ихтиярназ тувнайи Аллагьдин лиж уьбхяй, дидин гъайгъушнаъ учву буржлу вуйивалиан мишанай, хъа Аллагь ихь гъайгъушнаъ айиганси, учвура ичв аьшкьниинди гъайгъушнаъ йихьай; учвуз му дюнʼяйикан хайир ктабгъуз ккунди ваъ, хъа ичв гьякь тямягь хъайивалиинди гъайгъушнаъ йихьай; 3гьякимари Аллагьди чпин хилиъ ивнайи адмийирин зиин агъавал апӀурайиганси ваъ, хъа вари лижаз мисал вуди гъуллугънаъ шлуганси гъайгъушнаъ йихьай; 4ва, Аьхюну Марччлихъан гъафиган, гьич зат дучрубхру адлувалин кунцӀ рубкьидичвуз.

5Учвура, жигьилар, аьхюдарихъ хъпехъури апӀинай; чиб-чпин гъайгъушнаъ духьну, разивалиъ кӀул ипай, гьаз гъапиш,

«Аллагь фурсачйириз къаршу удучӀвуру,

хъа разивал улупрудариз

Думу рягьим апӀрур ву».

6Гьаддиз, Аллагьдин кьудратлу хилин улихь разивалиинди икрам апӀинай, Дугъу учвура Чан вахтна заъди. 7Ичв вари гъайгъушнар Гьадгъуин иличай – Думу ичв гъайгъушнаъ а!

8Ичв фагьмихъ гъузай, мааханай! Учвуз къаршу вуйир, иблис, гашу удубтӀнайи асланси, учвкан хътӀюкьюз ужур агури либцура.

9Учву ичв мюгькам хъугъвалиинди, дюнʼяйиъ вари ичв гъардшари учвуси гьамцдар аьзабар аьгь апӀурайиб аьгъяди, дидиз къаршу удучӀвну ккунду. 10Аммаки учвуз аьгь апӀуз сацӀибтӀан имдар! Иса Месигьдиъ сатӀиди духьну дих дапӀну, гьарсаб ужувлан булагъ айи Аллагьди Чан гьаммишандин Ад учвухъди пай апӀиди, учву дюз алаиди, ижми апӀиди, кьувватлу апӀиди, йишвʼин мюгькам апӀиди. 11Дугъан кьувват аьсрариан-аьсрариз ибшри, амин!

Аьхиримжи насигьят

12Узу гьаму бицӀи кагъаз Силван гъардшин кюмекниинди гъибикӀунза. Узуз дугъан хъугъувал ужуйи аьгъязуз. Узу му кагъаз учвуз, мушваъ улупнайиб Аллагьдин ужувлан гьякь багъиш ву, кӀури, учву рази ктаъбан бадали, гъибикӀунзачвуз. Ижмишнаан гьамдихъан хъичӀихай.

13Учвуси Аллагьди кадагънайи Вавилондиан вуйи чуччура учвуз саламар хътаура, ва гьацира – йиз бай Маркдира. 14Чиб-чпиз чвевалин масанвалин мак апӀбиинди салам туври апӀинай. Вари Месигьдиндариз, учвуз, мясляаьт ибшри!

Currently Selected:

Петрин-1 5: ТабГК

Highlight

Copy