Паччагьлугъар-3 6

Сулейманди Заанурин Хал тикмиш апӀуб

1Израилар Египетдиан удучӀвбахъан юкьудваржна миржцӀур йислан, учв паччагь хьпахъан юкьудпи йисан кьюбпи ваз вуйи Зив вазли#6:1 Ихь эрайиз улихьна тахминан 966-пи йисан хьадукра. Сулейманди РАББИЙИЗ Хал тикмиш апӀуз хъюгънийи.

2Сулейманди РАББИЙИЗ тикмиш гъапӀу Хал ярхишнаъ йирхьцӀур, яркьушнаъ къаб ва ягълишнаъ сумчӀур юкӀ#6:2 Саб юкӀ тахминан 50 см ву. Яни РАББИЙИН Хал ярхишнаъ 30 м, яркьушнаъ 10 м ва ягълишнаъ 15 м алиб вуйи. алиб вуйи. 3Асас Хулан улихь тикмиш дапӀнайи аьлава дараматдин яркьушин къаб юкӀ вуйи, Хулан яркьушназ тялукь вуди, думу Хулхьан йицӀуб юкӀниинди гьудубчӀвнайи. 4Хулан унчӀвар дугъу айитӀинди яркьу шлудар гъапӀнийи. 5РАББИЙИН Хулан вари цаларин гъирагъдихъди (Гирамишван ва Гирамидарик Гирамишван гъирагъдихъди) дугъу сабсан дарамат тикмиш гъапӀнийи. Думу дарамат дугъу хулариз пай гъапӀнийи. 6Думу дараматдин сабпи мертебайин яркьушин хьуб юкӀ вуйи, кьюбпибдин – йирхьуб, хъа шубубпибдин – ургуб юкӀ. Илирчнайи хамхрар Хулан цалариъ удручӀвбан бадали, Хулан чӀатан терефнаъ дугъу утӀурсу йишвар гъапӀнийи.

7Хал тикмиш апӀбаъ гъванарин мядандиъ ктау гъванартӀан ишлетмиш апӀурдайи, Хал тикмиш апӀрушвахь я табшвин, я гъван ктапӀру екӀвун, я рукьан жара алатдин сес ебхьурдайи.

8Аьлава дараматдин сабпи мертебайиз учӀврушв Хулан кьибла терефнаъ айи умбрариъди кьюбпи мертебайиз гъягъюз шуйи, душвʼан – шубубпибдиз. 9Гьаци дугъу Хал тикмиш гъапӀнийи ва, зиин кедрйин хамхрар ва кьулар илирчну, ккудубкӀнийи. 10Хулан вари гъирагъарихъди аьлава хулар тикмиш гъапӀнийи. Дурарикан гьарсабдин ягълишин хьуб юкӀ вуйи. Дурар кедрйин хамхрариинди Хулак китӀнайи.

11Ва магьа Сулеймандиз РАББИЙИН гаф ашкар гъабхьнийи:

12– Уву гьаму Хал тикмиш апӀурайивализ лигну, Узу кӀураза: эгер уву Йиз тяйинваларихъди гъягъюруш, Йиз къайдйир тамам апӀуруш ва Йиз вари амрар уьрхюруш ва дурар тамам апӀуруш, Узу яв адаш Давуддиз туву гаф увлантина тамам апӀидиза. 13Узу израиларин арайиъ яшамиш хьидиза ва Йиз халкь, Израил гатӀархьидарза.

14Сулейманди Хал тикмиш гъапӀнийи ва думу ккудубкӀнийи.

Заанурин Хулан айитӀишв балгуб

15Сулейманди Хулан айитӀ цаларик жилилан хамхрариккна кедрйин кьулар карснийи ва жиликк кипарисдин кьул ккабхьнийи. 16Дугъу Хулан айитӀ кьялахъ терефнаъ къаб юкӀнан йишв, душваъ Гирамидарик Гирами вуйи йишв апӀбан бадали, жилилан хамхрариккна кедрйин кьуларихъди гьадабтӀнийи. 17Гирамидарик Гирами вуйи йишван улихь хьайи хал ягъчӀвур юкӀ ярхишин алиб вуйи. 18Вари Хал айтӀан кедрйин гакӀвлихъди дабалгнайи, гакӀвлик гъарпзариз ухшар вуйидар ва адаршвнайи кюкйир адатӀнайи. Вари гакӀвликан дапӀнайиб вуйи, гъван саб йишвахьра рябкъюрдайи.

19Думу Хулаъ Гирамидарик Гирами йишв, душваъ РАББИЙИХЪДИ Йикьрарин сундух дивбан бадали, гьязур гъапӀнийи. 20Гирамидарик Гирами йишван ярхишин къаб юкӀ, яркьушин къаб юкӀ ва ягълишин къаб юкӀ вуйи. Дидин айитӀ йишв дугъу марцци гъизилихъди гъабалгнийи. Гирамидарик Гирами йишван улихь хьайи иццидар ниар хъайи шейʼар ургбан гъурбан апӀрушв кедрйин кьуларихъди гъабалгнийи. 21Сулейманди Хулан айитӀ йишв марцци гъизилихъди гъабалгнийи ва гъизилихъди дабалгнайи Гирамишвʼан Гирамидарик Гирамишваз учӀврушвахь гъизилин зунжрар керхнийи. 22Гьацира вари Хулан айитӀишв гъизилихъди гъабалгнийи. Гьацира дугъу айтӀан гирами йишвахьна дахил шулайи иццидар ниар апӀбан гъурбан апӀрушвра гъизилихъди гъабалгнийи.

23АйтӀан Гирамидарик Гирами йишваъ Сулейманди зейтундин гакӀвликан кьюб малайик-херувим ктаънийи, гьарсабдин ягълишин йицӀуб юкӀ вуйи. 24Сабпи малайикдин хлинццар гьарсаб хьуб юкӀ ярхишин алидар вуйи. Саб хлинццин кӀакӀнахъан тмуну хлинццин кӀакӀнахъна йицӀуб юкӀ алийи. 25Тмуну малайикра йицӀуб юкӀ алиб вуйи. Гьаци, кьюбиб малайикарра саб кьадарнандар ва рябкъювалиндар вуйи. 26Гьарсаб малайикдин ягълишин йицӀуб юкӀ вуйи. 27Дугъу хлинццар гьатӀарццнайи думу малайикар Гирамидарик Гирами йишваъ дивнийи. Саб малайикдин хлинцц саб цалик кубкӀуйи, кьюбпибдин хлинцц – гъаншариъ айи тмуну цалик, хъа малайикарин тмуну хлинццар Хулан гьацӀкьялаъ чиб-чпик куркӀуйи. 28Сулейманди малайикар гъизилихъди гъабалгнийи.

29Вари Хулан (Гирамишван ва Гирамидарик Гирамишван) цалариъ дугъу малайикар-херувимар, пальмайин гьарар ва адаршвнайи кюкйир адатӀнийи. 30Гьацира дугъу Гирамишваъ ва Гирамидарик Гирамишвакк гъизил ккабхьнийи.

31Гирамидарик Гирами йишваз гъягъюз дугъу зейтундин гакӀвликан хьуб мурччв али дарчар гъяйи раккнар гъапӀнийи. 32Хъа зейтундин гакӀвликан вуйи кьюб раккниъ дугъу малайикар-херувимар, пальмайин гьарар ва адаршвнайи кюкйир адатӀнийи ва гъизилихъди гъабалгнийи. Хъа гьацира малайикар ва пальмайин гьарар хъана гъизилихъди гъабалгнийи. 33Дюм-дюз гьаци дугъу Гирамишваъ учӀврушвягъна зейтундин гакӀвликан юкьуб мурччвнан дарчар гъапӀнийи. 34Гьацира дугъу кипарисдин гакӀвликан кьюб раккин гъапӀнийи, гьарсаб раккнигъ арццру кьюб раккин гъяйи. 35Дугъу думу раккнариъ малайикар-херувимар, пальмайин гьарар ва адаршвнайи кюкйир адатӀнийи ва дурар сакӀалди гъизилихъди гъабалгнийи.

36Дугъу айтӀан гьяят, кадаънайи гъванарин шубуб жергейиин, кедрйин саб жерге хамхрар иливури, тикмиш гъапӀнийи.

37РАББИЙИН Хулан шибритӀ Сулеймандин паччагьлугъвалин юкьудпи йисан зив кӀуру вазли дивнийи. 38ЙицӀисадпи йисан миржибпиб вуйи вул кӀуру вазли Хал тикмиш апӀувал, дугъу кьаст гъапӀганси, тамамди ккудубкӀнийи. Сулейманди РАББИЙИН Хал ургуд йисан тикмиш гъапӀнийи.

Currently Selected:

Паччагьлугъар-3 6: ТабГК

Highlight

Copy