Югьандин-1 4

Гьякьвалин ва кучӀлин рюгь

1Йиз ккунидар, фунуб рюгьнахъ вушра, яна адмийихъ мехъебехъанай. Хъа дурар Аллагьдихьан вуйин – дарин, гьарган ахтармиш апӀури йихьай, фицики дюнʼяйиз бегьем кучӀлин пайгъамбрар ачмиш духьна.

2Магьа фици Аллагьдихьан вуйи Рюгь аьгъю апӀуз шулуш: Иса Месигь Аллагьдихьан жилиина инсандин суратнаъди гъафну, кӀуру гьарсар рюгь Аллагьдихьан вуйир ву. 3Хъа Иса кьабул дарапӀру рюгь – думу Аллагьдихьан вуйир дар. Мицдари Месигьдиз Къаршур рази ктаура. Къаршур гъиди, кӀури, учвуз деебхьнайчвуз ва магьа думу сарун му дюнʼяйиъ а.

4Йиз веледар, учву Аллагьдиндар вучва, кучӀлин пайгъамбрариин гъалиб духьначва, гьаз гъапиш, учвуъ айи Аллагь му дюнʼяйин эйсивал апӀурайиртӀан кьудратлу ву. 5Ари гьадрар – му дюнʼяйиндар ву. Гьаддиз дурари кӀурайибра гьаму дюнʼяйикан ву ва дюнʼяйиндар гьадрарихъ хъпехъурира ву. 6Хъа ухьу Аллагьдиндар вухьа ва шлиз Аллагь аьгъяш, думу ухьухъ хъпехъуру. Хъа фуж Аллагьдинур дарш, ухьухъ хъпехъидар. Магьа гьамци ухьхьан гьякьвал хру Рюгь кучӀлин рюгьнахьан жара апӀуз шулу.

Аллагьдин масанвал

7Багьалу вуйи дустар, гъачай чиб-чпи ккун апӀухьа, гьаз гъапиш масанвал Аллагьдихьан гъюрайиб ву. Масанвал айи гьарсар касди гьаци апӀуру, гьаз гъапиш думу Аллагьдин веледарикан сар гъахьну ва Аллагь дугъаз аьгъя.

8Шлиъ ккунивал адарш, дугъаз Аллагь аьгъдар, фицики Аллагь Учв масанвал ву. 9Магьа фици Аллагьди Чан масанвал ухьухьна улупнуш: Дугъу Чан айина-адру сар Бай, Гьадгъулантина ухьуз гьаргандин уьмур хьпан бадали, гьаму дюнʼяйиз гьаъну.

10Дугъри вуйи ккунивал, ухьу Аллагь ккун гъапӀну кӀури, гьаддиъ адар, хъа Аллагьди Чав ухьу ккун гъапӀну ва Чан Бай ухьу гъапӀу гунгьарихъанди гъурбан хьуз гьаъну – магьа гьякь вуйи ккунивал.

11Йиз ккунидар, Аллагьдиз ухьу масанди вуйиган, ухьура чиб-чпи ккун дапӀну ккунду. 12Гьич саризра Аллагь зат гъяркъюр дар, хъа эгер ухьуз сар-сар ккундуш, Аллагь ухьуъ яшамиш шула, ва Дугъан масанвал ухьуъ гьубкӀну артмиш хьибди.

13Ухьхьан, ухьу Дугъаъ ва Думу ухьуъ яшамиш шулайиб ухьухъди пай гъапӀу Гьадгъан Рюгьниинди аьгъю апӀуз шулу. 14Му вари учуз гъябкъюнчуз ва Адашди Чан Бай дюнʼя уьбхюз гьаувалин шагьидар гъахьунча. 15Эгер фуж Иса Аллагьдин Бай вуйивалихъ хъугъраш, гьадму касдиъ Аллагь яшамиш шула, ва учвра Аллагьдиъ гъузра. 16Учуз Аллагьдин ухьухьна вуйи му масанвал аьгъю гъабхьунчуз, ва думу кьабул гъапӀунча.

Аллагь – масанвал ву. Масанвали ацӀнайир Аллагьдиъ гъузра, ва Аллагьра гьадму касдиъ яшамиш шула.

17Ухьуъ бегьем гъабхьи масанвалиинди, ухьхьан гъияматдин йигъ хъугъвал алди кьабул апӀуз шулу, гьаз гъапиш гьаму дюнʼяйиъ ухьу, Месигьди фици гъапӀнуш, гьаци апӀурахьа. 18Масанвал гьич саб жюрейинра гучӀ айиб дар. ГьубкӀу масанвали гучӀ утӀубккуру. ГучӀ жазайихъди аьлакьа айиб ву, ва гучӀруриз бегьем гьубкӀу масанвал адар.

19Аллагьди ухьу сифте ккун дапӀнайиган, ухьура Думу ккун апӀурахьа. 20«Узуз Аллагь ккундузуз» кӀуруриз чан гъардаш даккунди вуш, думу кучӀлях ву, гьаз гъапиш, улариз рякъюрайи чан гъардаш даккнирихьан, улариз дярякърайи Аллагь ккун апӀуз даршул!

21Месигьди учуз гьамциб насигьят тувунчуз: Аллагь ккунири чан гъардашра ккун дапӀну ккунду.

Currently Selected:

Югьандин-1 4: ТабГК

Highlight

Copy