Югьандин-1 2

Аллагьдин цӀийи табшуругъ – масанвал

1Йиз веледар, узу му, учву гунагь дарапӀбан бадали, бикӀураза. Хъа эгер шли аьгъдарди гунагь гъапӀишра, Адашдин улихь ухьхъан гаф Йиврур хьа. Думу – Иса Месигь, дугъри Кас ву. 2Ари Гьадму гъурбан духьну, ихь гунгьариккан, неинки ихь, хъа гьацира вари дюнʼяйин гунгьариккан ккадауз Гъитур ву.

3Дугъан табшуругъар тамам апӀури гъашиш, ухьуз Аллагь дугъридан аьгъю гъахьунхьуз дупну, архаин хьуз шулухьхьан. 4Шли: «Узуз Думу аьгъязуз» кӀураш, хъа Дугъан табшуругъар тамам апӀдарш, дугъу кучӀлар апӀура ва дугъаъ гьякьвал адар. 5Хъа фуж Аллагьдин аьгъюваларихъ хъпехъураш, думу дугъриданра Аллагьдин масанвали ацӀна. Магьа гьамци ухьу Аллагьдикди кидикьнайивал аьгъю апӀуз шулу. 6Шли Аллагьдиз ккуниси яшамиш шулаза кӀураш, думу Исаси духьну ккунду.

7Йиз масан вуйи дустар, узу учвуз таза табшуругънакан бикӀурадарза, хъа – учвуз сифте бинайиан тувнайибдикан. Му кюгьне табшуругъ учвуз ухдихъанмина деебхьнайи гаф ву. 8Хъа жара терефнаан, узу учвуз бикӀурайиб, цӀийи табшуругъ ву, гьаз гъапиш, му гьякьвал Иса Месигьдин ва ичв уьмри улупура, миди мучӀушназ кьяляхъ йивура, ва гьякьвалин аквну гьамустӀанра нурар рагъура.

9Шли, чав аквнаъ аза кӀури, гъардаш ккун дапӀнадарш, думу мегьел мучӀушнаъ ами. 10Шлиз чан гъардаш ккундуш, думу аквнаъ а, ва дугъаъ фукӀара учв алдакруб хьибдар. 11Гъардаш даккнир мучӀушнаъ а. Думу мучӀушнаъ яшамиш шула ва дугъаз, учв наанди гъягъюраш, аьгъдар, фицики мучӀушну думу кур дапӀна.

12Узу учвуз, йиз ккуни веледар,

ичв гунгьарилан

Иса Месигьдилантина

хил алдабгъну, кӀури,

бикӀураза.

13Узу учвуз, абйир-бабар,

дюнʼя-бина хьайиз Айир

аьгъю гъахьунчвуз, кӀури,

бикӀураза.

Узу учвуз, жигьилар,

Писубдиин

гъалиб гъахьунчва, кӀури,

бикӀураза.

14Узу учвуз, бицӀидар,

Адаш аьгъю гъахьунчвуз, кӀури,

гъибикӀнийза.

Узу учвуз, абйир-бабар,

дюнʼя-бина хьайиз Айир

аьгъю гъахьунчвуз, кӀури,

гъибикӀнийза.

Узу учвуз, жигьилар,

кьувватлу вучва,

Аллагьдин Гаф учвуъ яшамиш шула

ва Писубдиин

гъалиб гъахьунчва, кӀури,

гъибикӀнийза.

15Му дюнʼя ва дидиъ айиб ккун мапӀанай. Эгер шлиз дюнʼяйинуб ккундуш, дугъан кӀваъ Адашдихьна вуйи масанвал адар. 16Гьаз гъапиш му дюнʼяйиъ айи варибдихъ ихь гунагькар жандин тямягь хъа. Ихь уларин тямягь хъайиб ва гьаму уьмриъ адмийири фурс ва дамах апӀурайиб вари – гьич фукӀара Адашдихьан вуйиб дар. Хъа му вари – дюнʼяйихьан ву. 17Му дюнʼя ва инсандин тямягь зибгруб – вари гъюдубчӀвну гъябгъруб ву, хъа Аллагьдин ниятар тамам апӀруризтӀан гьаргандин уьмур хьибдар.

Аьхиримжи вахтарин аллагьдин душмнар

18Баяр-шубар, аьхиримжи вахтар улукьура! Учвуз гъеебхьиганси, Месигьдиз Къаршур гъиди, дупна. Лигуруш, дурар, ихь Месигьдиз къаршу касар, гизаф духьна. Магьа гьаддиз ухьуз, аьхиримжи сяаьт улубкьнайиб рябкъюрахьуз. 19Месигьдиз къаршу вуйи гьадму касар ихь арайиан удучӀвдар вуйи, хъа дугъридан дурар ухьукди кидикьнайидар дайи. Эгер дурар дугъриданра ухьукди кидикьнайидар вуйиш, дурар ихь арайиъ гъуздийи. Аммаки дурар вари гьергну, гьамди дурарин ухьук кидикьну адрувал улупура.

20Учвуз Гирамири Чав, туву багъиш ачвуз ва варидариз, аьгъювалар фу вуш, аьгъю гъабхьунчвуз.

21Узу учвуз, гьякьвал аьгъдарчвуз, кӀури, бикӀурадарза, хъа думу учвуз аьгъюган ва диди кучӀал арайиз дархиган, бикӀураза.

22Фуж ахъа сарун, Иса – Месигь дар, кӀуруртӀан кучӀлях? Гьацир кас Месигьдиз къаршу ву. Дицири я Адаш, я Бай кьабул апӀурадар. 23Шли Бай кьабул апӀурадарш, дугъу Адашра кьабул апӀурадар. Шлиз Бай аьгъяш, дугъаз Адашра аьгъя.

24Сифте бинайиан гъеебхьубдихъди гъузай. Эгер учву, учвуз сифте бинайилан гъеебхьубдихъди гъузиш, Балихъди ва Адашдихъди хьидичва. 25Ухьуз Бали туву гаф – магьа гьаму ву: гьаргандин Уьмур!

26Узу му учвуз, учву алдатмиш апӀрударикан бикӀураза. 27Хъа учвуз кайиб: Месигьдихьан учвуз дурубкьнайи багъиш учвухьди гъубзди, ва, гьаддиз, учву, шлин-вуш дарсариз ккилигурайидар дарчва. Гирамирихьан учвухьна гъафи Рюгьну учвуз гьякьвалин дарсар кивра, ва гьич саб вахтнара Дугъу учвуз кучӀал апӀидар. Гьаци вуйиган, Гьадгъу улупурайибси апӀинай, ва Аллагьдиъди гъузай.

Аллагьдин бицӀидар

28Гьаци вуйиган, Месигьди кӀуруб гьаци апӀинайки, йиз веледар, Думу хъадакну гъафиган, Дугъан улихь учвхьан, я гучӀʼвал, я начʼвал адарди, дугъужвуз шлуганси!

29Эгер учвуз Думу дугъри вуйиб аьгъяш, учвуз гьацира аьгъячвузки: дугъривалиинди яшамиш шулайидар Аллагьдин веледар вуйибра.

Currently Selected:

Югьандин-1 2: ТабГК

Highlight

Copy