Коринф-1 11

Гьюкум хилиъ ивнайир

1Узу Месигьдихъан дубгъурайиганси, учвура узхъан дубгъай.

2Узу гъапиб вари ичв кӀваин илмивалин ва узу учвуз туву аьгъювалариъ дупнайиси апӀурайивалин тяриф апӀураза.

3Учвуз аьгъяди ккундузуз: гьар жилирин кӀул – Месигь ву, дишагьлийин кӀул – чан жилир, хъа Месигьдин – Аллагь. 4Жилижвиву кӀулʼин алди ккарагураш, ваяки пайгъамбарвалин гафар кӀураш, чан кӀул аьйибнакк ккаъра. 5Дишагьлийира кӀулʼин алдарди ккарагураш, ваяки пайгъамбарвалин гафар кӀураш, чан кӀул аьйибнакк ккаъра. Мици вуйиш, дишагьлийи чан кӀул алдапӀнайи гьисаб шуйи. 6Эгер хпириз кӀулʼин алабхьуз ккундарш, зат имдарди кушарра алдаъри, хъа дишагьлийиз кӀул алдапӀуб аьйибнан ляхин вуш, кӀулʼин алабхъри. 7Жилири кӀул илибкну ккундар, фицики думу Аллагьдин ухшар ва ад ву, хъа хпир – чан жилирин ад. 8Жилир хпирикан гъахьир дар, хъа жилирикан – хпир. 9Жилир хпир бадали халкь дапӀнайир дар, хъа хпир жилир бадали халкь дапӀнайир ву. 10Гьаддиз дишагьлийи, чан кӀулʼин чан жилирин гьюкум аливалин малайикариз лишандикьан, кӀулʼин алабхъну ккунду.

11Аммаки Агъайихъди саб духьнайивалиъ, дишагьли жилирикан ва жилир дишагьлийикан асиллу ву. 12Жилирикан хпир гъахьибси, дишагьлийикан жилижвира бабкан шула, аммаки вари Аллагьди халкь дапӀна. 13Учву гьисаб апӀинай, дишагьлийиз кӀулʼин алдарди Аллагьдиз ккарагуб лайикь вуйин? 14Ва чав табиаьтдира ухьуз, жилижвиву ярхи кушар гъитуб аьйиб ву, кӀурадарин? 15Дидихъди сабси, дишагьлийиз ярхи кушар – заанвал ву. Дурар дугъаз, чан кӀулʼин лакач алабхъуз, тувнайидар дарин? 16Яни, мидкан узухъди гьюжат ккебгъуз ккунириз дишлади кӀураза: мидлан гъайри жара аьдат я учухь, я жара йишвариъ айи Аллагьдихъ хъугърударин арайиъ адар.

Агъайин хябяхъ

17Гьамцдар насигьятар туври, узуз пуз ккунди азуз: ичв тяриф апӀидарза, гьаз гъапиш ичв уч хьували хру хайиртӀан зарал гизаф ву. 18Гьаз? Саб гъапиб, узуз гъеебхьунзуз: учву Аллагьдин улихь уч шлуган, ичв арайиъ гьюжатар гъитӀирккуз хъюгърачва. Сакьюдар дицдар хабрарихъ хъугъурза. 19Ичв арайиъ гьар жюре фикрар-хиялар, фуж дюз вуш аьгъю апӀбан бадали, духьну ккунду. 20Хъа учвуси, Агъайин гьюрматназ суфрайихъна са-сарди уч шулаш, дидиз уч хьувал кӀурдар. 21Учву, чиб-чпихъ дийийигъди, ипӀуз хъюгърачва, ва аьхириъ гьацӀар гашди гъузра, хъа гьацӀари пиян хьайизкьан убхъура. 22Дици апӀайиз ичв хулариъ ипӀинай ва убхъай, даршиш Аллагьдихъ хъугърударин уч хьувал беябур мапӀанай, ва, дугъриданра, фукӀа ипӀуз адрудар асккан мапӀанай. Гьамус узу, учву гьамци апӀузди, ичв тяриф дапӀну ккундин? ИкибаштӀан, ваъ!

23Фицики узу учвуз улупуб, Чахъан, Агъайихъан гъудубгъуб вуйиз: Агъа Исайи, Учв масу туву йишван, суфрайилан уьл гъадабгънийи, 24ва Аллагьдиз чухсагъул дупну, гьудубтӀну, гъапнийи: «Му Йиз беден вуйиз учвхъанди туврайи. Узу кӀваин алаури гьамци апӀинай». 25Ари гьамци, хябяхъдин хураг ипӀбахъан, Исайи хъанара, зах дибисну, кӀуру:

– Му зах учвхъанди удубзурайи Йиз ифдиинди йитӀурайи цӀийи йикьрар вуйиз. Йиз гьюрматназ убхъруган, гьар ражари гьамци апӀинай. 26Гьаз гъапиш, гьар ражари учву гьаму уьл ипӀурайиган ва гьаму захʼан убхъруган, учву Агъайин аьжаликан шагьидвал апӀурачва. Думу кьяляхъ гъяйизкьан гьаци апӀинай.

27Гьаци вуйиган, хай гъюруси уьл дирипӀрури ва Агъайин захʼан дурубхърури Агъайин ифдиз ва бедендиз къаршуди гунагь апӀура. 28Адмийиз, уьл ипӀайиз ва захʼан уьбхъайиз, чав гьапӀраш, аьгъяди ккунду, 29гьаз гъапиш, Агъайи фида гъапӀу бедендин мяна аьгъдарди ипӀруринна убхърурин ипӀувална убхъувал чак тахсир кипувал ву. 30Магьа гьаддиз ичв арайиъ гьаци гизаф иццрудар ва аьжузар айичв; гъийихдарра цӀиб даричв. 31Хъа эгер ухьу гьапӀраш аьгъю апӀуйиш, тахсир кипбахьан ярхла хьидийхьа. 32Агъайи ихь суд апӀура, жазара гьадабтӀура. Дугъу дици, дюнʼяйин суд апӀруган, ихь суд дарапӀбаз, апӀура.

33Гьаци вуйиган, гъардшар, учву ипӀуз уч шлуган, гьялак махьанай, чиб-чпихъ дийигъури апӀинай. 34Гашди гъюрури, ичв уч хьувалилантина учву тахсирнакк ккадрахъбан бадали, хулаъ дипӀну гъюри.

Узу учвухьна гъафиган, жара ляхнарра дюз алаидиза.

Currently Selected:

Коринф-1 11: ТабГК

Highlight

Copy