Isaiah 55
55
A Dangtakte Sapna
1No a dangtakte khempeuh aw, hong pai un,#Jn 4:14; 7:37
tui hong zuan un;#Jer 2:13
no sum nei lote aw,
hong pai-in lei unla ne un!#Kil 3:18
Hong pai unla sum pia lo man nei loin
bawngnawi le lenggahzu lei un.#Hos 14:4; Mt 10:8
2 Anlum leina loin bang hangin sum zanga,
gilvahna ding lopi-in na sem na hi uh hiam?#Ph 22:26; Hos 8:7
Ngai un, ka thu ngai-un, anlim ne un,#Isa 1:19
na hinna un anlim pen ne-in a tai ding hi.
3 Na bil uh hong ngat unla kei hong zuan un;
na nuntak theih nadingun ka thu ngai un.#Sp 18:5; Ro 10:5
David tungah a muanhuai itna ka ciam bangin
note tawh tawntung thukhun ka bawl ding hi.#Ns 13:34*; Isa 54:8
4 En un, mite tungah amah teci suaksakin
mite makai le ukpa ka hisak ding hi.
5 Note in na theih loh uh minamte na sam ding uh a,
TOPA note Pasian Israel-te Siangtho Pa in#Isa 12:6
note hong thupisak khin ahi manin#Isa 60:9
note hong thei lo minamte in#Isa 2:3
kintakin note hong zuan taktak ding uh hi.
6 A kimuh theih lai-in TOPA zong un,#Ph 32:6; 2Co 6:1-2
amah a nai lai-in sam un.
7 Tatsiapa a gamtat nusiasak unla,
a gilopa a lungsim kheelsak un;#Isa 32:7; 59:7
TOPA lamah kiheisak le uh cin amah in lainat dinga,#Isa 44:22; 54:10
eite Pasian lamah na kiheisak uh leh amah in a mawhna maisak pha mahmah ding hi.#Isa 1:18; 40:2
8 "Ahang in, no ngaihsutte kei ngaihsutna hi lo a,#Php 2:5; 4:8
no zialetongte kei zialetongte a hi kei hi,"#Isa 53:6; Mic 4:12
TOPA in cikhia hi.
9 "Leitung sangin vante a sanzawk bangin#Ph 103:11
no zialetongte sangin kei zialetongte sangzaw a,
no ngaihsutnate sangin kei ngaihsutna sangzaw hi.#Isa 40:13-14
10 Khaici vawhpa khaici ding le
a ne pa anlum ding
a piansak theih nadingin#2Co 9:10
vantung panin guah le vuk kiasuka,
leitung buakkawtin kungnote mengin#Ph 67:6
selsak loin a kileh loh bangin
11 ka kam pana pusuaksa ka kammal zong tua bang ahi hi;#Tp 32:2
a hawmin kei kiangah hong kileh lo dinga,#Isa 45:23
ahi hangin ka deih bangin
tungsakin ka sawlna ah lawhcing ding hi.#Isa 44:26
12 Gual nuamin na kuankhia ding uh a,#Ph 98:4
lungnuamin hong kipaikhiatpih ding hi;
note mai-ah mualliante le mualneute
la sa in awng ding uh a,#Ph 65:12-13
lo lai-a singkung khempeuh in
khut beng ding uh hi.#Ph 98:8
13 Lingkung tangin takkung po dinga
thangling kung tangin muikung a po ding hi.#Isa 5:6
Hih in a tawntunga
TOPA kiphawkna#Isa 63:12
a kisusia ngei lo a kipden lim hi ding hi.
Currently Selected:
Isaiah 55: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission