Isaiah 36
36
Sennacherib in Jerusalem Sim
1Kumpi Hezekiah in a uk zawh a kum sawm le lina kumin Assyria kumpipa Sennacherib in Judah khuapi muanhuaite khempeuh simin a la hi. 2 Tua ciangin Assyria kumpipa in Lachish panin Jerusalem a om kumpi Hezekiah kiangah a galkap mang lianpa tawh galkap tampitak a sawl hi. Puan sawppa Lo zuatna lampi a Bual Tungnung tuinak ah galkap mangpa a khawl ciangin 3 kumpi inn ukpa Hilkiah tapa Eliakim, thuvanpa Shebna le thu ciamtehpa Asaph tapa Joah a kiangah a pai uh hi.#2Kh 32:1; Isa 22:20-21
4 Galkap mang lianpa in amaute kiangah, "Hezekiah kiangah,
‘Hih in kumpi lian, Assyria kumpipa gen ahi hi: Hih na lungmuanna uh bang bulphuh na hi uh hiam? 5 Note in galsiamna le galkap tha ka nei uh hi, na ci uh hi - ahi hangin a hawmpi-a thu gen na hi lel uh hi. Kei hong lehdo dingin note in kua suang na hi uh hiam? 6 Tu-in en un, note in a tungah a kingap uh ciangin suna a liamsak thei bek pumpeng ciangkhut them ahi Egypt a suang na hi ta zen uh hi. Egypt kumpipa Pharaoh lah amah suang khempeuh tungah tua mah bangin ahi hi. 7 Tua hi-a no zong, "Kote in TOPA ka Pasian ka suang uh hi," na cih uh leh - amah pen Hezekiah in a munsangte le a biakna-taute phelkhiatsakin Judah le Jerusalem tungah, "Hih biakna-tau mai-ah na biak uh kul ding hi," a cih pa hi lo ahi hiam?#2Ku 18:4; Isa 30:2,5
8 "‘Tu-in hong pai-in Assyria kumpipa ka pu tawh thu kiciamna bawl un: A tunga tuang ding mi na neih nak uh leh sakol tulnih no kong pia ding hi. 9 Egypt sakolte sakol tuangte suangin ka pu galkap mangte lakah a neu pen khat nangawn bangci zawh thei ding na hi uh hiam? 10 Tua tham loin hih gam sima a susia dingin TOPA loin hong pai ka hi hiam? TOPA mahmah in hih gam do a pai dingin hong gen ahi hi," ci-in gen un," a ci hi.
11 Tua ciangin Eliakim, Shebna le Joah in galkap mang lianpa kiangah, "Thei lel ka hi manun na nasemte tungah Aram pau-in hong gen in. Kulh tunga mite zakin Hebrew pau-in hong hopih kei in," a ci uh hi.
12 Ahi hangin mangpa in, "Ka pu in nang le na pu tung bekah hih thu gen dingin hong sawl hi lo a, kulh tunga tute - no tawh a kibangin amau ek ne a, a zun uh a dawn khawmte tungah gen dinga hong sawl hi lo ahi hiam?" a ci hi.
13 Tua ciangin galkap mangpa dingto in Hebrew pau-in awngkhia a, "A lian mahmah kumpi, Assyria kumpipa kammalte za un! 14 Hih in kumpipa’ thugen ahi hi: Hezekiah kikhemsak kei un. Amah in note hong hu zo lo ding hi. 15 Hezekiah in, ‘TOPA in eite hong hu taktak dinga, hih khuapi Assyria kumpipa khut sungah a kipia kei ding hi,’ ci-a hong zolna tawh na TOPA uh muang kha kei un.
16 "Hezekiah thu ngai kei un. Assyria kumpipa gen hih ahi hi: Kei tawh kilemna bawlin kei kiangah hong paikhia un. Tua hileh a kuamah peuh in amau lenggui, amau theikung ciat panin ne ding uh a, amau tuikhuk ciat panin a dawn ding uh hi; 17 keimah hong pai-in no aa tawh a kibang leitang - an le zuthak leitang, anlum le lenggui lei ah kong paipih matengin a tua ci ding hi.
18 "Hezekiah in, ‘TOPA in eite hong hu ding hi,’ ci-a hong genna tawh kimakaih khialsak kei un. Assyria kumpipa khut panin minamte pasian khatpeuh in kua hu zo ngei ahi hiam? 19 Hamath le Arpad pasiante koi-ah om hiam? Sepharvaim’ pasiante koi-ah om hiam? Amaute in ka khut panin Samaria suahtak zo ahi hiam? 20 Hih gamte’ pasiante khempeuh kua in ka khut panin honkhia thei ahi hiam? Tua ahileh ka khut panin TOPA in Jerusalem bangci hut thei ding ahi hiam?" a ci hi.
21 Ahi hangin mite dai khipkhep uh a, a dawnna bangmah a gen kei uh hi; bang hang hiam cih leh kumpipa in, "Dawng kei un," ci-in thu a pia hi.#Pn 9:7-8
22 Tua ciangin kumpipa inn ukpa Hilkiah tapa Eliakim, thuvanpipa Shebna, Asaph tapa thuciamtehpa Joah-te a puante uh balkeksa-in Hezekiah kiangah pai uh a galkap mangpipa thugen teng a ko uh hi.#2Ku 18:17-37; 2Kh 32:9-19
Currently Selected:
Isaiah 36: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission