Nasepte 11
11
Peter in Ama Nasepte Gentel
1Sawltakpite le Judea gam sunga om sanggamte in, Gentile-te in zong Pasian thu sang khin ta uh cih a za uh hi. 2 Tua ahi ciangin Jerusalem ah Peter a pai toh ciangin vunatte laka thu-umte in amah mawhsak in, 3 "Nang, vunat-lote innah hawhin amaute tawh an na nekhawm hi," a ci uh hi.#Ns 10:28,45; Gal 2:12
4 Peter in na khempeuh a pian bang bangin a cingin gen a: 5 Joppa khuapi ah thungen a ka om laitakin mumang bangin mang ka mu hi. Vantung panin a kiu li tek pana kikhaisuk, a pek lianpi bang khat ka omna-ah ka mu hi. 6 Asung ka et leh leitung a khe li nei ganhingte, gamsate, a bokvak ganhingte le huih lak vasate ka mu hi. 7 Tua ciangin kei kiangah, "Peter aw, tho in. Go inla ne in," ci-a hong gen aw khat ka za hi.
8 "Ken, ‘Hi buang lo e, Topa! A siangtho lo le a nin na khat beek ka kam sungah tum ngei nai lo hi,’ ci-in ka dawng hi.#Ns 10:9-32
9 "Tua aw in vantung panin a nih veina hong gen a, ‘Pasian in a siang a, a bawlsa na khatpeuh, siangtho lo hi, ci kei in,’ ci hi. 10 Hih bangin thum vei dong hi-a, tua ciangin vantungah kikhai to kik hi.
11 "Tua hun laitak tektekin Caesarea pana kei kianga hong kisawl mi thum ka tunna inn ah hong tung lian uh hi. 12 Amaute tawh lungsit lo-a ka pai ding Kha in hong gen hi. Hih sanggamte guk in zong kei hong zui uh a, tua mipa inn ah ka lut uh hi. 13 Amah in kote kiangah, a inn sungah vansawltak kilang a, ‘Joppa a Peter kici Simon samsak in. 14 Amah in nang le na innkuanpihte khempeuh kihotkhiat nading thu puak khat hong puak ding hi,’ ci-in a genzia hong gen hi.
15 "Thu gen ka kipat takin, a cila eite tunga hong tung bangin amaute tungah Khasiangtho a tung hi. 16 Tua ciangin Topa in, John in tui in b#11.16 Ahikeh sung hong baptise hi; ahi hangin note Khasiangtho in hong kibaptise ding hi,’ ci-a a gensa ka phawk hi. 17 Tua hi-a Topa Jesu a um, eite hong piak tawh a kibang letsong, Pasian in amaute pia ahileh Pasian a nial thei dinga kingaihsun kei kua ka hi hiam?" a ci hi.#Ns 10:44
18 Amaute in hih thu a zak uh ciangin bangmah nialna nei nawn tuan loin, "Tua ahi mawk leh Pasian in, nuntakna ngah nadingin kisikna Gentile-te tungah phal tazen hi lo maw!" ci-in Pasian a phat uh hi.#2Co 7:10
Antioch a Pawlpi
19 Stephen tawh kisai-a bawlsiat na hangin a kithehthang mite Phoenicia, Cyprus le Antioch dongah tung uh a, Jew-te tung bekah thupuak a gen uh hi. 20 Bangbang ahi zongin amaute pawlkhat Cyprus le Cyrene pana mite, Antioch ah pai-in Greek-te tungah zong Topa Jesu lungdamna thu gen ding a kipan uh hi. 21 Topa khut, amaute tawh omkhawm a, mi tampitakin um in, Topa lamah a kihei uh hi.#Ns 8:1,4
22 Hih thu Jerusalem a pawlpite in na za uh a, Antioch ah Barnabas a sawl uh hi. 23 Amah tungin, Pasian hehpihna a tunzia a muh ciangin a nuam mahmah hi. Amaute khempeuh in a lungsim khempeuh uh tawh Topa tungah a muanhuai nadingun a hanthawn hi. 24 Amah mi hoih hi-a Khasiangtho le upna tawh kidim in, Topa kiangah mi tampitak a tun hi.#Ns 4:36
25 Tua ciangin Saul zong dingin Tarsus ah Barnabas pai a, 26 amah a muh ciangin Antioch ah a paipih hi. Tua hi-a Barnabas le Saul tua lai-a pawlpi tawh kum khat vilvel kikhawl uh a, mi tampitak thu a hilh uh hi. Antioch ah nungzuite, Christian-te a kici masa pen hi.#Ns 9:11
27 Hih hun sungin kamsangte pawlkhat Jerusalem pan Antioch ah a paisuk uh hi. 28 Amaute lakah Agabus min nei khat ding to a, "Kha tungtawnin, Rome gam sung khempeuh ah kialpi nasiatakin tung ding hi," ci-in a genkhol hi. (Hih pen Claudius in a uk laitakin a tung hi.) 29 Nungzuite in amau hihtheihna ciat tawh Judea gama teng sanggamte huhna piak dingin thu a khensat uh hi. 30 Amaute in tua thu tangtungsak uh a, Barnabas le Saul tungah amau letsongte upate ngah dingin a khak uh hi.#Ns 13:1; Ro 15:23
Currently Selected:
Nasepte 11: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission