Luka 7
7
Isaye soji kura Rombeye kaɍea isangaduwu
(Mat 8.5-13; Yah 4.43-54)
1Isa mananju samma jamaro cǝdde kerǝnniya, bǝrni Kafarnaambero leyeno. 2Nadǝn soji kura Rombe laa kaɍeanju jaumaro cǝraana dondi no cǝdi mbeji. 3Soji kuradǝ lawar Isaye fangenniya, amwurawa yaudiyaye laaa nanjuro cunode tia lowoja iso kaɍeanju isangajuwo yeno. 4Na Isayero kadiranniya, tia jauro lowojane: «Marne, adǝa tiro yiddǝmiya jussǝna, 5dalilnjudǝ jamande yaudidǝa cǝraana, har dandal andiro settando,» yera. 6Daji Isa tayi-a rokko leyera. Isa fadodǝa karǝngenniya, soji kuradǝ sawawanju laaa na Isayero cunode tiro: «Soji kuraye yeno: “Kǝma, bare suwoldǝmmi, nia fannin sawo tikkǝni. 7Nanǝmbo kǝndema ye tikkǝni. Biya wada ye, kaɍeani ngaji. 8Wudǝ cidiya kǝnduwo amben kǝrgakko, fǝrduni yen sojiya takkǝna. Falnjaro: ‘Lene!’ nǝkkiya, leji. Fal laaro: ‘Are!’ nǝkkiya, isi. Koro kaɍeaniro: ‘Adǝa de!’ nǝkkiya, cǝdi.”» 9Isa adǝa fangenniya, ajapce suworde jama tia jagaidǝro: «Nayiro wulnjagakki, curo jama Israyilawuyeman kambǝrse kura adǝ gai fandǝkkǝni!» 10Daji am soji kura cunodǝnadǝ fadodǝro walladaranniya, kaɍeadǝa kǝlewanju salai nayeyera.
Isaye tada kamu kwa faccǝgǝnaayea roaro kalaktu
11Ngawo adǝyen tussǝnni Isa bǝla laa Nayin canidǝro leyeno. Fuwurawanju-a am ngǝwu-a ye tia casadduwe leyera. 12Ngaworam bǝlayedǝa karǝnjana duwon, kam laa nuna ngojana kaurilaro casadi. Yanjudǝ tada gade cǝdanni, kwanju ye faccǝgǝna, koro jama kada bǝladǝye yadǝa casadduwi. 13Kǝmadǝ tia kirunniya, njunoje tiro: «Bare yirǝmmi!» yeno. 14Balangardǝa karǝnje leje am tia ngojanadǝ gǝm dayera. Isaye: «Jairo, niro wulnjǝgǝkki, cine!» yenniya, 15kam nunadǝ cije napce mana badiyeno. Daji Isa tia yanjuro kalakkeyeno. 16Am samma rijane Alaa congorǝne: «Fagat, nawi kura curonden culuwuna, Ala jamanjua banaduwuro isǝna!» yera. 17Lawar Isaye adǝ cidi Yahudiyaye-a larduwa tia dirijane kǝljana-a sammaro tatargaada.
Isa-a Nawi Yahaya Kasalama-a
(Mat 11.1-19)
18Fuwurawa Nawi Yahayaye awo ani sammaa tiro wulyeyera. Daji Yahaya curonjan yindi bowoje 19na Kǝma Isayero koro adǝa njǝddoro kinodo: «Nima wa fuwun isimadǝ wo#7.19 nima wa fuwun isimadǝ wo - Almasiwu Alaye. ra gade gureniye?» 20Na Isayero kadiranniya, tiro: «Yahaya Kasalama andia nanǝmbo koro adǝa njǝddoro sanodo: “Nima wa fuwun isimadǝ wo ra gade gureniye?”» cane tia keworo. 21Sa adǝn Isa am kǝndondia-a kasuwaa-a karuwaa-a kada isangajiyi, koro kambuwa ngǝwua simbaro cǝdi. 22Daji Isaye fuwurawa Yahayayero: «Waldǝnowo, awo ruwwa-a fanuwwa-aa Yahayaro wulgǝnowo: Kambuwa sim cawandi, ngurdiyiya ye sinjan lejai, am barasua ngajane tayirro waljai, muwaso ye fanjai, am sanuna roaro waljai, koro talaawa ye kawuɍi kǝjidǝa fanjai. 23Barganju kam wu nangaro taljiwawodǝ!» yeno.
24Fuwurawa Yahayayedǝ sapkadaranniya, Isa kǝla Yahayayen jamadǝro mana njǝddo badiyeno. Tiye: «Awi curo karaayen kuroro leyew? Ngǝlei laa kanji kanjiro karuwaye cakke moji cǝdi wa? 25A’a. Awi gǝle kuroro leyew? Kam kajǝmu shawa cakkǝnaa wa? A’a, am kajǝmu shawa casakke curo larasuyen dasaanadǝ mairilan kasarga. 26To, awi gǝle kuroro leyew? Nawia wa? Aaa, nayiro wulnjagakki, nawimaa kojǝna. 27Tima kam duwon kǝlanjun kitawulan adǝ ruwuwadadǝ: “Nin fuwunno kǝngayammi nodǝkke niro jawalnǝm cassai.”#Mal 3.1 28Nayiro wulnjagakki, curo kam kamulan tambǝna sammayen wunduma Yahayaa kojǝna bawo. Amma curo nodo bargaa Alayen tǝngǝɍidǝ tia kojǝna.» 29(Jama samma akki mowomason kundenno caman kawuɍi Yahayaye fanjanadǝ, Alaa jiremaro asujane kasaccane tayiro kasala tuwaye kiddo. 30Amma Farisawa-a malǝmba Attauraye-a awo Ala tayiro niajǝgǝnadǝa wajane kasala tuwaye Yahayayedǝa kasaccanni.)
31«Wundusoro am jaman adǝyedǝa rattalgǝkki? Awi gǝle tayi-a camun wo? 32Tayi alama yalla ci kasuwuyen napkada kowo sapcane amanjaro: “Algaita nayiro funjagaiyena duwon, bikke randuwwi. Koro so lagaranne diyena duwon, yiruwwi,” cani gai. 33To, Yahaya Kasalama ise burodi ye juwunni, diben ye canni, “Ti karuwama!” yew. 34Koro Tada Kambedǝ ise juwui, cai, “Akko kǝmboma, kǝnjama, sawa akki mowomaso-a biwumaso-aye!” yew. 35Amma nanrashidudǝ kǝndonju ngan asudi.»
Isaye kamuro biwunju gawurduwu
36Farisa laa Isaa masǝna dioro doyenniya, Isa fannjuro ngaye masǝnaro napkeno. 37Bǝladǝn kamu biwuma laa mbeji. Isa fado Farisadǝyen masǝna cǝdiro fangenniya, sǝndal curonjun kawudi tamannaa ngoje ise 38ngawo Isayen daje ciriaro si Isayero simalo kokoljiye kanduɍi kǝlanjuyen cinje ka cinjuye gǝnajiye kawudidǝa fijiye samgeyeno. 39Adǝa kirunniya, Farisa Isaa dojǝnadǝ karwunjun: «Ca kam adǝ nawia, kamu tia lejidǝ biwumaro noji,» yeno. 40Isaye tiro kalakciye: «Siman, awo laa niro wulnjǝgǝkkiya, raakkǝna,» yenniya, tiye: «Sayinna, wulle!» yeno. 41Isaye: «Am yindi kam laayen wuɍi tagariyera. Faldǝ kasuro dinariyus#7.41 dinariyus - Dinariyus faldǝ alwasi kida kawu falle. yer uwu ngoyeno, faldǝ ye dinariyus fiwu ngoyeno. 42Cawande carǝmbǝnnidǝ, kamdǝ kasudǝa tayi yindi sammaro wayeyeno. Wundunja gǝle tia jaumaro cǝrayi?» cǝne tia kiworo. 43Simanne: «Tǝmanidǝn kam tiro ngǝwu wajǝgǝnadǝma,» yenniya, Isaye: «Jire wullǝm,» yeno. 44Daji Isa kanji kamudǝyero suworde Simanno: «Kamu adǝa rumma, gǝna? Fannǝmbo ngaakkǝnadǝn, ingi si tuldaye sukkudǝmmi, amma kamu adǝ simalonju siniro kokoljiye kanduɍi kǝlanjuyelan cingeno. 45Feɍiniro ka cinǝmbe gǝnaame kaptuwu darajaa ye sǝddǝmmi, amma ngaakkǝnaman, ti wuro sinilan lewa darajaye njǝddo koljǝnni. 46Ni kǝlaniro kǝndawu jaitunnema figǝmmi, amma ti siniro kawudi tamanna fijiye samgeyeno. 47Adǝ nangaro niro wulnjǝgǝkki, biwunju ngǝwu gawurdǝnaro kǝrawo kura wuro fǝlesǝgǝna, amma kam biwu ganaa gawurdǝnadǝ kǝrawo ganama fǝlejiyi.» 48Daji Isaye kamudǝro: «Biwunǝm gawurdǝna,» yeno. 49Am masǝna dioro ti-a kallo napcanadǝye amanjaro: «Wundu kam biwu gawurduma attǝ?» yera. 50Daji Isaye kamudǝro: «Kambǝrsenǝm nangaro njǝkkawo fandǝmma, kǝlewan lene!» yeno.
Currently Selected:
Luka 7: kby
Highlight
Share
Copy
Want to have your highlights saved across all your devices? Sign up or sign in
© (Active), SIM International