Ruti 2
2
Ruti Nde Wande Uwae Risaen Bowazi
1Uwae kiye wune, rishi ubaen Nawomi iki ta atang ti si unde ti kuko, u site rifunn timambe. Rinyi-wu si Bowazi. Awu si unde ti ru ye ushi kununn Elimeleki ubaen Nawomi. 2Ama Ruti, unda Mowab, ri te Nawomi baa, “Iya, cwe na m ti m ru kaa cag wuci uwog iki. Iki be ame u tu risu tinyang uwe unde iki u cag wuci uwae risaen-wu.” Ama Nawomi ri te wu baa, “Ru-fu, unda-m.”
3Tiri awu nwunn ru ka cag wuci putsa isim ande ti ku bunn wuci uwae risaen iki. Ama risaen wu ti awu sang ka cag wuci atang ne ka si sí ana Bowazi, ti si rishi Elimeleki.
4Ama ti aba u nunung, Bowazi ru uwae uten ti Betilami ba sang pu wu. Awu ri te ande ti ku bunn wuci-wu baa “Usuko ni, Yaweh ā nde ni itinyang.” Aba ama cwe baa, “Yaweh ā nde fu itinyang ama.”
5Tiri Bowazi rang upyi-wu ti ta risu ande ba ti ku bunn wuci-wu baa, “Mbawandab wune si umbae aye?”
6Ama unde wu ti ta risu ande ti ku bunn wuci yi ri baa, “Awu si unda Mowab ti te Nawomi ru uten ti Mowab ba te atso. 7Awu jwam ti wu na cag wuci putsa isim ande ti ku bunn wuci. Ti kiskinn, awu ku nde wande ba ku sang tine. Awu pu-wu unyang be.”
8Ama Bowazi ri te Ruti baa, “Fxen, unda-m. Ru-fu risaen unde iki ka cag wuci atang cwucwo be. Kyang fifer te anda ba ti ku nde na m wande ike. 9Sae uwog ti aba bunn ku ru, ti fu putsa ba isim. Ame nda pu m anyisu itaen bane unju baa, aba na nde-ba afu iken iki be. Ama kiye ti unwaen a ye fu, ru ka ngwa ambyi ti anyisu itaen txi ba tsi ne.”
10Ti Ruti fxen ira yine, awu si ku riben, u ri te wu baa, “Imi ti ame nde na fu nee ame tu risu tinyang ne uwe-fu, ti ame si unda ti rikyen ne?”
11Bowazi ri te wu baa, “A ri te pu ba ame meme iken ti afu nde na iya ubaen-fu, bag ti kiye ti ubaen-fu cwu. Afu ya itse-fu ti iya-fu ti uten-fu ta, u ba som te ande ti afu nung-fu aba usir iki be. 12Yaweh ā nde fu tinyang ikyaen iken ti afu nde. Awu Yaweh, Rimam na Isirela ti afu ru ba ku tam asae-wu, ā nungkyi fu. Awu ā pae na fu kujwojang ti kumunn-yi.”
13Ama Ruti ri baa, “Afu tso pu fu ame rinyangwae ti ko timambe, itsekuru-m. Afu ri jim me utob, ko ti ame si-m kinjo uwae apyi-fu be.”
14Kiye ti a som ku ci wuci, Bowazi ri te Ruti baa, “Ba ci wuci te ti ike. Mbe buredi byaen uwae ambyi anam ti fu ci.” Ruti ba som isim itaen ti ku bunn wuci, ama Bowazi pu na wu ayaen bali ti a fufxab. Awu ci num, u ya iki ta ti atang.
15Kiye ti Ruti nwunn kaa cag wuci, Bowazi ri ira te itaen ande-wu baa, “Ni yata ti awu ā cag sang ka ti uwog ti ani byir wuci tsi atang. Ni ri-ni ira ti ribom te wu be. 16Ni shir nwaen wuci yi iki ru ye uwae iyir-yi, ti ni pu jwunn cwu riben ti awu ā cag. Ni fwan-ni awu ira be.”
17Tiri Ruti cag wuci yi ba sang ti ureb, ama u rug wuci yi. Ayaen yi munn ku fife yi padi. 18Ama awu ye yi su, u ru yi uwae uten, u ka tso iya ubaen-wu iken ti awu cag tu. Cwucwo awu ye wuci ti awu ci tsitsi na iya ubaen-wu.
19Nawomi rang wu baa, “Aka ti afu cag wuci atang yaka ne? Risaen aye ti afu nde wande atang? Itinyang ā si ana unde ti sae fu te ayibrisi!” Ruti tsag te wu ira risu unde ti awu nde wande uwae risaen-wu, u kunn rinyi unde wu baa, “Bowazi.”
20Ama Nawomi ri baa, “Yaweh ā nde Bowazi itinyang! Kubenti, Yaweh ku tangsom te ande ti tsi user ti ande ti cwucwu.” Nawomi ri te kyi Ruti baa, “Unde wune si rishi-ti. Awu si kinjo uwae rishi ti fifer te ti.”
21Ama Ruti ri te wu baa, “Bowazi ri te kyi m baa, ame na tsi te ande wande-wu ahan ba kwer ti kiye ti a bunn tag wuci yi.”
22Nawomi ri te Ruti baa, “Ayi nyang timambe unda-m, ti afu te anda ti wande-wu aba kyang te atso. Á baa, ayi na si uwae risaen unde iki, aba ú nde fu iyìb.”
23Ama Ruti nde wande ti anda ti wande Bowazi ba sang ti kiye ti aba bunn tag wuci yi. Ama meme kiye wune, Ruti som te Nawomi.
Currently Selected:
Ruti 2: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017