Luka 6
6
Itsekuru na Usir Ikyinn
(Matiyu 12:1-8; Markus 2:23-28)
1Usir ikyinn iki, Yesu ti atugbug-wu kyang ku putsa fengo risaen ufang iki. Ti aba ru ba ku ya ku fe, ande ti putsa-wu tag acwong awum u ku kub. 2Tiri ariki uwae kumbub Farisi ti ta atang rang ba baa, “Imi ti ani ku nde ne? A bae uwae Icwe baa, ande na nde-ba itso iken yine Usir ikyinn be.”
3Yesu rang ba ama baa, “Ani nung-ni ira risu Itse-ti Dawuda ti ande ti putsa wu, 4kiye ti rimenn ye ba be a? Awu sang yi kusog Rimam u ka ci wuci ti sisaen ti a cwe-ba ti ande na ci be, se ande ti si kukwen Rimam amam ti ku ci. Awu pu iki na ande-wu, aba ama ci.
5“Ni nung nyinyang baa, Umbae Unde si Itsekuru na Usir ikyinn.”
Yesu Nwangru Unde ti Cwu Kujwo
(Matiyu 12:9-14; Markus 3:1-6)
6Usir ikyinn iki cwucwo Yesu sang ba kyi uwae kusog Rimam u ku kwen na ande ira Rimam. Uwae kusog Rimam atang unde iki ti kujwo rici-wu cwucwu ta atang ama. 7Ande ti kumbub Farisi ti ande ti ku kwen na ande Icwe som ku sae-ba awu ti a na u nung baa, ko awu u nwangru unde wune Usir ikyinn bara. Aba ku sha ti a tu Yesu ti riraen ikyaen ti a ye wu ti rikwen. 8Amaa Yesu nungye mam pu wu ira yi ti aba ku myae. Awu ri te unde wu baa, “Ru ba tsi ike.” Unde wu nwunn u ba tsi uwe Yesu. 9Yesu ri te ande ba baa, “Ame u rang ni ira iki, ni ri te m iken ti Icwe Rimam ri risu Usir ikyinn. A ri atang baa, ati na nde iken ti tinyang Usir ikyinn ree, re a ri baa ati na nde iken titibi? Ati na nwangru ande ree, re ati na wen ande?” 10Tiri awu sae ayib pakob ba meme u ri te unde wu ti cwu kujwo baa, “Ndabta kujwo-fu.” Unde wu ndabta kujwo-wu, ama kujwo-wu kafe tsi ti rinyang-wu.
11Amaa, rinae ye ande ba. Aba ku myae ira tetso iken ti a u nde te Yesu.
Yesu Tsab Ande Rijwe asu Ifaen ti A na Si Atom-Wu
(Matiyu 10:1-4; Markus 3:13-19)
12Uwae kiye wune, Yesu nwunn ruye u ka tso yi rikwen u ka jwam Rimam ti ureb pu ucwefam. 13Isim ti ucwe fam yae, awu kunn ande ti putsa wu ba u tsab rijwe asu ifaen uwae-ba ti a na si atom-wu. 14Aba si Siman, unde ti Yesu fa rinyi-wu tishe baa, Bitrus, ti Andarawu inja-wu; ti Yakubu ti Yohana, ti Filip, ti Bartolomu, 15ti Matiyu, ti Toma, ti Yakubu umbae Alifas, ti Siman unde ti kitsinn risu icwe, 16ti Yawuda umbae Yakubu, ti Yawuda Iskariyoti unde ti u sa Itsekuru-wu jabci.
Yesu Nwangru Ande u Kwen na Ba Ira Rimam
(Matiyu 4:23-25)
17Awu te aba ande ti putsa-wu nwunn rikwen atang u si ba tsi utab. Aba tu ande ti putsa Yesu iki ti kumbub ande tiyang ti ru uten Yawudiya ti uten Urushelima ba, ti ande ti nae fer unju uyinn uwae uten ti Tiire ti Sidon. 18Aba ru ba ikyaen ti a na fxen iken ti kwen na Yesu ama ikyaen ti a ku sha ti wu na nwangru ba uwae kicaeb-ba. Ande ti site rijwen titibi ru ba ama, aba tu itinwangru. 19Patag ande ti funn ku kwab ti a tekunn wu ikyaen ti, kuko ku ruye ijwe-wu u ku nwangru ande uwae acaeb-ba.
Ande ti ku Ngwa Rikaen Tine u Tu Kujwojang-ba Uwe Ike
(Matiyu 5:1-12)
20Awu txaen pu ayib sae ande ti putsa-wu u ri baa,
“Itinyang si ana-ni ani ande ti rikaen,
ikyaen ti,
Kujwokwe Rimam si ana-ni.
21Itinyang si ana-ni,
ani ande ti ku fxen ti rimenn tine,
ikyaen ti,
ani u ci kyikyaen.
Itinyang si ana-ni,
ani ande ti ku jwub ira tine,
ikyaen ti,
ani u skaen ikyaen.
22Itinyang si ana-ni,
ani ande ti ande ku sa ni kuka,
u ku txi ni txi, ku txun ni asu,
ku ri baa,
ani na nyang-ni be
ikyaen risu Umbae Unde.
23Kiye ti a ku nde ni ayine,
ni tsen utob ti ni se ise
ikyaen ti,
kujwojang-ni ti a sa tsika ni apupwen
ko pu yi.
Kute abitse-ba nde itso iken yine
te ande ti ku ya iskin ira Rimam.
24Amaa, ayae ni ande ti site rifunn,
ikyaen ti,
ani ci ru pu ni ana-ni utense ike!
25Ayae-ni ande ti ci kyaen pu ni tine!
Ani u ba fxen ti rimenn uwe ike.
Ayae-ni ande ti ku skaen u ku shwu tine!
Ani u ba jwub ira u kub kujwo anyi
uwe ike.
26Ayae-ni ande ti a ku teb rinyi-ni
utense ike,
ikyaen ti,
abitse-ba nde pu ba itso iken yine te ande ti ya iskin ira ti rifen ti kute.
Ye Ure te Ande ti Rika-ni
(Matiyu 5:38-48; 7:12)
27“Amaa ame ku ri te ni ande ti ku fxen me baa, ni ye ure te ande ti rika-ni! Ni nde na ande ti sa ni kuka iken ti tinyang. 28Ni jwam itinyang risu ande ti ku txun ni asu, ti ni nde tinyang na ande ti ku nde ni ira titibi. 29Asiti unde iki a tae fu kujwo ti kutapaen, kafe kutapaen ti ifaen na wu ti wu ā tae kyi. Asiti unde iki a ye pura kutupwa ti ti sī-fu, pu ititso umbyi-fu na fa wu meme. 30Unde ti a jwam ni iken, ni si na wu. Asiti unde iki a sa iken-ni iki, ni rang-ni awu ti wu nda ni ti atang be. 31Ni nde na ande iken ti tinyang pangma ti ani ku sha ti a na nde na ni.
32“Asiti ani a ye ure te ande ti ku ye ure te ni amam, i si kujwojang imi ti ani u tu uwae-yi? Ikyaen ti, ande ti nung-ba Rimam be ku nde ti mbwe-yi ama. 33Asiti ani a ku nde nyáng itinyang te ande ti ku nde na ni itinyang amam, imi ti nde ani ku sha kujwojang-ni? Ko ande ti putswa-ba icwe be ku nde itso iken yine. 34Ama asiti ani a ku sa iken na nyáng ande ti ani ku tang baa, aba na u pae na ni ti atang, kujwojang imi ti ani u tu uwae-yi? Ande ti nung-ba Rimam be ku si na atso ama ikyaen ti a u ru ba pae ba pae.
35“Ana-m ame ku ri te ni baa, ni ye ure te ande ti rika-ni ti ni nde ba itinyang. Ni si na ba, ni byib-ni aba ripab yi be. Ani a nde ahan, kujwojang-ni u ko timambe. Ani u si pangma Itse-ni Rimam ti skeb patag. Ikyaen ti, awu Rimam ku tso itinyang-wu ru ba uwog ande ti ku nde-ba fxaefa be, fa ti ande ti ku nde ikentitibi meme. 36Ame ku ri te ni baa, ni nung risi ande pangma ti Itse-ni ti apupwen ku nung ande ti ayibrisi.
Rikwen ti Pwen
(Matiyu 7:1-5)
37“Ni pwen-ni ande iki rikwen be, ikyaen ti Rimam ā ru ba pwen-wu ani rikwen ama be. Ni ri mbeb-ni ande iki be, ikyaen ti Rimam ā ri mbeb-wu ani ama be. Ni yata na ande ti ku nde ni ikentitibi ikyaen ti Rimam ama ā yata na ni ikentitibi-ni. 38Ni nda ande rinda, Rimam u nda ni ama. Kitu-ni u munn, ama a u sur wu sur u munn kyi yi cwucwo ka kwar ti ayi u yaen mbumbub! Iken ti afu myae na ande, si si ayi ti Rimam u myae ru ba na fu ama.”
39Yesu sunn kyi ira iki cwucwo baa, “Unde ti mbub ayib u tae tu unde ti mbub ayib a. Asiti awu a nde ayine patag-ba ifaen u ru ka jwunnsi-ba kukwae be a? 40Umbae ti ku kwen iken kwen ku nung iken skeb-wu unde ti ku kwen na wu be, amaa umbae ti a mam tag pu wu iken ti kwen-wu, awu ti unde ti kwen na wu pang atso.
41“Afu kyang rimang u ku nungye kirim ti ta uwae riyib inja-fu, amaa afu nungye-fu ti kucwub kutuku nae uwae riyib-fu be? 42Afu kyang rimang ku ri te inja-fu baa, ‘Shaenta riyib ti m u sa ru irum ti ta uwae riyib-fu,’ u nungye-fu kucwub kutuku ti nae uwae ana-fu be. Afu unde ti kufur, sa ru kucwub kutuku ti nae uwae riyib-fu titawe, isim yine afu u sae tu kirim ti ta uwae riyib inja-fu u sa ru yi.
Kutuku ti Awaen-wu
(Matiyu 7:16-20; 12:33-35)
43“Kutuku ti ku waen awaen ti nyang byibyae ku waen-wu awaen ti fufab be. Cwucwo kutuku ti ku waen awaen ti nunn ngangag ku waen-wu ti do byibyae be. 44Unde ku nungye kutuku titini ti awaen-yi. A ku kwaen-ba awaen kututung rimenn umbxab be. A ku kwaen-ba awaen anam rimenn usorikaen be. 45Unde ti tinyang munn ti itso wande ti tinyang riyaen utob-wu u ku nde wande te yi, amaa unde titibi munn ti itso iken titibi riyaen utob-wu u ku nde wande titibi. Ikyaen ti, ira ti ku tso unju unde si ira ti ta uwae riyaen utob-wu.
Ande Ifaen ti ku Mbye Asog
(Matiyu 7:24-27)
46“Ani kyang rimang ku kunn me baa, Itsekuru, amaa ani ku nde-ni iken ti ame ku ri te ni be? 47Unde titini ti a ru ba uwog-m u fxen ira unju-m u nae risu riben te yi, 48awu pangma unde ti mum kukwae umbyi kusog-wu u ta umbyi kusog-wu ti atxom. Kiye ti upwen a kum, kusog wu kyaensi-wu be ikyaen ti a ta umbyi-wu ti atxom. 49Unde ti a fxen ira-m u nde-wu ayi be, awu pangma unde ti mbye kusog uwog isabung u ta-wu umbyi-wu ti atxom be. Kiye ti ikya ukab munn, u ba yaen shag ijwe-wu, kusog wu tsi-wu tsi be u tummsi.”
Currently Selected:
Luka 6: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017