Kucangtsi 43

Yakubu Cwe ti Benjamin na Putsa Ameinja-wu Ru yi Ejib

1Rimenn ku nde ira beb ku fufa yi uten ti Kanana. 2Ti Yakubu ti ishikununn-wu ci tag pu ba wuci ti aba su ru uten Ejib ba, awu ri te anyisu-wu baa, “Ni kafe ru ti ni ka jab ra wuci pang ba kyi.” 3Amaa Yawuda ri te wu baa, “Unde wu fa ti kusen ti ufxenjwin ti ribom baa, ati na u nung-ti uwe-wu be, se ti ati na a te inja-ti Benjamin na ba pu ti tetso titawe. 4Itse, asiti afu a cwe ti inja-ti a te ti ru tetso, ati u ru ka jab wuci ba na fu. 5Amaa asiti Benjamin a ru-wu ama be, ati u ru-ti be, ikyaen ti unde wu ri te ti baa, ati na u nung-ti uwe-wu be, se inja-ti a te ti ba pu wu tetso.”

6Isirela rang baa, “Imi ti nde ani ri te unde wu baa, ani na site kyi inja-ni iki ti atang ama ku shir kicaeb utob ba na m?”

7Aba ri baa, “Unde wu rang ti ira risu-ti, ti ishikununn-ti meme baa, ‘Itse-ni ta ti unyang a. Ani site kyi inja iki a.’ Ama ati ri te wu ira yi ti awu rang ti. Ati nung ti imi ti awu na u ri te ti baa, ati na ka pu inja-ti na ba?”

8Yawuda jwam itse-wu baa, “Yata ti Benjamin ā te m ru tetso, ikyaen ti ati te fu ti anyisu-ti u cwu-ti rimenn be. 9Ame cwe pu m baa, afu na ye m. Asiti ame a pu umbae-fu kafe ba na-m afu be, riraen yi meme ā si risu-m. 10Ati som ku ci kiye bē ati ú kyang pu ti apu-ifaen tine.”

11Itse-ba Isirela ri te ba baa, “Asiti ayi a u nde kang ahan, iken ti ani u nde ta re. Ni pu awaen ituku ti tinyang ti ike ye su ka na unde wu rinyangwae. Ni sa kindob tsóri, ti kindob iwog ti umung nekoti ti kindob ladanum ti ayaen pistakiyo, ti ayaen alimon.#43:11 Tsori ti nekoti ti ladanum si acin ti iken ti ku nung kuyang ti a ku tu uten Isirela kiye wu. Pistakiyo ti alimon si awaen ituku. Meme-yi, ande Isirela ku jabci ku tu aser yang-yi atang. 12Ni sa aser asog ifaen fa ti ayi ti kucang ti ni sa kafe ru ka pae na ba. Iki be a ta riraen. 13Ni pu inja-ni fa ti atang ti ni nwunn ru kyi uwog unde wu. 14Rimam ti site kuko patag ā sae ni ti ayib risi-wu uwe unde wu, ti awu ā ya Simeyon ti Benjamin ta, ti aba ā kafe ba te ni. Asiti ame a shanum anyisu-m, ame ā shanum-m aba.”

15Ama aba pu rinyangwae yi, ti aser asog ifaen fa ti Benjamin u nwunn ye ikyin ru yi uten Ejib uwog Yusufu. 16Kiye ti Yusufu nungye Benjamin te ba, awu ri te upyi-wu ti ku nungkyi kusog-wu baa, “Pu ande bane ru yi kununn-m, ti fu ka wen ibye ti fu nde wuci, ikyaen ti, ame u te ba ci tetso usirtaen ne.” 17Unde wu nde ti mbwe-yi ti Yusufu ri te wu, u pu ande ba ru yi kununn Yusufu.

18Ama kiye ti a pu ba ka sang kusog Yusufu, ikyenricwu ye ba. Aba ku kab baa, “A pu ti ba ike ikyaen aser ti a ya ta ti uwae ibae-ti kucang. Awu ku sha ti wu u ye ti apyi, u shir pu tag ikyinnsu-ti meme.” 19Ikyaen yine aba ru ka tu upyi Yusufu ufu kusog u tsag akaen te wu. 20Aba ri baa, “Itsekuru, ati ba jab wuci ike kucang, 21ama kiye ti ati ru ka uwog ti ati pu unyang atang utitang wu, ati mbub ibae-ti ama u tu aser-ti ti mbwe-yi uwae isu-ti. Ikyaen yine ati kafe ru ba te yi. 22Ati ba te aser iki cwucwo ti ati u jab wuci atang. Ati nung-ti unde ti pu aser-ti kafe si ti tí uwae isu-ti be.”

23Unde wu ri te ba baa, “Pang atang. Ni kyen-ni ikyenricwu be. Rimam-ni, Rimam ana itse-ni, nda pu wu ani rifunn uwae isu-ni. Ame mbe pu m aser-ni.” Ama awu ka pu Simeyon ba na ba.

24Upyi wu pu ba ru yi kusog Yusufu, u nda ba ambyi ti a jwo afxen atang, u nda ikyinnsu-ba wuci. 25Aba byir rinyangwae-ba tsi ku ji itiba Yusufu usir itaen ikyaen ti, aba fxen baa, aba na u ci wuci atang. 26Ti Yusufu kafe ba kusog, aba pu rinyangwae ti aba ba te yi kusog atang, u ba ku riben uwe-wu. 27Yusufu rang ba baa, “Ani nde rimang? Itse-ni ti ani ri te m ira risu-wu ama re, awu ta ti unyang a.”

28Aba ri baa, “Upyi-fu, itse-ti, ta atang ti unyang ti kpakang-wu.” Ama aba ku riben, u nda wu rurob.

29Ti Yusufu pu ayib tso u sae ye Benjamin, umbae iya-wu, awu rang baa, “Awune ti si umbae ricwunnkyi-ni, inja-ni awu ti ani ri te m ne a. Rimam ā nde fu itinyang umbae-m!” 30Ti Yusufu pu ayib tso u sae inja-wu, ayi caeb wu uwae. Awu nwunn ku sha uwog ti awu u ru kaa jwub ira atang. Awu sang yi uwae kusog ti nae-wu u ru ka jwub ira atang. 31Isim ti awu jwub mam pu wu ira, awu fen iten ayib-wu. Awu ye utob u kafe ba tu ameinja-wu, u ri baa, a na ka wuci. 32A nda Yusufu wuci-wu, u nda ameinja-wu ana ba. Aba ande ti Ejib ti ku ci wuci atang ama ci se ana ba, ikyaen ti, ayi si icwe ti ande ti Ejib ku ci ren-ba wuci ti Mbaibrane be. Ayi ku txi ba iyib. 33A pu ameinja Yusufu som tebur te wu, bag tí ti ndufu ka sang ti ricwunnkyi. Ayi fe ba ayib, ama aba som ku sae atso. 34Aba pu wuci risu tebur Yusufu kan ku na ba, ama ana Benjamin skeb tag ana ko aye ti ta atang meme atsepu itsong. Ikyaen yine aba ci u ngwa u shwu tetso te Yusufu.

Currently Selected:

Kucangtsi 43: kubNT

Highlight

Copy

Compare