Itiruye 3

Musa ti Urwa ti ku Cwe Uwae Afub

1Uwae kiye wu ti Musa ku nungkyi asinn uyeb-wu Jetro, kukwen na Midiyan, awu pu asinn yi sang nyatsa kutur ka sang ti Horeb ti si rikwen Rimam. 2Atang atom Yaweh tso risu-wu uwog Musa uwae ajaen urwa ti ku cwe uwae afub. Musa sae urwa ku cwe uwae afub, amaa urwa wu twen-wu afub yi be. 3Musa kab baa, “Ame u ko kaa fer nyang iken yi ti ku fur ayib ayine. Imi ti nde urwa ku cwe uwae afub ama afub yi twen-yi be.”

4Ti Yaweh nung baa, Musa na ko ku ba ti wu na sae nyang iken yi, awu kunn Musa ira baa, “Musa! Musa!” Ama Musa cwe ira.

5Rimam ri baa, “Ko ba fer-fu ike be. Nwaen apwafxen-fu, ikyaen ti, uwog ti afu tsi atang ne, si uwog ti ku cwucwe. 6Ame si Rimam na itse-fu Ibrahim, Rimam na Ishaku, u si Rimam na Yakubu.” Ikyenricwu ye Musa, awu tam uwe-wu, ti ayib-wu na sae-yi Rimam be.

7Yaweh ri baa, “Kubenti, ame nung pu m rikaen ande-m yi Ejib. Ame fxen pu m ira ti jwub-ba ti aba ku jwub ku sha itinwangru uwae rikaen ti aba ku ngwa kujwo ande ti ta risu-ba. Ame nung rikaen ti aba ku ngwa. 8Ikyaen yine, ame si ba pu m ti m nwangru ba kujwo ande ti Ejib, ama ti m pu ba ru ye uwae uten Ejib ru yi riben ti riyaen ti nyang timambe, riben ti ku pang furr te akang ibyaen ti kindob iwog. Ayi si uwog ti ande ti Kanana ti ande ti Hiti ti ande ti Amor ti ande ti Perizi ti ande ti Hivi ti ande ti Jebusi nae atang. 9Kiye wune, ira ti jwub anyisu Isirela ka pu yi uwog-m, ame nung pu m rikaen ti aba ku ngwa kujwo ande ti Ejib. 10Ba ti m tom fu tom uwog Ukwe ti Ejib ti fu ka pu ru ye ande-m, anyisu Isirela, uwae uten atang.”

11Musa ri te Rimam baa, “Ame si aye ti ame u ru uwe Ukwe kaa pu ruye anyisu Isirela uwae Ejib?”

12Rimam ri baa, “Ame u te fu ta tetso. Iken ti u tso baa, ame ti na tom fu si ti: Kiye ti afu a pu ruye pu fu ande ba uwae Ejib, ani u ba fen Rimam yi rikwen wune.”

13Ama Musa ri te Rimam baa, “Asiti ame a ka uwog anyisu Isirela, u ri te ba baa, ‘Rimam na abitse-ni tom m atom uwog-ni,’ ama aba a rang m rinyi-wu, ame u ri ba imi te ba?” 14Rimam ri te Musa baa, “AME TI SI AME TI TANE. Ri te ba ira yine baa, ‘AME TI SI AME TI TANE, tom m ba uwog-ni.’ 15Ri te kyi anyisu Isirela baa, ‘Ame Yaweh, Rimam na abitse-ni, Rimam na Ibrahim ti Ishaku ti Yakubu ti tom m ba uwog-ni.’ Awune ti si rinyi ti ani ti meme anyisu-ni ti ku ba isim u kunn m atang ru fife yi uwe. 16Ru ka kunn funn ande ndufu Isirela ti fu ri te ba baa, ‘Yaweh, Rimam abitse-ni, Rimam na Ibrahim ti Ishaku ti Yakubu, tso pu wu risu-wu te m, u ri baa, “Ame nung pu m ani, ti rikaen ti ande ti Ejib ku nde ni. 17Ama ame yer unju baa, ame na u pu ruye ni uwae rikaen yi Ejib, ru yi riben na ande ti Kanana ti ande ti Hiti ti ande ti Amor ti ande ti Perizi ti ande ti Hivi ti ande ti Jebusi, riben ti ku pang furr ti akang ibyaen ti kindob iwog.” ’ 18Ande ndufu Isirela u fxen fu. Afu ti ande ndufu Isirela u ru uwog ukwe ti Ejib kaa ri te wu baa, ‘Yaweh, Rimam na Mbaibrane tu pu wu ati. Ati ku jwam fu, nda ti usir ita ti ati u ru ikyin yi kutur kuka kaa twen ikentitwen na Yaweh, Rimam-ti.’ 19Ame nung pu m baa, ukwe wu na u cwe-wu ti ni na ru be, se ti awu a nung pu wu kpakang-m. 20Ikyaen yine, ame u tso kuko-m, u nde iken ti ku fur ayib uwae Ejib. Ame u nde ba ira bebeb ama ikyenricwu u ye ba. Isim-yi, ukwe u ya ni ta, ani u ru.

21“Ama ame u nda anyisu Isirela kutxuwe ti tinyang uwe ande ti Ejib. Kiye ti ani a ta ti ru, ani u ru ye-ni ajwo ukaen be. 22Unda Isirela titini ā rang unde ice-wu fa ti unda ti rikyen ti ta kununn-wu rinyangwae atupwa ti iken ti a kyae yi ti azurfa ti zinariya. Ama ani u pu yi si anyisu-ni ti arom ti ti anda. Yi fengo wune, ani u kwae pu rifunn ande ti Ejib ru.”

Currently Selected:

Itiruye 3: kubNT

Highlight

Copy

Compare