Itiruye 27
27
Kuta Ikentitwen
(Itiruye 38:1-7)
1“Kwer na m kuta ti ituku akasiya, ti rikob-wu ā si afxen itsongfaen ti ripye, riyaen-wu ā si afxen itsongfaen ti ripye, rikob-wu ti ritsen ā si kutun kujwo ita. Riyaen kuta wu, ti rikob kuta wu, ā pang atso. 2Kyae ishin tso meme ukub inje yi. Ayi ā ren te ijwe kuta wu, ama u fxebkyi ijwe-yi ti bronzi. 3Kyae meme isu ti a u nde wuci atang te bronzi. Isu yi ta re: kututong ti a u kwae itong atang, ti shebur, ti atu tiyaen, ti kufur ti site khika ti a ku ter ibye atang, ti kuseb ti a ku sa urwa atang. 4Kwen bronzi ti riyaen-wu, ama ti mbog kiye mbog kiye atang, ti a ku pu ituku sang mbyi-wu. Kwen kunyang inje sang ukub inje ana bronzi ti riyaen wu. 5Sa bronzi ti riyaen wu naesi uwae kuta wu. 6Pab ikum kutuku akasiya ti fu shi yi te bronzi. 7Pu ikum yi sang kunyang yi ikyaen ti aba ā ku su yi te yi. 8Kyae kuta wu ti awu ā site kú rubwen uwae. Kyae wu pangma ti ame tso fu utaen rikwen.”
Tabshi Kufug Uwog ti Som Yaweh
9“Pu atupwa lilin fae pakob tabshi kufug Yaweh wu. Myae rikob utab wu iyen ti kujwo isi utab kufug uwog ti som Yaweh wu ti awu ā si afxen ukob kinjo ti mae ifaen mbe rijwe. 10Kyae ukwae bronzi ti fu pu ikum bronzi rikom sim si atang, ama ti pu atupwa yi kyensi atang. Kyae ukwàb risu ikum yi te azurfa ti a pu atupwa yi faesi atang. 11Ti mbwe-yi rikob ti kujwo isku ā si afxen ukob kinjo ti mae ifaen mbe rijwe. Kyae ukwae bronzi rikom, ti fu pu ikum bronzi rikom yi sim si atang. Kyae ukwab risu ikum yi ti zinariya ti a pu atupwa yi faesi atang.
12“Myae utab uwe ti usir kujwo ureb afxen mae ita mbe rijwe asu itsong. Kyae akwae rijwe, ama u pu ikum rijwe sim si atang, ti a pu atupwa yi kyensi atang. 13Riyaen utab wu uwe usir ti kiskinn ama u si afxen mae ita mbe rijwe asu itsong. 14Riyaen kutupwa ti kyensi iyen kinjo ana ufu ti ku sang uwae utab wu u si yadi itsongfaen ti ripye. Kyae akwae ita u pu ikum ita sim atang, ama u pu kutupwa wu faesi atang. 15Iyen ti ifaen ama, riyaen kutupwa wu u si yadi itsongfaen ti ripye. Kyae akwae ita u pu ikum ita sim atang, ti a pu atupwa wu faesi atang. 16Riyaen kutupwa ti a pu kyensi ufu wu u si yadi rijwe. Kutupwa wu, a u ndxob wu ti itub lilin ti ti rikàen-yi ru irum titisub ti ti ru itibyaen ti itibyaen. 17Meme ikum yi ti sim utab wu, a shi risu-yi te azurfa. Akwàb-yi ama, a kyae yi te azurfa. Akwae ti a pu ikum yi sim atang, a nde yi te bronzi.
18“Rikob utab wu u si afxen ukob kinjo ti mae ifaen mbe rijwe. Riyaen-wu ama u si afxen mae ita mbe rijwe asu itsong. Riyaen kutupwa wu ti nwunn riben tso risu ikum yi ti sangkob utab wu u si yadi ifaen ti ripye. Kutupwa wu, a ndxob ti itub ti tinyang titsen, ama kyae akwae ikum yi te bronzi. 19Meme isu wande uwae kufug Yaweh wu, ti ituku ti pang pang ti a pu sim ikyaen ti ayi na ye ribom kufug wu, ti ayi ti a sim ti yi na ye ribom ikum ti sangkob utab wu, a kyae yi te bronzi.
Kindob na Fitila
(Akwen 24:1-4)
20“Ri te anyisu Isirela ti a sa kindob olifi ti tinyang ba ikyaen ti a sa si fitila, u bae urwa atang, ti awu ā tsikunn ti ku cwucwe. 21Ni ye fitila wu tsi uwae kufug úfunn Yaweh#27:21 kufug úfunn Yaweh Uwog ne, Musa ku kunn Uwog ti som Yaweh baa, “kufug úfunn Yaweh” ti ku tatso baa kufug wu na si uwog ti Rimam te ande ku nde úfunn atang. wu, uwe kutupwa ti a sa yer kyi akpati unju ti yer atang. Aruna ti anyisu-wu ti arom ā tsikunn ti ku nda urwa wu ku cwucwe uwe-m ti ureb ba sang kiskinn ko usir titini. Ayine si icwe ti ani anyisu Isirela ti anyisu-ni ti ku ba isim u ye su ru fife yi uwe.
Currently Selected:
Itiruye 27: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
