Itiruye 22
22
Icwe Risu Riyib ti Yib
1 # 22:1 22:1 si 21:37 uwae kutsingken Mbayawuda. “Asiti unde iki a yib indag ko iwen ama u ye yerwen, ko awu a sa jabci, awu ā pae indag itsong ikyaen indag kinjo, iwen inje ama ikyaen iwen kinjo.
2 # 22:2 22:2-31 si 22:1-30 uwae kutsingken Mbayawuda. “Asiti a ye unde ti riyib ti byinn mbub ufu kusog u ku yib riyib utitang, ama aba a kum wen wu, anying-wu tá risu unde ti wen wu be. 3Amaa asiti a byinn wen unde ti riyib wu usirtaen, anying-wu ta risu unde ti wen wu.
“Unde ti riyib ā pae kang iken ti awu yib, amaa awu a si-wu ti iken ti awu u pae be, ni sa wu jabci upyi ikyaen iken ti awu yib. 4Asiti a ye wu ti asinn wu ti awu yib ti unyang kujwo-wu, ko awu a si indag ko ikyinnsu ko mbawen, unde ti riyib wu ā pae kang asinn yi ifaen ikyaen asinn kinjo ti awu yib.
5“Asiti unde a pu asinn-wu kaa kub irum uwog iki ko uwae risaen ituku anam-wu, asiti awu a ya asinn yi ta ka sang uwae risaen unde iki u kub irum atang, awu ā tsab risaen-wu ko risaen ituku-wu ti nyang siskeb u sa pae upae yi atang.
6“Asiti unde iki a ku ta apaen-wu, ama urwa a nde ram-ram ka sang uwae rukong unde ice-wu u twen mbub wuci ti a byir tsi ko ayi ti a bunn-ba khika be, awu ā pae meme iken ti twen mbub.
7“Asiti unde iki a sa aser ko isu-wu iki na unde ice-wu ti wu na sa nae ka wu, ama riyib a ba yib ra-wu aser yi ko isu yi kununn unde wu, asiti a ye unde ti riyib wu, awu ā pae iken ifaen ikyaen iken kinjo ti awu yib. 8Amaa, asiti a ye-ba unde ti riyib wu be, aba ā pu unde ti kununn wu ba uwe Rimam ti awu ā ba ben uben baa, ayi na si-yi awu ti na yib aser yi ko isu yi be.
9“Asiti ande ifaen a ku txwa atso risu iken iki, ko ayi a si indag ko ikyinnsu ko iwen ko atupwa, ko ayi a si iken ti a yag byibyinn, aba ā pu ande ifaen ba ba uwe Rimam. Unde titini ti Rimam#22:9 Rimam Unju Mbaibrane ike a bae baa, “elohim”, umbyi ira yi iki si ande ti ku pwen rikwen. a ye wu te riraen, awu ā pae na unde ti ifaen-wu iken ifaen ikyaen iken kinjo ti kutxwa yi ta risu-wu.
10“Asiti unde a sa indag ko ikyinnsu ko mbawen ko asinn-wu iki na unde ice-wu ti rishi, ama asinn wu a cwu-wu ko awu a tu kicaeb ko awu a ter ru-wu ti unde iki nung-wu uwog ti awu ta atang be, 11a u pu ande ba ba uwe Yaweh, ama unde wu ti mbe asinn wu ti rishi u ba ben uben baa, kubenti awu na nde-wu asinn wu unghae be. Unde ti asinn wu u cwe ama u kyeb upae na-wu unde ice-wu awu be. 12Amaa ayi a si riyib ti a yib asinn wu kujwo-wu, awu ā pae na kang unde ti asinn wu iken ti a kyeb na wu. 13Asiti ayi a si ibye kutur ti a ye wu shir yer, awu ā sa rukom-wu ba tatso unde ti asinn wu. Awu u pae-wu iken iki ikyaen asinn ti ibye kutur wen be.
14“Unde iki a mbe asinn ti rishi kujwo unde ice-wu, ama a ter wu iken ko awu a cwu-wu kiye ti unde ice wu a ta-wu atang be, unde ti mbe asinn wu ā pae meme iken ti a kyeb na wu. 15Amaa, unde ti asinn wu a ta te asinn wu atang, unde ti mbe asinn wu u pae-wu iken iki be. Asiti awu a mbe asinn wu uwae aser, aser yi amam ti awu u pae.
Icwe Usom Ti som Te Ande
16“Asiti unde a bwa wandab ti a ye-ba isam-wu khika be, ama u nung-wu urom khika be, u nae te wu, unde wu ā pae iken ti risu wandab wu, ama u pu wandab wu mbe. 17Asiti itse wandab wu a pyir-wu, u pu wandab wu na-wu unde wu be, unde wu u pae kang iken ti risu wandab wu.
18“Ni wen unda ti kisi wen.
19“Unde titini ti a nae te ibye, ni wen wu wen.
20“Unde titini ti a twen ikentitwen na iken iki fa m ifaen, ni twenji wu.
21“Nde-fu rikyen iyib be, ko ti fu sir wu sir be, ikyaen ti, ani ama si ji pu ni rikyen yi uten Ejib. 22Nde-fu awa icwu ko anyisu ti shanum iya ti itse itibi be. 23Asiti ani a nde ba itibi, aba a jwub ira tu m, kubenti, ame u fxen ira ti jwub-ba. 24Rinae-m u si ba risu-ni. Ame u wen ni ti kisum wen ti awa-ni u kafe awa icwu, anyisu-ni ama u shanum te abitse.
25“Asiti afu a ci ripab aser na ande-m ti rikaen, afu a ba ku mbe yi, mbe-fu ayi ti atxwa risu-yi be. 26Asiti unde ice-fu a pu arunn-wu na fu lele, pu kafe na wu ti ti usir sunn-wu khika be. 27Ikyaen ti ayi si kutupwa wu ti awu ku bur rijwen te wu u ku si sí awu amam. Awu u nae rimang? Asiti awu a jwub ira tu m, ame u fxen ira ti jwub-wu, ikyaen ti ame site ayibrisi timambe.
28“Txun mbeb-fu Rimam, ko unde ti uwe ande-fu be.
29“Kiye ti afu a bunn pu fu wuci risaen ufang, ko afu a kam pu fu awaen ituku anam, ci-fu kiye ti fu pu isen-yi ba na m be.
“Yerkob na m umbae ti urom titawe na anyisu-fu. 30Afu u nde ti mbwe-yi te indag ti mbawen-fu. Asinn ti a mbae imbae tishir, a ya wu ta te iya-wu ka usir itsongfaen. Usir ti itsongta, afu u yerkob wu na m.
31“Ani ā si ande-m ti sisaen ti a yer kukob na m. Ikyaen yine, ni kub-ni ibye ti ibye kutur wen be. Ni pu yi tā ipxu.
Currently Selected:
Itiruye 22: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
