Itiruye 1
1
Isirela Ngwa Rikaen Uwae Uten ti Ejib
1Rinyi anyisu Isirela ti te Yakubu si yi Ejib tetso, unde titini te ishikununn-wu ta re: 2Roben ti Simeyon ti Lawi ti Yawuda, 3Isakar ti Zebulun ti Benjamin, 4Dan ti Nafitali ti Gad ti Asher. 5Meme anyisu Yakubu ka mae ita mbe rijwe fa ti Yusufu ti ta mam pu wu uwae uten Ejib. 6Ba kiye iki, Yusufu ti ameinja-wu ti ande ti kiye wu meme cwu tag. 7Amaa, anyisu Isirela mbae jwunn timambe. Aba mbae yag yag u bom ku fufa, ama u shag kyife uwae uten atang.
Bagtsi na Rikaen Anyisu Isirela
8Kiye wu, a nae ukwe tishe yi Ejib ti nung-wu Yusufu be. 9Awu ri te ande-wu baa, “Nung, anyisu Isirela jwúnn, u kpag ku skeb pu ba ati. 10Ni ba ti ti nde kang fengo ti ti kosi ujwunn-ba, be, asiti rika a nwunn, aba u ren risu ti ande rika-ti, u ta ti rika, ama u ter nwunn uten ike.” 11Ikyaen yine, ande ti Ejib pu anyisu Isirela kafe apyi-ba. Aba pu ande ti uwe ta risu-ba ti ku taen ba ti a na nde wande ti kpag skeb ba. Aba mbye pakob Pitom ti Ramesi, uwog ti a ku pu wuci ukwe tsi atang. 12Amaa ko ti ande ti Ejib ku nde anyisu Isirela rikaen, anyisu Isirela mbae jwunn ku fufa, u shag kyife uten atang. Ama ikyenricwu anyisu Isirela ye ande ti Ejib. 13Ikyaen yine, aba nda anyisu Isirela nde wande ti kpag timambe, 14u nda usom ti som-ba nunngag. A nde ba rikaen beb timambe u nda ba ti a na pxag ariben u byinn biriki, ti itso wande ti rimang meme. Yi uwae wande anyisu Isirela meme, ande ti Ejib nde ba rikaen ti skeb risu.
15Ukwe ti Ejib ri te Shifira ti Puwa, anda ifaen ti ku mbe umbae awa Mbaibrane baa, 16“Kiye ti ani a ku mbe umbae awa Mbaibrane, asiti umbae wu a si umbae ti urom, ni wen wu, amaa asiti awu a si unda, ni wen-ni awu be.” 17Amaa, anda ba kyen ikyenricwu Rimam, u nde-ba pangma ti ukwe Ejib ri te ba be. A ya anyisu ti arom ba ta ti unyang. 18Ikyaen yine, ukwe ti Ejib kunn anda ba ti ku mbe umbae bane ru ba, u rang ba baa, “Ayine si imi ti ani nde ti ani ya anyisu ti arom ba ta ti unyang?”
19Anda ba ri te Ukwe baa, “Awa Mbaibrane ku ci-ba kiye yi umbae ti pwe-ba be. Aba kpag timambe ku mbae ra umbae-ba titawe anda ti ku mbe umbae ku ba uwog-ba.” 20Ikyaen yine Rimam nde anda ifaen bane itinyang. Anyisu Isirela ama mbae jwunn u kpag ku fufa. 21Ti anda ti ku mbe umbae bane kyen ikyenricwu Rimam né, Rimam nda ba, aba mbae anyisu ama. 22Ukwe ri te meme ande-wu baa, “Meme anyisu ti arom ti a mbae na Mbaibrane, ni ye ba jwunnsi uwae uyinn Nel. Amaa, awu a si unda, ani ya wu ta ti unyang.”
Currently Selected:
Itiruye 1: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
