Daniyel 8
8
Ira ti kitam ti Daniyel Sae Risu Iwentam ti Iwenten
1Uwae kusang ti ita ti Belishazar nae ukwe, ame Daniyel sunn kyi kurwa isim kurwa ti ame sunn pu m pu pu. 2Iken ti ame sae uwae kurwa yi si ti, ame sae ijwe-m uwae Susa uten tiyang ti ta uwae uten Elam. Uwae kurwa yi, ame tsi unju unyim Ulayi. 3Ame pu ayib tso ama sae ye Iwentam tishir iki tsi yi unju uyinn wu. Awu site ishin ifaen, meme ishin yi wuwae, amaa, kinjo wae skeb kinjo skeb. Awu ti wae siskeb ne ba tsoye isim. 4Ame sae Iwentam wu ku ca pu iken ti ta uwe usir ti ureb, ti uwe ti isku, ti uwe ti isi. Ibye anyi iki ta-wu ti tsi tu te wu be, unde iki ama ta-wu ti u nwangru tu kujwo-wu be. Awu nde iken ti nyang uwae-wu u yetso ijwe-wu.
5Ti ame ku kab ira risu iken yine, ame sae Iwenten tishir iki ru usir kujwo ureb ba rutsa uwae utense. Afxen-wu tekunn-wu riben be. Iwenten wu site ishin iki ti mbug tsoye ikub uwe-wu pampam. 6Iwenten wune ru ba uwog Iwentam wu ti ame sae wu tsi unju unyim, ti site ishin ifaen né, u rwaetsa wu uwae rinae. 7Ame sae awu ba fer Iwentam wu uwae rinae u ca wu ishin, u ca mber wu ishin-wu meme ifaen-yi. Iwentam wu kpag-wu ti wu tsi tu te Iwenten wu be. Awu ceb pu wu si riben u ceb wu te afxen, ama unde iki nwangru tu-wu Iwentam wu kujwo Iwenten wu be. 8Iwenten wu kpag fufa, amaa, kiye ti awu kpag mbeb, ishin ti kpakang wu mber ru. Uwog ti ishin wu mber ru atang, ishin inje mbug tsoye atang rukwer ikub inje na utense.
9Ishin ti kiyib iki mbug tsoye ijwe ishin kinjo uwae ishin inje yi ne, u ser tso u kpag timambe yi uwe ti ta ru iyen ti isi, ti uwe ti ru usir ti kiskinn, ti uwe ti ru yi riben ti site riyinn timambe#8:9 riben ti site riyinn timambe Riben Isirela.. 10Ishin wu ser, ama kpakang-wu tso ka ti akyirten ti apupwen. Awu rug pu ariki uwae-ba si riben, fa ti ariki uwae aswer ti apupwen. 11Ishin wu myae risu-wu te ukwe rika ti apupwen#8:11 Ukwe rika ti apupwen si Rimam., u byangkyi iken ti twen ti a ku twen na Rimam usir usir, ama sormbeb ukag-wu ti sisaen. 12Ikyaen risu ti kpag ishin wu, a nda wu awu ta risu akyirten ti apupwen#8:12 Ariki ku ri baa imbyi ira “akyirten” yine si ande Rimam., ti iken ti twen ti a ku twen kob na Rimam usir usir. Awu kafe risu kubenti sī riben ama ku tu itiru yi uwe uwae wande-wu.
13Tiri ame fxen atom Rimam ti saen kyag iki ku ri ira, ama atom ti saen kyag iki cwucwo rang awu ti ku ri ira ne baa, “Ayi u ba kwer isinn ti kurwa risu iken ti twen ti a ku twen na kob Rimam u ba mamtag? Isinn ti ira risu itikpag risu yine ti ku shir na uten ku ukaen u kunmunn, isinn ti a u fxae itisombeb ukag ti saen kyag, ti iticeb akyirten ti apupwen, fa afxen?”
14Ama awu ri te m baa, “Ayi u ka ureb ti kiskinn kumbub ifaen ti ukob ita (2, 300) titawe ukag ti sisaen wu u kafe ba saen ti mbwe-yi.”
Itiri Imbyi Ira ti Kitam yi
15Ti ame Daniyel ku kwab ti m na u nung imbyi kurwa yi, ama ti m nunung, iken iki tsi uwe-m pangma unde. 16Ama ame fxen afxenjwin yi unju uyinn Ulayi baa, “Jibirilu, tsag imbyi kurwa yi te unde wune.”
17Ama Jibirilu wu ko ba fer m yi uwog ti ame tsi atang. Kiye ti awu ko ba, ikyenricwu ye m, ama ame sī ka nae u sa uwe-m bur riben. Amaa, awu ri te m baa, “Unde! Nungye baa, kurwa yi ku ri ira risu kiye ti ricwunnkyi.”
18Ama kiye ti awu ri tag pu wu ira te m, ame si kicwag burrr ti uwe-m bur riben atang. Amaa, awu tekunn m, u ye m nwunn ritsen.
19Awu ri baa, “Ame u ri te fu iken ti u ba nde uwe ike kiye rinae Rimam, ikyaen ti, kurwa yi ku ri ira risu kiye ti a sa tsi ti ricwunnkyi. 20Iwentam tishir wu ti site ishin ifaen ti afu sae né ku tso ukwe na Madai ti ukwe na Pasiya. 21Iwenten tishir wu ama si ukwe uten ti Grisi. Ishin ti tso ikub uwe-wu pupam né si ukwe ti tawe. 22Ishin wu ti mber ru, ama ishin inje yi ti ba tsokyi ne ku tatso baa, ajwokwe inje na u ba tsoye uwae kujwokwe-wu, amaa, ayi u kpag-yi pangma awu be.
23“Kiye ti kujwokwe-ba a fer pu yi ricwunnkyi ama ikentitibi ande titibi a ka pu yi ice, ukwe ti kpag utob, u nung imbyi ira ti kitam u nwunn. 24Awu u si ukwe ti kpag timambe, amaa, ayi u si-yi kpakang-wu be. Awu u ndembeb iken timambe ama u tu itiru yi uwe yi meme iken ti awu ku nde. Awu u wenji yangkam ti ande ti saen kyag. 25Awu u ru itsab, u nda itikyaefa-wu ru yi uwe, ama awu u sa tsi uwae-wu baa, awu na skeb titag. Awu u purug ande u wen ba, ama u nwunn tsi ikub te Ukwe ti skeb abikwe. Awu u cwuji, i si-yi unde iki ti u wen wu be.
26“Kurwa yi ti a tsag te fu baa a na u byang kyi iken ti twen kiskinn ti ureb si kubenti. Amaa, tam yi tam. Ri-fu ayi te unde iki be, ayi ku tatso ira ti u ba uwe.”
27Ama ijwe-m Daniyel namtur, ame nae kicaeb ka usir ba iki. Isim-yi ti ame nwunn kicaeb yi, ame kafe ru ti unju wande-m yi fenkyi ukwe. Amaa, kurwa yi fur m ayib ikyaen ti, ame nung-m imbyi-yi be.
Currently Selected:
Daniyel 8: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017