Daniyel 10

Daniyel Sae Ira ti Kitam Risu Atom Rimam

1Uwae kusang ti ita ti Saerus nae ukwe risu uten ti Pasiya, Daniyel ti rinyi wu iki si Beteshazar, kutsa ti kitam ru ba sang Daniyel utob. Awu nungye baa, ira ti kitam yi na ta risu iken ti u ba nde kang uwe ike. Ayi na u si kye na rika, ama rikaen ti beb timambe u pu uten.

2Kiye wu, ame Daniyel ta uwae utob tibyir ka kutsab ita. 3Ame ci-m iken ti ashab be. Ame kub-m ibye be, u ngwa-m ambyi anam be, u shi-m kindob be uwae kutsab ita yine ti rimunn.

4Yi ushaen titawe ti usir wu si rikom asu inje, ti ame tsi unju uyinn tiyang Tigrisi, 5ame pu ayib tso, ti m nunung, unde iki sī atupwa ti tsen u yir byeti ti a kyae wu te riyib zinariya imbyi. 6Ijwe unde-wu ku jijae pangma kutxom berili. Kutxuwe-wu ku jae wur wur pangma imam ti jae. Ayaen ayib-wu ku cwe urwa wur wur. Ajwo-wu ti afxen-wu ku jae wur wur pangma bronzi ti a twen wu twen. Awu tum ira pangma ujwunn ande yang-ba akwen.

7Ame Daniyel amam ti sae iken ti kitam yine. Ande ba ti tsi te m sae-ba yi be, amaa, ikyenricwu ye ba, ijwe-ba ku fufwer, aba ter ka titam. 8Ikyaen yine, a ya m ta kum ame, ama ame sae iken ti ku fur ayib yine. Ijwe-m ama namtur, uwe-m myae jwoo, ama ame si-m te kpakang cwucwo be. 9Tiri, kiye ti ame fxen unde wu ri ira, ame jwunn si riben u sa uwe bur riben ama cwag ru.

10Ti m nunung, a sa kujwo tekunn m ti nda ijwe-m meme ku fufwer. 11Ama awu ri te m baa, “Daniyel, afu unde ti a site ure te fu timambe, fxen ira yi ti a tom m ba ku ri te fu ne nyinyang, ti fu nwunn ritsen.” Kiye ti awu mam pu wu ira yine te m, ame nwunn ritsen ti ijwe ti fwer.

12Tiri awu ri te m baa, “Kyen-fu ikyenricwu be, Daniyel. Ikyaen ti, ti usir titawe ti afu sa uwae tsi, u sha itinungye, u nae risu riben uwe Rimam-fu, Rimam fxen pu wu itijwam-fu, ama ame si ba ikyaen ira-fu ayi. 13Kiye ti ame si ku ba, ukwe na kujwokwe Pasiya kwab ukwab te m ka usir rikom asu kinjo, amaa, Mikayel, kinjo uwae atom ti uwe atom ti apupwen si ba ndeya m ikyaen ti, ame amam ti fa abikwe na Pasiya. 14Ame si ba ti m nda fu itinungye ira ti u ba tu ande-fu uwe ike, ikyaen ti, ira ti kitam yine ku tso ira ti u ba nde uwe ike.”

15Kiye ti awu ri mam ira-wu ayi te m, ame sa uwe-m bur riben ama unju-m tsukyi. 16Ti ame u nunung, atom iki ti ru unde, sa kujwo tekunn apwa unju-m, ama ame mbub unju u sang ira ti ti ri, u ri te unde ti tsi uwe-m baa, “Itsekuru-m, ira ti kitam yine, caeb m ijwe u nda ijwe-m nam tur. 17Ame upyi-fu u nde rimang u tsag akaen te fu itsekuru-m? Ame si-m te kpakang iki be, unyang ku kunn me kunn.”

18Tiri atom wu ti ijwe-wu rukwer ijwe unde ne sa kujwo tekunn kyi m ama ame tu kpakang ijwe.

19Ama awu ri baa, “Afu unde ti Rimam site ure te fu timambe, kyen-fu ikyenricwu be. Kujimshwur ā te fu ta tetso. Tsi ting ting ti fu ye utob.” Ama ti awu ri ira yine te m, ame tu kpakang u ri baa, “Itsekuru-m, ri-fu ira tine ikyaen ti, ame tu pu m kpakang tiri.”

20Tiri awu rang baa, “Afu nung iken ti nde nee ame si ba uwog-fu a. Tine, ame u kafe ru kaa tā rika te ukwe kusung titibi na Pasiya. Nung, kiye ti ame a ru pu m, atom ti ku nungkyi Grisi kaa ba. 21Amaa, ame u ri te fu ira ti a bae uwae kutsingken ti kubenti. Unde iki ta-wu ti u ndeya m be, si nyang Mikayel atom ti ku nungkyi anyisu Isirela amam.

Currently Selected:

Daniyel 10: kubNT

Highlight

Copy

Compare