Amos 4
4
Ande Isirela Ye Su-ba Iken ti Kwen Rimam Be
1Ni fxen ira yine,
ani anda ti som Samariya
ti kem pangma indag ti Bashan.
Ani ti ku sir awakaen sir,
ti ku sher myae ande ti shanunum,
ku ri kob te abaen-ni baa,
“Ni sha na ti iken ti ngwa!”
2Yaweh Itsekuru ben uben
yi itisaenkyag-wu baa,
“Usir ku ba ti a u shir ni
ru ye uten-ni,
pangma iwag ti a ku shir tso
uwae ambyi ti kurgiya.
Ko unde ti tine uwae-ni,
a u shir ra wu ru ye
uwae uten-ni.
3A u shir ni ndáe ndáe ndáe
putsa aye ukoh ti mbumbub ru ye,
u pu ni yen
kaa jwunn si kanjag Hamon.”
Yaweh ti ri.
4“Ni ru Betel
ti ni ka nde-ni ikentitibi-ni ayi!
Ni ru Gilgal
ti ni ka nde-ni ikentitibi-ni
yae ijwe!
Ni twen-ni iken ti twen-ni ayi
kiskinn kiskinn,
pangma ti ani ku twen kob.
Ni sa ru kinjo uwae iken rijwe-ni
pangma ti ani ku nde kob né.
5Ni ru yi uwe pu buredi ru ba
nda Rimam rinyangwae kufxaefa.
Ni ru yi uwe
ti rinyangwae ijwe ti ndub-ni ayi!
Ikyaen ti,
ayine si iken ti Isirela ku sha!”
Itsekuru Yaweh, ti ri.
6“Ame sa rimenn sang
kyife uten-ni meme,
u nda ni shanum ti wuci,
yi meme uwog ti som-ni.
Kweme ayine,
ani kafe ba-ni uwog-m be.”
Yaweh ti ri.
7“Cwucwo,
ame byang ni upwen
kiye ti ayi tsitsi ishaen ita
ti wuci u ben.
Ame sa upwen tsa uten iki
u ya uten iki ta.
Uwae risaen ufang iki
upwen tsa atang,
uwae risaen ufang iki ama
wom tag karang.
8Ande ku yág ha ha ha,
nwunn uten ne ka sang uten ne,
ku sha ambyi,
ama a tu ben-ba ayi be.
Kweme ayine,
ani kafe ba-ni uwog-m be.”
Yaweh ti ri.
9“Ame nda uwae rukong-ni
jang mbeb,
u tom akurùg ti anyìnyīnn
sang kub ndembeb wuci-ni.
Atsing utong-ni wom cwu tag
uwae risaen ufang,
ituku anam ama wom cwu tag
uwae rukong.
Ituku kututong ti ituku olifi-ni,
icwag pu kub tag.
Kweme ayine,
ani kafe ba-ni uwog-m be.”
Yaweh ti ri.
10“Ame tom kicaeb ti ujwunn
sang kutampwa-ni
pangma ti ame tom sang Ejib.
Ame pye wen anyisu itaen-ni
te kisum wen,
u ye pu kakum-ni ru.
Ame nda kufug rika-ni
ku nung akong ruwen-ni.
Kweme ayine,
ani kafe ba-ni uwog-m be.”
Yaweh ti ri.
11“Ame twenji ariki uwae-ni
ma ti ame twenji Sodom ti Gomora.
Ani si pangma kutuku
ti a jwae ru ye uwae urwa.
Kweme ayine,
ani kafe ba-ni uwog-m be.”
Yaweh ti ri.
12“Ikyaen ayine,
ame u fxer tsi ni, ande Isirela!
Ikyaen ti,
ame u nde kang-m iken yine te ni,
ni fab benti-ni nyinyang
ti ni somji Rimam-ni!”
13Nung baa,
awu ti mam rikwen ti ufunn,
u sa ira ti kab-wu tatso ande.
Awu ku sa kiskinn kafe kufub.
Awu ti ku kyang asu rikwen
ti ta utense meme.
Rinyi-wu si Yaweh,
Rimam ti si Ukwe Rika.
Currently Selected:
Amos 4: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
