aMatiyu 5
5
aWazi aYeso natoon kawhanang
1aYeso tá fa di rigwo̱m ánerawe whe̱re̱ tá nyim, iyong a ngarak natoon kawhanang kakak nong a tá sonong. Álimazhiri wu tseng nufu, 2ayong a san ku kabo̱so̱p ba'me ye:
Aner riye̱ rikan ne a nye
(aLuk 6.20-23)
3“Áner riye̱ rikan ne á nye aner aya a ta ren kuraar ba kaye̱e̱r kabik,
kamok rigwo̱m kaza nye rifuba.
4Áner riye̱ rikan ne á nye aner aya a ta se kaye̱e̱r riye̱ riwe,
kamok Adakunom tù ku tsesek ba.
5Áner riye̱ rikan ne á nye aner aya a ta mees rice ba,
kamok ba ne á tà ya kazatse.
6Áner riye̱ rikan ne á nye aner aya a ta be ifeng ne á shim kunye ike̱re̱ iya i ta se gye̱r nasho̱o̱n Adakunom,
Adakunom tu ku no̱o̱k ba ike̱re̱ ife ba tà shim'e.
7Áner riye̱ rikan ne á nye aner aya a ta be kuro̱ riye̱
kamok Adakunom tà ro̱ riye̱ ba gip.
8Áner riye̱ rikan ne á nye aner aya aye̱ ba ta se zhe̱l,
kamok ba ne a tà di Adakunom.
9Áner riye̱ rikan ne á nye aner aya a ta shim kugung rice,
kamok a tù ku yis ba ye inoon Adakunom.
10Áner riye̱ rikan ne á nye aner aya a tu ku tabak ba kamok ba nye ike̱re̱ iya i ta se gye̱r nasho̱o̱n Adakunom,
rigwo̱m kaza nye rifu ba.
11“Áner riye̱ rikan ne á nye áner aya ánerawe ta ka kas yin, ne á ka no̱o̱k yin risam, ne á ti bo̱s abo̱o̱s natoon yin, kamok mi. 12Nye yin adide̱ngde̱ng be riye̱ rikan kamok agbang ishorong yin se naza, kamok anong ne á tabak áner kuzarap aya a tá be̱s nasho̱o̱n yin.
Ito̱k ne akanang
(aMar 9.50; aLuk 14.34-35)
13“Yin ne i nye yin ito̱k kazatse. Ke ito̱k kam be kurereng wu, a ta nye ne ane̱ nong i ta bun i rereng e̱? A ta bin nye ike̱ng ikak baꞌ, ma ke a ta nyosong, ne ánerawe she̱sh.
14“Yin ne i nye yin akanang kazatse, kuwo̱p kuya a tá no̱k na agarang ku ta buruk baꞌ. 15A te kuro̱ng na apitila, ne a bun a whe̱e̱n baꞌ. A sak na agarang nong koangan a tana no̱ ta di akanang'e. 16Kamok anong, won akanang yin tu ya kanang nasho̱o̱n ánerawe, nong ke á di kunye yin kutek ne á tà kerek Ada yin a ta se kaye̱e̱r kaza.
Rife̱ aYeso natoon Itsi aMusa
17“Sang yin tu di yin ye mi be̱ nong ta be birik ike̱ng iya Itsi aMusa ta fe̱ be rife̱ áner kuzarap agbugbang'e ta fe̱ baꞌ, Mi be̱ nong ta birik baꞌ, amma nong ta shining rife̱ ba'me. 18Katsak'e, ne mi ta ka tak yin, kaza be kaben tà gang, ko kaban ike̱ng ikak ihiir'e kaye̱e̱r afumung na ta wei baꞌ, ma koakye a ta fe̱ shining. 19Koangan ne a won ike̱ng ikak ihiir'e kaye̱e̱r Itsi na nong a ta bo̱so̱p ánerawe'me anong, a tù ku yis ye, kaba hiir'e kaye̱e̱r rigwo̱m kaza, amma aner aya ne a ta kuus ike̱re̱'me cei ne a bo̱so̱p ánerawe'me anong, a tù ku yis ye, agbang aner kaye̱e̱r rigwo̱m kaza. 20Won ta ka tak yin, sang ke kunye yin kutek nar kufe áner kubo̱so̱p Itsi be áner aFarisi baꞌ, To̱, yin tà no̱ yin kaye̱e̱r rigwo̱m kaza baꞌ ko cie̱k.
Rife̱ aYeso natoon kufe̱r akak
(aLuk 12.57-59)
21“Yin fok yin a tá fe̱ be ánerawe agbugbang ye, 'Sang tu fe̱r akak baꞌ, aner aya ne a fe̱r akak, a tú ku to̱ amok! 22Amma mi fe̱ be yin kyo̱o̱rna'me ye, aner aya ne riye̱ wu beseng be aronyining wu, a tú ku to̱ amok. Koangan ne a fe̱ be aronyining wu ye a nye ‘Azizik'e’ a tà tseng be wu nasho̱o̱n áko̱k kasho̱o̱n. Koangan ne a yis afudang ye, ‘Afunam akak,’ a kyem ke a no̱ kaye̱e̱r kasa kuro̱ng.
23“Kamok anong, ke wan sen no̱o̱k abeko wan nasho̱o̱n abagadi'me, wan ra yiring ye aronyining wan be ike̱ng ikak be wan, 24To̱, ne wan sak abeko wan'ong azong nizham, nong ta be nufe aronyining wan'e, sen sak yin nizham, ne i ma be̱ no̱o̱k abeko'me.
25“Ke akak sen tseng be wan naro̱ amok, nye zizirik nong tin sak yin be wu ni iren nizham ta ra no̱ yin nutu amok'e. Ke anong baꞌ a ta tseng be wan naro̱ amok'e ne aner amok'e ka won nubo̱k áfe itomong wu, kashim ne a ka te ni itso̱m. 26Katsak'e, ne mi ta tak, wan ta kyem i wuruk baꞌ, ma ke wan karang kutiming'e cei nizham.
Rife̱ aYeso natoon rikuna
27“Yin fok yin a tá fe̱ ye, ‘Sang tu nye rikuna baꞌ.’ 28Amma kyo̱o̱rna'me, mi ta tak yin ye, koangan ne a di aner abining a shim kaye̱e̱r riye̱ wu ye ke wu men be wu, a nye rikuna be wu kaye̱e̱r riye̱ wu. 29Ke rinyisi abas kubo̱k riya wan tà sak nong tà nye rine̱n, tun nong ta barak! I tà nar wan ti wei ribir kuro̱m wan be kuro̱m wan cice̱r tana no̱ kaye̱e̱r kasa kuro̱ng. 30Ke kubo̱k riya wan tà sak wan tà nye rine̱n, tun nong ta barak. I tà nar wan ti wei ribir kuro̱m wan be kuro̱m wan cice̱r tana no̱ kaye̱e̱r kasa kuro̱ng.
Rife̱ aYeso natoon ikam kuwe̱ne̱ng
(aMat 19.9; aMar 10.11-12; aLuk 16.18)
31“A bun a fe̱ ye, ‘Koangan ne a tà kam be abining wu, a ru ku no̱o̱k kufumung kukam kuwe̱ne̱ng dim.’ 32Amma kyo̱o̱rna'me, ike̱ng iya mi ta sen fe̱ be yin se ye, ke aner akak kam be abining wu ye, sang ke ise ye abining'e nye rikuna baꞌ, to̱, i te kyo̱ndi wu ne a tu te kaye̱e̱r rikuna'me ingya. Aner aya ne a sok abining'e, a nye rikuna.
Rife̱ aYeso natoon kushu
33“Anong gbak, yin fok yin a fe̱ be átukop yir ye, ‘Sang tu shu natoon abo̱o̱s baꞌ, amma shining kuno̱o̱k kuto̱ wan tá nye be Agwo̱m Ágwo̱m.’ 34Amma ike̱ng iya mi ta fe̱ yin se ye, Sang tu shu yin baꞌ ko cie̱k, ko be kaza, kamok kaza nye karo̱ itsik rigwo̱m Adakunom. 35Sang tu shu ko be kaben baꞌ, kamok kaben nye ike̱ng kusaas atak Adakunom, ko be aUshalima kamok azong ne a nye kuwo̱p Agbang Agwo̱m. 36Sang tu shu be rice wan baꞌ, kamok wan ta kyem i sak kakuyong kazining ta te kakan ka kawe baꞌ. 37Ike̱ng iya yin tana fe̱ yin tsek nye, ‘Ei’ ka ‘Wayo’ ayi. Koakye i ta bun i nar anong ne nufe Amaan aner.
Rife̱ aYeso natoon ku kukarang ike̱ng
(aLuk 6.29-30)
38“Yin fok yin a tá fe̱ ye, ‘Rinyisi natoon rinyisi, rinyi natoon rinyi.’ 39Amma ike̱ng iya mi ta fe̱ be yin kyo̱o̱rna se ye, Sang tu rayin aner aya a tá ka nye yin anyas baꞌ. Ke aner akak ta rus nufok kukak, ne wan ku kirik kufe afa. 40Ke aner akak tseng be wan naro̱ amok, a ti shan kukpiin wan, ne wan ku no̱o̱k ma be agbang kukpiin wan gip. 41Ke aner akak fe̱ ye ma wan ra su ku sak ni iren akilomita azining, ne wan tseng be wu akilomita afa. 42Ke aner akak ta rip ike̱ng ikak, ku no̱o̱k. Ke aner akak be̱ kutse̱r iko̱p nufuan, sang tu won dar i ku no̱o̱k baꞌ.
Rife̱ aYeso natoon kushim ámudo̱n
(aLuk 6.27-28, 32-36)
43“Yin fok yin a tá fe̱ ye, ‘Shim áferime̱ wan ne i di ámudo̱n wan kye̱re̱.’ 44Amma mi fe̱ be yin kyo̱o̱rna'me ye: Shim yin ámudo̱n yin, ne nye yin áfe á ta ka tabak yin aduwa. 45Kamok be nong ne yin tà te yin inoon Ada yin afe a ta se kaye̱e̱r kaza. Wu no̱o̱k ámaan anerawe ne áner atek akanang kunom cice̱r, ne a nyesek iza natoon ánerawe wu áya a ta be kuse kutek be áya a ta nye amaan'e. 46Kamok ke yin shim yin áya a ta ka shim yin tsek, ishorong akye̱ ne yin ta se̱ yin nufe Adakunom e̱? Anong ne áfe kushashang itso̱m iben nye gip. 47Ke yin nye shou yin áferime̱ yin tsek, to̱, akye̱ ne yin nye yin ife ita nar ife ribir ánerawe e̱? Áfurin gip á nye anong. 48Kamok anong, shining yin, kyo̱ndi Ada yin afe a ta se kaye̱e̱r kaza ta shining.
Currently Selected:
aMatiyu 5: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc