aYohana 1
1
Rife̱ te anerawe
1Ni ime̱se̱ng'e nye Rife̱, Rife̱'me se be Adakunom, Rife̱'me nye Adakunom. 2Wu ne a se mak be Adakunom kum ni ime̱se̱ng'e.
3Be wu ne a nye koakye ike̱ng, ike̱ng ikak kuse ife a tá nye dar wu baꞌ. 4Kaye̱e̱r wu kutser kuse, kutser na be̱e̱n be akanang nufe ánerawe. 5Akanang'e ya kaye̱e̱r awhi, amma awhi'me tú ku ren baꞌ.
6Aner akak be̱ afe Adakunom tú ku tom: riyerek wu ta nye aYohana. 7A be̱ nong a tá be̱ taas katsak natoon akanang'e, nong ase̱ kamok wu ne ánerawe cice̱r tin no̱o̱k katsak. 8Sang wu aYohana'me ne a nye akanang'e baꞌ, amma a be̱ nong a tá fe̱ itak natoon akanang'e tsek. 9Akanang afe katsak aya a ta nyeseng ánerawe akanang cice̱r kaye̱e̱r kazatse saase.
10Rife̱'me se kaye̱e̱r kazatse gbugbang, kamok be wu ne a tin nye kazatse, gip be anong kazatse'me tu ku ren baꞌ. 11A be̱ nufe iya i tá nye afu, amma áfu'me tu ku shan baꞌ. 12Amma cice̱r áfe a tú ku shan ne á ni no̱o̱k katsak riyerek wu, a tá no̱o̱k ba iren kute inoon Adakunom. 13Sang inoon naya a tá tes kuri rife rinerawe baꞌ, ka kaye̱e̱r kushim kuro̱m tsek baꞌ, ka nushim aner tsek baꞌ, amma Adakunom be rice wu ne a nye Ada ba.
14Rife̱'me te anerawe ne a sor kaye̱e̱r yir. Yir n di yir kuyiik wu, kuyiik kuya ku ta nye kufe asuze̱r Igon ku ta ne nufe Ada wu tsek, a ta shining be ritek ne katsak.
15aYohana fe̱ itak natoon wu. A tá kuto̱ nong a tá fe̱ ye, “Ayu ne a nye aya mi tá fe̱ itak natoon wu nizen iya mi tá fe̱ ye, ‘Aya a tana be̱ nama mi, a ti nar, kamok wu tuse nizham a tá rin tes.’ ” 16Kaye̱e̱r ritek wu ri ta se dide̱ng ne yir cice̱r se̱ yir ritek natoon ritek. 17Kamok Itsi be̱ nubo̱k aMusa, amma ritek be katsak be̱ nubo̱k aYeso aKiristi. 18Aner akak kun di Adakunom baꞌ. Amma asuze̱r ke Igon wu tsek, aya a ta se rifam Atek wu, ne a sak yir tú ku ren yir.
aYohana aner abatisma fe̱ ye wu ne a nye aKiristi baꞌ
(aMat 3.1-12; aMar 1.1-8; aLuk 3.1-18)
19Iyu ne i nye ike̱ng ife aYohana tá fe̱ nizen iya áner aYahuda aya a tase na aUshalima tá tom átsi ne áner aLawi ye á ra su ku rip ye, “Wan nye angan e̱?” 20aYohana ton ne baꞌ, amma a tú tak ba kanang ye, “Sang mi ne i nye aKiristi'me baꞌ.”
21Ayong á tú ku rip ye, “To̱, wan nye angan e̱? Wan ne i nye Iliya a?”
Ne aYohana fe̱ be ba ye, “Wayo, mi ne i nye wu baꞌ.”
“Ayong wan ne i nye Aner Kuzarap #1.21: Aner Kuzarap: Aner aya áner aYahuda tin te riye̱ ye a tà be̱ nong a tù ku shesh ba. ame a?”
Ne a bun a fe̱ be ba ye, “Wayo.”
22Ni igang'e á bun a tú ku rip ye, “To̱, wan nye angan e̱? Ni tak yir nong ase̱ tà se tak yir áya a tin tom yir. Wan fe̱ ye wan nye angan e̱?”
23Ne aYohana ku tak ba be rife̱ Ishaya aner kuzarap, a tá fe̱ ye, “Mi ne i nye kuto̱ kuya ku ta yis kaye̱e̱r katse ye, ‘Nye yin iren cop kamok Agwo̱m Ágwo̱m.’ ”
24Áyong aner aYahuda aya a tá se kaye̱e̱r kugung rice aFarisi #1.24: Áner aFarisi: fa: Akanang Ike̱re̱ Ikak, kaye̱e̱r nafarap'e nakak. áya a tú ku tom ba, 25rip aYohana'me ye, “Iyong akye̱ sak wan ta nye abatisma ke wan nye aKiristi, ka Iliya ka Aner Kuzarap'e baꞌ e̱?”
26Ne aYohana fe̱ ye, “Mi nye abatisma be ashi, amma nunyeseng aze be yin akak kuse aya yin tu ku ren yin baꞌ. 27Wu ne a nye aya a tana be̱ nama mi, idun akpatak wu mi ta kyem i bis baꞌ.”
28A nye ike̱re̱ na cei na aBetani, nunyi isho̱ng aUrdun, naro̱ aYohana tú ku nye abatisma.
aYeso ne a nye Aturuk Adakunom
29Katuk afe afa aYohana di aYeso saase nufu, yong a fe̱ ye, “Di yin, Aturuk Adakunom, #1.29: Aturuk Adakunom: fa: Akanang Ike̱re̱ Ikak, kaye̱e̱r nafarap'e nakak. aya a tan n sok rine̱n kazatse! 30Ayu ne a nye aya afe mi tin fe̱ natoon wu ye, ‘Aner aya a tana be̱ nama mi a ti nar kamok wu se nasho̱o̱n'i.’ 31Mi tsang i tú ren gbugbang baꞌ, amma mi be̱ be kunye abatisma be ashi nong ta sak áner Isarela tu ku ren.”
32Ayong aYohana no̱o̱k a sheda na ye, “Mi di Kabik Kazhe̱l'e ta ne naza kyo̱ndi abo̱p ka tin tiik natoon wu. 33Mi tsang i ku ren baꞌ, amma Adakunom afe a tin tom nong ta nye abatisma be ashi ti tak ye, ‘Aner aya wan di Kabik ti tiik ne a ni sonong natoon wu to̱, wu ne a nye aner kunye abatisma be Kabik Kazhe̱l'e.’ 34Mi di anong, kamok anong mi ta kyem i fe̱ koakye natoon wu ye, wu ne a nye Igon Adakunom.”
Álimazhiri aYeso áfe ime̱se̱ng'e
35Naya katson'e aYohana se azong be álimazhiri wu afa. 36Nizen a tá di aYeso ta sen gor, a fe̱ be ba ye, “Di yin, Aturuk Adakunom!”
37Nizen iya álimazhiri afa ame tá fa fok anong, yong á kuus aYeso. 38aYeso kirik a tu di ba á ta sen ku kuus ne a ku rip ba ye, “Yin tse̱r yin akye̱ e̱?” Ne ba fe̱ ye, “aRabbi (i ta sor Aner Kubo̱so̱p), wan sor ake̱ e̱?”
39Ayong aYeso fe̱ be ba ye, “Be̱ ta se di yin.” Iyong á tseng nong á ta se di karo̱ kaya wu tu ku sor ne á woso be wu. I se nabas itso̱m inaas nawhe̱shirim.
40Adarawus, aronyining aSiman Bitrus, nye akak kaye̱e̱r áner afa áfe a tá fok ike̱ng iya aYohana tá fe̱ ne a kuus aYeso. 41Ike̱ng ife ime̱se̱ng'e Adarawus ta nye, nye a tse̱r aronyining wu aSiman, a tu ku tak ye, “Yir n se̱ yir aKiristi (wu nye a nye aMasihu#1.41: aMasihu: fa: Akanang Ike̱re̱ Ikak, kaye̱e̱r nafarap'e nakak.).” 42Iyong a be̱ be aSiman nufe aYeso.
aYeso tú ye̱re̱k ne a fe̱ be wu ye, “Wan ne i nye aSiman igon aYohana a? A tá ka yis ye aKefas” (i ta sor aBitrus).
aYeso yis aFilibus be aNataniyel
43Kadiding tá fa karak ne aYeso nye kanye̱k ku be na aGalili. Ayong a se se̱ aFilibus ne a fe̱ be wu ye, “Ni kuus.”
44aFilibus nye aner kuwo̱p aBatseda, kuwo̱p kuzining be Adarawus be aBitrus. 45Iyong aFilibus se̱ aNataniyel ne a fe̱ be wu ye, “Yir n se̱ yir aner aya aMusa tá zibir itak wu ne áner kuzarap bun zibir natoon wu, aner nye aYeso afu Nazaret, igon aYusufu.”
46Ayong aNataniyel fe̱ ye, “I se ye ike̱ng ikak itek tà wuruk na aNazaret a?”
Ne aFilibus fe̱ be wu ye, “Be̱ ta di.”
47aYeso tá fa di aFilibus tá saase nufu ayong a fe̱ be wu ye, “Di, yin aner Isarela afe katsak, aya a ta be naborok baꞌ.”
48Ayong aNataniyel rip aYeso ye, “Wan nye ane̱ i tin ren e̱?” Ne aYeso ku shim'e ye, “Mi tá di kum nizen wan tá rusek ritin atafo, nizham aFilibus tá ra ka yis.”
49Iyong aNataniyel fe̱ ye, “Aner kubo̱so̱p, wan ne i nye Igon Adakunom; wan ne i nye agwo̱m Isarela.”
50Ne aYeso fe̱ ye, “Wan ti no̱o̱k katsak kamok mi tá ka tak ye mi tá di ritin atafo a? Wan tà di ike̱re̱ azhing iya i ta nar iyong.” 51Iyong aYeso bun a fe̱ be wu ye, “Mi ta ka tak katsak'e, wan tà di kaza nukarak, ne ámaleka Adakunom ngarak naza ne á tisik natoon Igon Anerawe.”
Currently Selected:
aYohana 1: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc