Rooma 5

Vuu ɓɔɔ nwannang tɔ̃ɔ nɛɛ Laa, atɛ ɓɛɛ

1Wee ruu nwang zang tɔ̃ɔ tɔ ka tĩng Laa, ka ruu danggn ɓɔɔ ruu shing ka bii ɓiɓɛ ɓɛɛ. Ruu nwàng kaa nyaa zɔɔ nɛɛ Laa ka ruu Kpanti ɓuru Yeesɔ Kirisi. 2Laa pàlɛ̀ ruu tɔ̃ɔ kɔ̀ rùu kagn ɓee, nɛɛ bii ɓiɓɛ kɔ, ka ruu danggn ɓɔɔ ruu shing ɓɛɛ. Ka ruu nɔngkɔ, ruu tãa tĩnang ka wee ruu shing jĩng ka tĩng, nɛɛ Laa naa a ruu bannang ɓiɓɛ jong ɓee. 3A ruu ti, tãa tĩnang ka jĩng dannang ɓuru ka ruu ɓɔɔ ruu zi tɔ jĩng dannang shing ruu, ruu mã danggn ɓɛɛ. 4Danggn mãnang shingnɛ zang wu nwang nwannang tɔ̃ɔ. Nwannang tɔ̃ɔ wu shing ruu, ruu yaa gn naa kaa takpang. 5Ruu nɛɛ yaa gn naa kpang, yusɛ̃ɛ tuu ruu kpang, ka ruu ɓɔɔ, Laa shìng ruu zɔ̃ng zang kasɛnang ɓiɓɛ tɔ, ka yeti ɓuru nɛɛ bii Suru ɓiɓɛ ɓɔɔ wu a ruu ɓɛɛ.

6Kirisi vɔ ka ruu ɓuru, ɓɔɔ ruu palɛ vuu shi kpang ɓɛɛ. Ka laa ɓɔɔ Laa shingnɛ ɓɛɛ, bɛ̀ɛ́ ruu lakɛ naa gn ka bii kpang. 7Zang ɓɔɔ kàsɛ́ wu vɔ ka ruu zang ɓɔɔ ɓi zang tɔ̃ɔ, ka tĩng Laa kagn kpang. Zang ɓɔɔ náa kasɛ katɔ wu vɔ ka ruu zang ɓɔɔ palɛ zang tɔ̃ɔ ɓɛɛ, 8Laa tusu ruu naa ɓɔɔ wu kasɛ ruu ɓuru dɔɔli ɓɛɛ tɔ. Ka ɓɔɔ bɛ̀ɛ́ ruu doo zang ɓɔɔ ruu palɛ vuu shi kpang, Kirisi vɔ ka ruu ɓuru ɓɛɛ. 9Ka ruu zĩi ɓiɓɛ, ruu nwáng zang tɔ̃ɔ tɔ ka tĩng Laa. Vuu ɓɔɔ naa pàlɛ́ ruu ɓa weɓe katɔ, ta ruu ditɔ nɛɛ jĩng dannang ɓɔɔ Laa naa dang zang ɓɛɛ. 10Ka ɓɔɔ bɛ̀ɛ́ ruu shing jĩng gn nɛɛ Laa kpang, Laa shingnɛ ruu nwáng nɛɛ wu ka nyaa zɔɔ ka ruu Jaa ɓiɓɛ ɓɔɔ vɔ ka ruu ɓuru ɓɛɛ. Wee ruu nwang tɔ ka nyaa zɔɔ nɛɛ Laa ɓee, Jaa ɓiɓɛ ta yuu ɓuru katɔ, ka ruu ɓɔɔ, nwàng ɓi ningkãari ɓɛɛ. 11Wu wee kɔ shɛ̃ɛning kpang. Laa shingnɛ nɛɛ, ruu tãa tĩnang nɛɛ bii Kpanti ɓuru Yeesɔ Kirisi ɓɔɔ shing ruu tɔ kãntang ruu kaa wusang Laa ɓee.

Zang gã̀sɛ́ Adamu nɛɛ Yeesɔ

12Naa ɓɔɔ vuu shi kpang a ka koo, nɛɛ bii zang gbete, a vuu shi kpang atɛ vɔrɔ. Kãntang keɓe zang piti ri palɛ vuu shi kpang tɔ, ka ruu nɔngkɔ, vɔrɔ nwáng vuu zang piti tɔ. 13Ɓɔɔ Laa átɛ́ nyaa dannang ɓiɓɛ gn kpang, bɛ̀ɛ́ vuu shi kpang kagn koo. A Laa bee vuu ɓɔɔ kaa tɔ̀ɔ́ yuu vuu shi kpang, kpang, ka ruu ɓɔɔ, bɛ̀ɛ́ dang nyaa gn kpang ɓɛɛ. 14Vɔrɔ ti nyɔ zang doo nɛɛ mani, nɛɛ yuu Adamu, à nɛɛ mani ka yuu Musa. Zang ɓɔɔ ri palɛ vuu shi kpang naa ɓɔɔ Adamu palɛ ka ɓɔɔ wu ta nyaa ɓɔɔ Laa dangnɛ ɓɛɛ kpang, ri vɔ doo nɛɛ mani. Adamu nwang ɓi naa Kirisi ɓɔɔ naa a nɛɛ knti ɓɛɛ. 15Vuu ɓɔɔ Laa a zang waati, ɓi naa vuu shi kpang, kpang. Niizang, zang dɔɔli ri vɔlɔ ka ruu ɓɔɔ Adamu gbete palɛ vuu shi kpang ɓɛɛ. Nɛɛ nɔngkɔ, tɔ̃ɔ ɓɔɔ Laa palɛ, nɛɛ vuu ɓɔɔ wu a zang waati ka ruu tɔ̃ɔ Yeesɔ Kirisi, a ka bii zang dɔɔli katɔ. 16Vuu ɓɔɔ Laa a zang waati, ɓi náabm̀ nɛɛ vuu shi kpang ɓɔɔ zang gbete kaɓa palɛ ɓɛɛ. Vuu shi kpang gbete keɓe shingnɛ Laa dàng zang jĩng. Vuu ɓɔɔ Laa a zang waati keɓe, shing tɔ, Laa ta ruu tɔ nɛɛ vuu shi kpang ɓɔɔ ruu palɛ gaagaa ɓɛɛ. 17Vɔrɔ roo kpanti, ka ruu vuu shi kpang ɓɔɔ Adamu gbete palɛ. A zang gãsɛ vuu keɓe kaa tɔ̀ɔ́ nɛɛ vuu ɓɔɔ Yeesɔ palɛ ɓɛɛ kpang. Zang ɓɔɔ Laa nɛɛ palɛ ri tɔ̃ɔ dɔɔli, a shing ri waati, ri nwáng zang tɔ̃ɔ ka tĩng ɓiɓɛ. Ri nwáng ningkãari, ri roo kpanti nɛɛ bii zang gbete keɓe, Yeesɔ Kirisi. 18Bɛɛ zang nɛɛ dang zang piti jĩng katɔ, ka ruu vuu shi kpang ɓɔɔ zang gbete palɛ ɓɛɛ. A ka ruu vuu tɔ̃ɔ ɓɔɔ Yeesɔ Kirisi gbete palɛ ɓɛɛ, Laa shingnɛ zang piti ri nwang zang tɔ̃ɔ. Wu ti a ri suru bii. 19Naa ɓɔɔ zang gbete ta nyaa dannang Laa, a shingnɛ zang dɔɔli ri raa zang ɓɔɔ ri palɛ vuu shi kpang tɔ ɓɛɛ. Doo nɔngkɔ, zang gbete dũng nyaa Laa, a naa shingnɛ zang dɔɔli ri nwàng zang tɔ̃ɔ ka tĩng Laa. 20Laa átɛ̀ nyaa dannang ɓiɓɛ nɛɛ tɔɔ, vuu shi kpang palɛnang wu shangnɛ. A ka nɔng ɓɔɔ vuu shi kpang shang dɔɔli, Laa palɛ tɔ̃ɔ ka nɔngkɔ gbãng gbãng. 21Ka ruu nɔngkɔ, naa ɓɔɔ vuu shi kpang roo kpanti nɛɛ bii vɔrɔ, tɔ̃ɔ Laa ti roo kpanti doo nɔngkɔ nɛɛ bii nwannang tɔ̃ɔ ka tĩng Laa. Tɔ̀ɔ, ruu walɛ suru ɓɔɔ waa nyaa kpang nɛɛ bii Kpanti ɓuru Yeesɔ Kirisi.

Currently Selected:

Rooma 5: mzmNT

Highlight

Copy