Matiyu 6
6
Naa ɓɔɔ Laa tɔɔ ruu a zang vuu ɓɛɛ
1“Nɔɔ gãng jĩng ka naa ɓɔɔ nɔɔ palɛ vuu tɔ̃ɔ manɛ ning. Nɔ́ɔ pálɛ̀ ka ruu ɓɔɔ, tɔɔ zang ri zi nɔɔ ɓɛɛ kpang. Ka ruu ɓɔɔ, naa nɔɔ palɛ nɔngkɔ, Daa manɛ ɓɔɔ ka lapa naa a nɔɔ vuu ɓɔɔ wu kasɛ nɛɛ wu á nɔɔ ɓɛɛ takpang.
2“Mɔɔ nɛɛ tɔɔ mɔɔ a zang ɓɔɔ vuu ka naa kpang vuu, mɔɔ jèe vuukãng ka gbongkarɛ naa ɓɔɔ zang ɓɔɔ ri nwãarɛ zang nɛɛ vuu palɛnang, ri palɛ ka gãa zɔɔ kpalɛnang zang Yahudi nɛɛ nyaa gbabang ɓɛɛ kpang. Ka ruu ɓɔɔ, ri kasɛ nɛɛ zang dɔɔ ri kati ɓɛɛ. N kɔɔ nɔɔ ruu ɓɔɔ niizang kɔ nwani, zang keɓe, ri ta vuu ɓɔɔ Laa nɛ̀ɛ́ a ri ɓɛɛ tɔ nandon. 3A mɔɔ nɛɛ tɔɔ, mɔɔ a zang ɓɔɔ vuu ka naa kpang vuu, mɔɔ kàsɛ̀ zang ɓɔɔ kagn wu zi vuu ɓɔɔ mɔɔ palɛ ɓɛɛ kpang. 4Tɔ̀ɔ vuu ɓɔɔ mɔɔ tɔɔ mɔɔ a zang, zang ɓɔɔgn, ri zi kaa takpang. Tɔɔ Daa ɓaaɓɛ ɓɔɔ zi vuu ɓɔɔ zang palɛ nɛɛ nwĩiri, wu naa a mɔɔ vuu ɓɔɔ wu kasɛ ɓɛɛ kati.”
Naa ɓɔɔ Yeesɔ tɔɔ zang gaa Kpanti Laa ɓɛɛ
(Luk 11:2-4)
5“Nɔɔ nɛɛ tɔɔ nɔɔ gaa Laa, nɔ́ɔ palɛ naa zang ɓɔɔ ri nwãarɛ zang nɛɛ vuu palɛnang ɓɔɔ ri palɛ ɓɛɛ kpang. Ri kasɛ Laa gaanang doo paa ka gãa zɔɔ kpalɛnang zang Yahudi, nɛɛ nɔng ɓɔɔ gbabang ɓee zɔɔ, nɛɛ tɔɔ zang zi ri kati. N kɔɔ nɔɔ ruu ɓɔɔ niizang kɔ nwani, zang keɓe ri ta vuu ɓɔɔ Laa nɛɛ a ri tɔ nandon. 6Mɔɔ nɛɛ tɔɔ mɔɔ gaa Laa, tu ka yeti jaka ɓaaɓɛ, mɔɔ ku nyaa gãa, tɔɔ mɔɔ gaa Daa ɓaaɓɛ ɓɔɔ zang zi kpang ɓɛɛ. Daa ɓaaɓɛ ɓɔɔ zi vuu ɓɔɔ zang waasɛ katɔ ɓɛɛ, tɔɔ wu naa a mɔɔ vuu ɓɔɔ wu shing mɔɔ kati.
7“Mɔɔ nɛɛ gaa Laa, mɔɔ paasɛ ruu ɓɔɔ daa naa kpang keɓe gbete sasak naa ɓɔɔ zang ɓɔɔ ri dũng Kpanti Laa kpang paasɛ ɓɛɛ kpang. Ka ruu ɓɔɔ, ri kɔɔ ɓarɛ nɛɛ, Laa tãa ri, ka ruu yee ɓɔɔ ri paasɛ sasak ɓɛɛ. 8Ka ruu nɔngkɔ, nɔ́ɔ palɛ manɛ nɔngkɔ kpang. Ɓɔɔ nɔɔ gàa tɔɔsung nyaa puunang gn kpang, Daa manɛ zi vuu ɓɔɔ nɔɔ kasɛ ɓii tɔ. 9Nɔɔ gaa Laa naa weɓe:
“Daa ɓuru ɓɔɔ ka lapa ɓɛɛ,
zang wu dɔɔ nung tɔ̃ɔ ɓaaɓɛ ta.
10Zang ri zirɛ, nɛɛ mɔkɔ kpanti.
Zang ti palɛ vuu ɓɔɔ mɔɔ kasɛ ka koo keɓe,
naa ɓɔɔ zang palɛ ka lapa ɓɛɛ.
11A ruu vuu shaanang ɓɔɔ lɛɛkɔ jong, lɛɛkɔ.
12Mɔ́ɔ ti yàa ruu gbalang vuu shi kpang ɓɔɔ ruu palɛ ɓɛɛ,
naa ɓɔɔ ruu yaa zang ɓɔɔ ri palɛ ruu vuu shi kpang ɓɛɛ.
13Mɔɔ yaa Sheetang wu gãsɛ ruu nɛɛ vuu ɓɔɔ ɓa kaka ɓuru katɔ ɓɛɛ kpang.
Ta ruu katɔ kɔ jong nɛɛ naa ɓiɓɛ.
14“Naa nɔɔ yàa zang gbalang vuu shi kpang ɓɔɔ zang pàlɛ̀ nɔɔ, Daa manɛ ɓɔɔ ka lapa naa yàá nɔɔ gbalang vuu shi kpang manɛ doo nɔngkɔ. 15A naa nɔɔ yaa zang gbalang vuu shi kpang ɓarɛ kpang, Daa manɛ yaa nɔɔ ɓɔɔ manɛ doo kpang kɔ.”
Naa ɓɔɔ Yeesɔ tɔɔ zang seng nyaalaa ɓɛɛ
16“Nɔɔ nɛɛ seng nyaalaa nɔ́ɔ kãngtɛ nyaa tĩng naa zang ɓɔɔ ri nwãarɛ zang nɛɛ vuu palɛnang ɓɛɛ kpang. Ri risi nyaa tĩng ɓarɛ naa ɓɔɔgn nɛɛ tɔɔ zang zi kati nɛɛ ri seng nyaalaa. N kɔɔ nɔɔ ruu ɓɔɔ niizang kɔ nwani, zang keɓe ri ta vuu ɓɔɔ ri kasɛ nɛɛ bii zang ɓi tɔ nandon. 17Mɔɔ nɛɛ seng nyaalaa, sɔɔ jĩng katɔ, mɔɔ ti tũuru nung ka yuu, 18tɔ̀ɔ ri zi nyaalaa ɓɔɔ mɔɔ seng kaa takpang. Tɔɔ Daa ɓaaɓɛ ɓɔɔ zang zi kpang, wukɔ wu zi gbete. Daa ɓaaɓɛ ɓɔɔ zi vuu ɓɔɔ zang waasɛ katɔ, wu a mɔɔ vuu ɓɔɔ wu shing mɔɔ kati.
Nɔɔ kpalɛ vuu naa manɛ ka lapa
(Luk 12:33-34)
19“Nɔ́ɔ kpalɛ vuu naa manɛ ka koolaa keɓe kpang, ka ruu ɓɔɔ tùurú nɛɛ sisaa ri lasɛ katɔ ɓɛɛ. Shɔngɓɔ ri ti lasɛ nyaa gãa, ri daa ɓɔɔyi ɓɛɛ. 20Nɔɔ kpálɛ́ vuu naa manɛ ka nɔng Kpanti Laa ɓɔɔ ka lapa ɓɛɛ, ka nɔng ɓɔɔ tùurú nɛɛ sisaa ri lasɛ kpang ɓɛɛ. Shɔngɓɔ ri ti lasɛ nyaa gãa, ri ɓɔɔ kpang ɓɛɛ. 21Ka ruu ɓɔɔ, shɔnzang shing danggn ɓi doo ka nɔng ɓɔɔ wu kpálɛ̀ vuu naa ɓiɓɛ kagn kɔ doori ɓɛɛ.
Jĩng kɔ vuu ɓɔɔ yakɛ bii ɓɛɛ
(Luk 11:34-36)
22“Jĩng kɔ waa zàáng sɔɔ ɓɔɔ bii. Jĩng ɓaaɓɛ nɛɛ tɔ̃ɔ, bii ɓaaɓɛ yakɛ katɔ nandon. 23A jĩng ɓaaɓɛ nɛɛ tɔ̃ɔ kpang, bii ɓaaɓɛ nandon nwang ɓi ka nɔng ɓɔɔ tɔɔ katɔ ɓɛɛ. Naa mɔɔ tɔɔ mɔɔ nwàng ka nɔng yakɛnang, a ɓeekpang mɔɔ doo ka nɔng tɔɔnang, nɔng tɔɔnang kaɓa bang dɔɔli.
Laa dũnnang nɛɛ vuu naa kãanang
(Luk 16:13)
24“Zang gbete pàlɛ̀ zang ziti shonang ka laa gbete kpang, ka ruu ɓɔɔ, kasɛ ruu zang gbete wu bɛ̃ɛ ɓɔɔ gbete. Ɓaa shoo ka nyaa ɓɔɔ gbete wu risi ɓɔɔ gbete naa vuu ɓɔɔ kpang ɓɛɛ. Ka ruu nɔngkɔ, zang wu ɓakɛ Laa dũnnang ɓi nɛɛ vuu naa kãanang kpang.
Rɛ̃rɛnang dɔɔli ka yuu vuu
(Luk 12:22-31)
25“Ka ruu nɔngkɔ, n kɔ̀ɔ́ nɔɔ, nɔɔ rɛ̃rɛ ka ruu nwannang manɛ dɔɔli kpang nɛɛ nɔ́ɔ walɛ vuu shaanang, nɛɛ mii ɓoonang, a ɓɔɔ vuu ɓɔɔ nɔɔ hãa ka bii manɛ ka niya kpang. Suru bii ɓa vuu shaanang kpang ya? Bii shɔnzang ti ɓa fɔ̃ɔrɔ kpang ya? 26Nɔɔ zi jaaning karɛ, ri ɓaa jĩng vuu kpang, ri yee kpang, ri ti kpalɛ vuu ɓarɛ jong ka bɔ̃nɔ kpang, Daa manɛ ɓɔɔ ka lapa, a ri vuu shaanang katɔ. Nɔɔ ɓa jaaning kpang ya? 27Zang gbete ɓu wi ka teteng manɛ, zunung diki gbete gisinang katɔ ka yuu diki nwannang ɓiɓɛ, nɛɛ rɛ̃rɛnang ɓiɓɛ wiya?
28“A nɔɔ rɛ̃rɛ ka ruu fɔ̃ɔrɔ ka ruu viya? Nɔɔ pɛ̃ɛrɛ naa ɓɔɔ mangwaa vuu ri bangkɛ ka waala ɓɛɛ. Ri palɛ shonang kpang, ri ti sée yuu ɓarɛ fɔ̃ɔrɔ bii kpang. 29N kɔɔ nɔɔ, kpanti Sulemanu nɛɛ fɔ̃ɔrɔ ɓiɓɛ ɓɔɔ shili katɔ nandon, shirɛ daa doo ɓarɛ gbete kpang. 30Mangwaa vuu ɓɔɔ zang zi lɛɛkɔ, ɓuru waatɛ kaa tɔ, zang tasɛ kaa waa ɓɛɛ. Kpanti Laa nɛɛ pàlɛ́ ri shinang katɔ naa weɓe, pàlɛ̀ nɔɔ, ɓɔɔ nɔɔ ɓa ri katɔ manɛ kpang ya? Nɔɔ ɓɔɔ nɔɔ shing gn ka bii Kpanti Laa rɛ̃rɛkɛ ɓɛɛ.
31“Nɔ́ɔ rɛ̃rɛ nɛɛ, nɔɔ walɛ vuu shaanang ka niya, nɛɛ vuu ɓɔɔ nɔɔ ɓooyi, a ɓɔɔ vuu ɓɔɔ nɔɔ hãlɛ ɓɛɛ kpang. 32Ɓi zang ɓɔɔ ri dũng Laa kpang kɔ, ri shing jĩng ka vuu keɓe. A Daa manɛ ɓɔɔ ka lapa zi tɔ nɛɛ nɔɔ kasɛ vuu keɓe katɔ piti. 33Vuu ɓɔɔ ɓa weɓe, nɔɔ kãa gbalang ɓɔɔ nɔɔ zirɛ nɛɛ Laa wukɔ Kpanti, nɔɔ ti palɛ vuu ɓɔɔ wu kasɛ ɓɛɛ ka gbongkarɛ, gisi nɔɔ vuu keɓe ditɔ jong nandon. 34Ka ruu nɔngkɔ, nɔ́ɔ rɛ̃rɛ ka ruu diki ɓɔɔgn kpang. Vuu ɓi ka naa Laa kɔ gbete. Nɔɔ shing jĩng ka vuu ɓɔɔ lɛɛkɔ kɔ shɛ̃ɛning, vuu lɛɛkɔ ɓɔɔ kpãa nɔɔ, daa ɓɔɔ nɔɔ shing jĩng ka rikɔ shɛ̃ɛning ɓɛ̀ɛ́ tɔ.
Currently Selected:
Matiyu 6: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust