Zang Shonang Yeesɔ 24

Zang Yahudi ri kɔɔrɔ ruu shi kpang ka yuu Bulu

1Diki ɓa tɔ maani, a Hananiya kpanti zang ɓɔɔ ri dɔɔ vuu ka Gãa Laa, daa ka Kayisariya nɛɛ rɛɛ zang ɓɔɔ ka teteng zang bang bang zang Yahudi nɛɛ yɔɔ ɓɔɔ daa rang ri yee ɓɛɛ, zang ɓaa wu nɛɛ Tatulu. Ri daa ka bii Gɔmna Filiku, ri kɔɔ wu ruu ɓarɛ ka yuu Bulu. 2Zang ɓaa Bulu nyaa, a Tatulu gaayu ruu shi kpang kɔɔrɔnang ka yuu Bulu tɔɔ:

“Zang bang Filiku, diki bee tɔ ruu tãa tĩnang nwannang nɛɛ zɔɔ, ka ruu ɓaaɓɛ. Mɔkɔ ti pálɛ̀, a zang atɛ rɛɛ vuu shɔɔ ka ruu tipi keɓe. 3Zang tipi keɓe ri ta vuu keɓe tɔ ka nɔng piti piti. Ruu kɔɔrɔ ruu vuu keɓe diki diki, a ruu ti zã̀a mɔɔ tɔ gbãng gbãng. 4N suu mɔɔ kãng takpang. N gàá mɔɔ, palɛ ruu tɔ̃ɔ, mɔ́ɔ tãa ruu tɔkɔlɔng kɔ n kɔɔ mɔɔ ɓee. 5Ruu zirɛ yɔɔ keɓe, kpãa zang dɔɔli, shing zang Yahudi ɓɔɔ ri ka koo piti nɛɛ ri haa nyaa. Wukɔ ti zang bang rɛɛ vàá zang ɓɔɔ zang ɓaa ri nɛɛ zang Nazara ɓɛɛ. 6Kasɛ nɛɛ wu risi Gãa Laa wu nwang kaa nɔng shi kpang, a ruu yi wu. [Bɛɛ ruu tɔɔ ruu dɔng wu ruu naa ɓɔɔ nyaa dannang ɓuru kasɛ ɓɛɛ.] 7A zang bang sɔɔja ɓɔɔ zang ɓaa wu nɛɛ Lisiya ɓɛɛ, naa ta wu ka naa ɓuru nɛɛ gbãng gbãng ning.

8“A Lisiya kɔɔyi tɔɔ, zang ɓɔɔ ri kasɛ nɛɛ ri ɓaa wu nyaavaa, ri a ka bii ɓaaɓɛ. Naa mɔɔ hɛ̃ɛlɛ wu, kɔɔ mɔɔ ditɔ nɛɛ nyaa ɓiɓɛ nɛɛ ruu kɔ ruu kɔɔrɔ ka yuu ɓiɓɛ ɓee, niizang kɔ nwani.” 9Zang Yahudi ɓɔɔ ri ka nɔng ri kasɛ nyaa jong kagn, nɛɛ vuu kɔ wu kɔɔ ɓee nɔngkɔ niizang.

Bulu kɔɔ ruu ka yuu ɓiɓɛ ka tĩng Gɔmna Filiku

10Gɔmna tusu Bulu naa nɛɛ wu rang yee ta. A Bulu kasɛ nyaa tɔɔ, “N zi tɔ saa ɓaaɓɛ bée tɔ, mɔɔ jɛ̃ɛ zang ruu ka tipi keɓe. Ka ruu nɔngkɔ, n kɔɔ ruu ka yuu mɛɛ ka tĩng ɓaaɓɛ nɛɛ tĩnang tãanang. 11Naa mɔɔ hɛ̃ɛ zang, zang kɔ̀ɔ́ mɔɔ katɔ nɛɛ diki daa kopi tu ziti ɓɔɔ n daa Laa bannang ka Urushalima ɓɛɛ. 12Ri ĩi m gngn n laa nyaa nɛɛ zang ɓɔɔ ka yeti Gãa Laa kpang. N ti shing zang gngn ri laa nyaa ka gãa zɔɔ kpalɛnang, kɔ ka nɔng ɓɔɔ ka yeti gari kpang. 13Naa mɔɔ ti hɛ̃ɛ ri nɛɛ ri tusu mɔɔ vuu gbete ɓɔɔ tusu nɛɛ vuu kɔ ri ɓàá m nyaavaa ka yuu ɓiɓɛ ɓee niizang kɔ nwani, ri tusu mɔɔ kpang. 14N kàsɛ́ nyaa katɔ ka tĩng ɓaaɓɛ nɛɛ, n bang Làá rɛɛ dabang ɓuru ka gbalang kɔ ri ɓaa nɛɛ shi kpang ɓɛɛ kɔ. N ti shing danggn ka vuu ɓɔɔ zang bee ka yeti labeenang nyaa dannang Musa nɛɛ ɓɔɔ labeenang rɛɛ zang nyaa shonang Laa. 15N ti shing danggn m doo nɔngkɔ, ka bii Laa, naa ɓɔɔ zang keɓe ri shing ɓɛɛ, nɛɛ zang tɔ̃ɔ, nɛɛ zang shi kpang, Laa naa wisi ri paa katɔ nɛɛ sàa. 16Ka ruu nɔngkɔ, n kasɛ nɛɛ diki diki n palɛ vuu ɓɔɔ tɔ̃ɔ ka tĩng Laa nɛɛ tĩng shɔnzang piti.

17“Saa mɛɛ bee tɔ tɔkɔlɔng n daa Urushalima kpang. Wee n nɛɛ daayi, n tɔɔ n daa a rɛɛ zang mɛɛ ɓɔɔ vuu ka naa kpang vuu ɓɔɔ zang kpalɛ, ń ti dɔɔ Laa vuu vaa. 18N palɛ vuu keɓe kɔ, a ri naa ĩi m ka yeti Gãa Laa, bɛ̀ɛ́ n hangsɛ vuu ɓɔɔ zang palɛ, tɔ̀ɔ, zang nwang zang tɔ̃ɔ ka tĩng Laa tɔkn ɓɛɛ tɔ. Bɛɛ zang kpalɛ ka bii mɛɛ kpang. Zang ti haa nyaa kpang. 19Bɛɛ rɛɛ zang Yahudi ɓɔɔ ri a nɛɛ tipi Asiya ri ka nɔng. Nɛɛ nɔngkɔ, ri a ta jong, ri ɓaa m nyaavaa ka bii ɓaaɓɛ, ri nɛɛ zirɛ n nɛɛ palɛ vuu shi kpang ɓɔɔ kagn ɓɛɛ. 20Nɛɛ ti nɔngkɔ kpang, zang keɓe ri kɔɔ mɔɔ vuu shi kpang ɓɔɔ ri tɔɔ n palɛ ɓɛɛ, ka ɓɔɔ zang daa nɛɛ n ka tĩng zang ɓɔɔ ri jɛ̃ɛ zang ruu ɓɛɛ. 21Ɓi ruu gbete ɓɔɔ n mɛ́ɛ nyaa ka teteng ɓarɛ n kɔɔyi nɛɛ, ‘Zang ɓàa m nyaavaa ka bii manɛ, ka ruu danggn ɓɔɔ n shingnɛ nɛɛ, zang naa yupaa ditɔ nɛɛ sàa ɓɛɛ kɔ shɛ̃ɛning.’ ”

22Filiku zi ruu Gbalang keɓe tɔ gbãng gbãng ka ruu nɔngkɔ, kɔɔ ri tɔɔ, “Zang bang sɔɔja Lisiya nɛɛ a tɔ, tɔ̀ɔ, n naa dɔng nɔɔ ruu manɛ.” A di nyaa ruu ɓarɛ tãanang kaa nɔngkɔ. 23A kɔɔ zang bang sɔɔja ɓɔɔ Bulu ka naa ɓiɓɛ ɓɛɛ, nɛɛ wu shing zang, zang gã Bulu waasɛ̃, zang yaa wu katɔ wu palɛ vuu ɓɔɔ wu kasɛ ɓɛɛ. Zang ti yáa rɛɛ ɓeesang ri pàlɛ̀ wu vuu ɓɔɔ wu kasɛ ɓɛɛ katɔ.

Bulu ka tĩng Filiku nɛɛ Durusila

24Diki bee tɔ tɔkɔlɔng Filiku a nɛɛ ɓeeso Durusila ɓɔɔ ɓi zang Yahudi ɓɛɛ. A shong nyaa nɛɛ zang atɛ Bulu, a ri ɓaa shoo ri tãa naa ɓɔɔ Bulu kɔɔ ri ruu, ka ruu danggn shinnang ka bii Kirisi Yeesɔ. 25Ɓɔɔ Bulu kɔɔ ruu ka yuu tɔ̃ɔ palɛnang nɛɛ naa ɓɔɔ zang yiti yuu zang waasɛ̃ ɓɛɛ, a ɓɔɔ ruu diki ɓɔɔ Laa naa jɛ̃ɛ zang ruu kagn ɓɛɛ. Filiku kaa vɔrɔ, a kɔɔ Bulu tɔɔ, “Dita gbongkarɛ, n nɛɛ walɛ diki tɔ, n ɓaa mɔɔ nyaa ditɔ tɔkn.” 26Shing danggn ɓi tɔɔ naa Bulu a wu saka, ka ruu nɔngkɔ, ɓáarɛ̀ wu nyaa rangkɛ yee nɛɛ wu. 27Saa naa ɓa tɔ ziti, a Borokiya Fesitu naa nwang kpanti ka nɔng Filiku. Filiku kasɛ nɛɛ zang Yahudi ri kasɛ ruu ɓiɓɛ, ka ruu nɔngkɔ, yaa Bulu ka sãa ka nɔngkɔ.

Currently Selected:

Zang Shonang Yeesɔ 24: mzmNT

Highlight

Copy