ರೋಮ್ 7
7
ನಂಗ ಇಕ್ಕ ನ್ಯಾಯಪ್ರಮಾಣಕ್ ಒಳಪಟ್ಟಯಿಂಗ ಅಲ್ಲ
1ನಾಡ ಅಣ್ಣತಮ್ಮಣಂಗಳೇ, ನ್ಯಾಯಪ್ರಮಾಣ ಗೊತ್ತುಳ್ಳಯಿಂಗಡ ಪಕ್ಕ ನಾನ್ ತಕ್ಕ್ ಪರ್ಂದಂಡುಳ್ಳ. ಒಬ್ಬ ಬದ್‍ಕಿಯಂಡ್ ಇಪ್ಪಕತ್ತನೆ ನ್ಯಾಯಪ್ರಮಾಣ ಅಂವೊನ ಆಳಿಯಂಡುಂಡ್‍ೕಂದ್ ನಿಂಗಕ್ ಗೊತ್ತ್‌ಲ್ಲೆಯ? 2ವಡಿಯ ಉಳ್ಳ ಒರ್ ಪೊಣ್ಣಾಳ್, ಅಂವೊ ಬದ್‍ಕಿಯಂಡಿಪ್ಪಕತ್ತನೆ, ನ್ಯಾಯಪ್ರಮಾಣತ್‍ರ ಪ್ರಕಾರ ಅಂವೊಂಡ ಪೊಣ್ಣಾಯಿತ್ ಮಾತ್ರ ಇಪ್ಪ. ಆಚೇಂಗಿ, ಅವಡ ವಡಿಯ ಚತ್ತ್‌ಪೋನ ಪಿಂಞ, ಅಂವೊಂಡ ಕೂಡೆ ಮಾಡ್‍ನ ಮಂಗಲತ್‍ರ ಪ್ರಮಾಣತ್ಂಜ ಬುಡುಗಡೆ ಆಯಿರುವ. 3ಆನಗುಂಡ್, ಅವಡ ವಡಿಯ ಬದ್‍ಕಿಯಂಡಿಪ್ಪಕ, ಅವ ಬೋರೆ ಒಬ್ಬನ ಮಂಗಲ ಕಯಿಚತೇಂಗಿ, ಅವಳ ವ್ಯಬಿಚಾರೀಂದ್ ಕಾಕುವ; ವಡಿಯ ಚತ್ತ ಪಿಂಞ ಮಂಗಲತ್‍ರ ಪ್ರಮಾಣತ್ಂಜ ಬುಡುಗಡೆ ಆನಗುಂಡ್, ಅವ ಬೋರೆ ಒಬ್ಬನ ಮಂಗಲ ಕುಯಿಚತೇಂಗಿ ಅವಳ ವ್ಯಬಿಚಾರೀಂದ್ ಕಾಕುಲೆ.
4ಅನ್ನನೆ, ನಾಡ ಅಣ್ಣತಮ್ಮಣಂಗಳೇ, ನಿಂಗಳು ಸಹ, ಕ್ರಿಸ್ತಂಡ ತಡೀರ ಮೂಲಕ ನ್ಯಾಯಪ್ರಮಾಣಕ್ ಚತ್ತ್ ಪೋಯಿತುಳ್ಳಿರ. ಆನಗುಂಡ್, ದೇವಕಾಯಿತ್ ಫಲ ಕೊಡ್‍ಪನೆಕೆ, ಚಾವ್‍ಯಿಂಜ ಜೀವವಾಯಿತ್ ಬಂದ ಬೋರೆ ಒಬ್ಬಂಗ್ ಕೂಡ್‍ನಯಿಂಗಳಾಯಿತುಳ್ಳಿರ. 5ನಂಗ ನಂಗಡ ಪಾಪತ್‍ರ ಗುಣಕ್ ಅಡಿಯಾಳಾಯಿತಿಪ್ಪಕ, ನ್ಯಾಯಪ್ರಮಾಣತ್‍ರಗುಂಡ್ ಎದ್ದಿತ್ ಬಂತ್ ಪಾಪತ್‍ರ ಇಚ್ಛೆ, ಚಾವ್‍ರ ಫಲ ತಪ್ಪನೆಕೆ, ನಂಗಡ ತಡೀರ ಬಾಗತ್‍ಲ್ ಕ್ರಿಯೆ ಮಾಡ್‍ಚಿ. 6ಆಚೇಂಗಿ, ಇಕ್ಕ, ಒಳ್‍ದಿತುಳ್ಳ ಪಳೆಯ ರೀತಿಲ್ ಅಲ್ಲ, ಆಚೇಂಗಿ ಪವಿತ್ರಾತ್ಮತ್‍ರ ಪುದಿಯ ರೀತಿರ ಪ್ರಕಾರ ನಂಗ ಸೇವೆ ಮಾಡ್‌ವನೆಕೆ, ನಂಗಳ ಪುಡ್‍ಚಿ ಬೆಚ್ಚಿತ್ಂಜ ನ್ಯಾಯಪ್ರಮಾಣಕ್ ನಂಗ ಚತ್ತಿತ್ ಬುಡ್‍ಗಡೆ ಆಯಿತುಂಡ್.
ಪಾಪತ್‍ರ ಕೂಡೆ ಪೋರಾಟ
7ಆನಗುಂಡ್ ನಂಗ ಎಂತ ಎಣ್ಣಡ್? ನ್ಯಾಯಪ್ರಮಾಣ ಪಾಪವಾ? ಅನ್ನನೆ ಅಲ್ಲ, ಪಾಪ ಎಂತ್‍ೕಂದ್ ನ್ಯಾಯಪ್ರಮಾಣತ್‍ರಗುಂಡ್ ನಾಕ್ ಗೊತ್ತಾಚಲ್ಲ? ಇಲ್ಲತಪೋಚೇಂಗಿ ಎನ್ನನೆ ಗೊತ್ತಾಪಕಿಂಜತ್? ಬೋರೆಯಿಂಗಡ ವಸ್ತುರ ಮೇಲೆ ಆಸೆ ಪಡ್‌ವಕ್ಕಾಗಾಂದ್ ನ್ಯಾಯಪ್ರಮಾಣ ನಾಕ್ ಎಣ್ಣತೆ ಪೋಚೇಂಗಿ, ಬೋರೆಯಿಂಗಡ ವಸ್ತುರ ಮೇಲೆ ಆಸೆ ಪಡ್‍ವದ್ ಪಾಪಾಂದ್ ನಾಕ್ ಗೊತ್ತಿಲ್ಲತೆ ಪೋಪ ಅಲ್ಲ?#7.7 ಪ್ರಯಾಣ ಪುಸ್ತಕ 20.17; ದರ್ಮಶಾಸ್ತ್ರ ಪುಸ್ತಕ 5.21 8ಆಚೇಂಗಿ ಪಾಪ ನ್ಯಾಯಪ್ರಮಾಣತ್‍ಲ್ ಬಟ್ಟೆ ಕಂಡ್‍ಪುಡ್‌ಚಿತ್, ಎಲ್ಲಾ ತರತ್‍ರ ಬೋಂಡತ ಆಸೇನ ನಾಡಲ್ಲಿ ಮಾಡಿರ್‌ತ್. ನ್ಯಾಯಪ್ರಮಾಣ ಇಲ್ಲತೆಪೋಚೇಂಗಿ ಪಾಪಕ್ ಜೀವ ಇಲ್ಲತ ಇಂಜಿತಿಪ್ಪ. 9ನ್ಯಾಯಪ್ರಮಾಣ ಇಲ್ಲತೆ ಇಪ್ಪಕ ಮಿಂಞ ನಾನ್ ಜೀವತ್‍ಲ್ ಇಂಜಿಯೆ, ನ್ಯಾಯಪ್ರಮಾಣ ಬಪ್ಪಕ, ಪಾಪಕ್ ಜೀವ ಕ್‌ಟ್ಟಿಪೋಚಿ, ನಾನ್ ಚತ್ತಂವೊಂಡನೆಕೆ ಆನ. 10ಇನ್ನನೆ, ಜೀವ ಕ್‍ಟ್ಟುವಕ್ ತಂದಿತುಳ್ಳ ಕಾನೂನ್ ನಾಡ ಚಾವ್‍ಕ್ ಕಾರಣವಾಯಿತ್‌ಪ್ಪದ್ ನಾಕ್ ಗೊತ್ತಾಚಿ. 11ಅದ್ ಎನ್ನನೆ ಎಣ್ಣ್‌ಚೇಂಗಿ, ಪಾಪಕ್ ಕಾನೂನ್‍ರಗುಂಡ್ ಬಟ್ಟೆ ಕ್‍ಟ್ಟಿತ್, ನನ್ನ ವಂಚನೆ ಮಾಡಿತ್, ನನ್ನ ಚತ್ತನೆಕೆ ಮಾಡಿರ್‌ತ್. 12ಆನಗುಂಡ್, ನ್ಯಾಯಪ್ರಮಾಣ ಪವಿತ್ರವಾನದ್, ಅದ್‍ಲ್ ಉಳ್ಳ ಎಲ್ಲಾ ಕಾನೂನ್ ಪವಿತ್ರವಾಯಿತು, ನೀತಿಯಾಯಿತು ಪಿಂಞ ನಲ್ಲದಾಯಿತು ಉಂಡ್.
13ಅನ್ನನೆ ಆಚೇಂಗಿ, ನಲ್ಲದಾಯಿತುಳ್ಳ ನ್ಯಾಯಪ್ರಮಾಣ, ನಾಡ ಚಾವ್‍ಕ್ ಕಾರಣ ಆಚೀಂದ್ ಎಣ್ಣುವಕ್ ಕಯ್ಯುವ? ಅನ್ನನೆ ಅಲ್ಲ, ಪಾಪವೇ ನಾಡ ಚಾವ್‍ಕ್ ಕಾರಣ ಆಚಿ; ಪಾಪ ನ್ಯಾಯಪ್ರಮಾಣತ್‍ರಗುಂಡ್ ಇಂಞು ದುಂಬ ಪಾಪವಾಯಿತ್ ಪಿಂಞ ನಲ್ಲದ್‍ನಗುಂಡ್ ನಾಕ್ ಚಾವ್ ಕೊಂಡ್ ಬಾತ್. ಆನಗುಂಡ್, ನ್ಯಾಯಪ್ರಮಾಣತ್‍ರ ಮೂಲಕ ಪಾಪ ಎಚ್ಚಕ್ ಕ್ರೂರವಾನ ಪಾಪಾಂದ್ ನಂಗ ಕಾಂಬಕ್ ಆಚಿ.
ಪಾಪತ್‍ರಗುಂಡ್ ಪೋರಾಟ
14ಅದಲ್ಲತೆ, ನ್ಯಾಯಪ್ರಮಾಣ ಆತ್ಮೀಯವಾಯಿತುಂಡ್‍ೕಂದ್ ನಂಗಕ್ ಗೊತ್ತುಂಡ್, ಆಚೇಂಗಿ ನಾನ್ ಪಾಪಕ್ ಅಡಿಯಾಳಾಯಿತ್ ಮಾರಿತ್, ಆತ್ಮೀಯ ಜೀವ ಇಲ್ಲತಂವೊನಾನ. 15ಎನ್ನನೆ ಎಣ್ಣ್‌ಚೇಂಗಿ, ನಾನ್ ಮಾಡ್‍ವದ್ ನಾಕೇ ಗೊತ್ತಾಯಂಡಿಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ನಾನ್ ಮಾಡಂಡೂಂದ್ ಉಳ್ಳಾನ ನಾನ್ ಮಾಡಿಯಂಡಿಲ್ಲೆ, ಆಚೇಂಗಿ, ನಾನ್ ಎಂತ ದ್ವೇಶ ಮಾಡ್‌ವ ಅದ್‍ನ ಮಾಡಿಯಂಡುಳ್ಳ. 16ಇನ್ನನೆ ನಾಕ್ ಕುಶಿಯಿಲ್ಲತದ್‍ನ ನಾನ್ ಮಾಡಿಯಂಡಿಪ್ಪಕ, ನ್ಯಾಯಪ್ರಮಾಣ ನಲ್ಲದ್‍ೕಂದ್ ಒತ್ತೊವಿ. 17ಆನಗುಂಡ್, ನಾನ್ ಅಲ್ಲ, ನಾಡ ಒಳ್‍ಲ್ ವಾಸ ಮಾಡಿಯಂಡುಳ್ಳ ಪಾಪತ್‍ರ ಗುಣವೇ ಅನ್ನನೆ ಮಾಡಿಯಂಡುಂಡ್.
18ಎನ್ನಂಗೆಣ್ಣ್‌ಚೇಂಗಿ, ನಾಡಲ್ಲಿ, ಎಣ್ಣ್‌ಚೇಂಗಿ, ನಾಡ ತಡೀಲ್ ನಲ್ಲದ್ ವಾಸಮಾಡಿಯಂಡಿಲ್ಲೇಂದ್ ನಾಕ್ ಗೊತ್ತುಂಡ್; ಅದ್ ಪಾಪತ್‍ರ ಗುಣವೇ. ನಲ್ಲದ್ ಮಾಡಂಡೂಂದ್ ನಾಕ್ ಕುಶಿ ಉಂಡ್, ಆಚೇಂಗಿ ನಲ್ಲದ್‍ನ ಮಾಡ್‌ವಕ್ ನಾಕ್ ಕಯಿಂಜಂಡಿಲ್ಲೆ. 19ಆನಗುಂಡ್, ನಾನ್ ಕುಶಿ ಪಡುವ ನಲ್ಲದ್‍ನ ಮಾಡತೆ, ನಾಕ್ ಕುಶಿ ಇಲ್ಲತೆ ಕೆಟ್ಟದ್‍ನ ಮಾಡಿಯಂಡುಳ್ಳ. 20ಅನ್ನನೆ ನಾನ್ ಮಾಡಂಡೂಂದ್ ಕುಶಿಪಡ್‌ವಾನ ಮಾಡ್‌ವಕ್ ಕಯ್ಯತೆ ಪೋಚೇಂಗಿ, ನಾನ್ ಅಲ್ಲ, ನಾಡ ಒಳ್‍ಲ್ ವಾಸ ಮಾಡಿಯಂಡುಳ್ಳ ಪಾಪತ್‍ರ ಗುಣವೇ ಅನ್ನನೆ ಮಾಡಿಯಂಡುಂಡ್.
21ಆನಗುಂಡ್, ನಲ್ಲದ್ ಮಾಡಂಡೂಂದ್ ಕುಶೀಲ್ ಇಪ್ಪ ನಾಡಲ್ಲಿ, ಕ್‍ೕಡ್ ಮಾಡ್‌ವ ಒರ್ ಕಾನೂನ್ ಉಳ್ಳಾನ ನಾನ್ ಕಂಡಂಡುಳ್ಳ. 22ನಾಡ ಒಳ್‍ಲ್ ಉಳ್ಳ ಮುನುಷ್ಯನಗುಂಡ್ ದೇವಡ ನ್ಯಾಯಪ್ರಮಾಣತ್‍ಲ್ ನಾನ್ ಕುಶಿಪಟ್ಟಂಡುಳ್ಳ. 23ಆಚೇಂಗಿಯು, ನಾಡ ಬುದ್ದಿರ ಕಾನೂನ್‍ಕ್ ವಿರೋದವಾಯಿತ್ ಪೋರಾಡಿಯಂಡಿಪ್ಪ ಬೋರೆ ಒರ್ ಕಾನೂನ್‌ನ ನಾಡ ತಡೀರ ಬಾಗತ್‍ಲ್ ಉಳ್ಳದ್ ನಾಕ್ ಗೊತ್ತಾಯಂಡುಂಡ್; ಅದ್ ನಾಡ ತಡೀರ ಬಾಗತ್‍ಲ್ ವಾಸ ಮಾಡಿಯಂಡುಳ್ಳ ಪಾಪತ್‍ರ ಕಾನೂನ್‍ಕ್ ನನ್ನ ಕೈದಿಯಾಯಿತ್ ಮಾಡಿರ್‌ತ್. 24ಓ! ನಾನ್ ಎಚ್ಚಕ್ ಬೇಜಾರತ್‍ಲ್ ಉಳ್ಳ ಮನುಷ್ಯ! ಈ ಚಾವಕುಳ್ಳ ತಡಿಯಿಂಜ ದಾರ್ ನನ್ನ ಕಾಪಾಡ್‌ವ? 25ಇಕ್ಕ, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ದೇವಕ್ ವಂದನೆ ಮಾಡ್‌ವಿ. ಆನಗುಂಡ್, ನಾನ್ ನಾಡ ಮನಸ್ಸ್‌ರಗುಂಡ್ ದೇವಡ ನ್ಯಾಯಪ್ರಮಾಣಕು, ಆಚೇಂಗಿ, ನಾಡ ಪಾಪತ್‍ರ ಗುಣತ್‍ರಗುಂಡ್, ಪಾಪತ್‍ರ ಕಾನೂನ್‍ಕು ಸೇವೆ ಮಾಡಿಯಂಡುಳ್ಳ.
Currently Selected:
ರೋಮ್ 7: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
