ರೋಮ್ 12
12
ಜೀವ ಬಲಿ
1ಆನಗುಂಡ್, ನಾಡ ಅಣ್ಣತಮ್ಮಣಂಗಳೇ, ನಿಂಗಡ ತಡೀನ ಪವಿತ್ರವಾಯಿತ್, ದೇವ ಕುಶಿಪಡ್‌ವನೆಕೆ ಜೀವ ಬಲಿಯಾಯಿತ್ ಅರ್ಪಿಚಿಡಂಡೂಂದ್ ದೇವಡ ಕನಿಕಾರತ್‌ಂಜ ನಾನ್ ನಿಂಗಳ ಬೋಡುವಿ. ಇನ್ನನೆ ನಿಂಗ ಮಾಡ್‌ವ ಆರಾದನೆ, ಆತ್ಮೀಯ ಆರಾದನೆಯಾಯಿತುಂಡ್. 2ಇಂಞು ಮಿಂಞಕ್ ಈ ಲೋಕತ್‍ರ ರೀತಿಕ್ ಒತ್ತಂಡ್ ಪೋಕತಿ. ನಲ್ಲದಾಯಿತು, ಯೋಗ್ಯವಾಯಿತು, ಪೂರ್ತಿಯಾಯಿತುಳ್ಳ ದೇವಡ ಚಿತ್ತ ಎಂತ್‍ೕಂದ್ ಗೊತ್ತಾಪಕಾಯಿತ್, ನಿಂಗಡ ಮನಸ್ಸ್‌ನ ಪುದಿಯದ್ ಮಾಡಿಯಂಡ್ ಬದ್‍ಲಾಯಂಡಿರಿ.
3ನಿಂಗಡಲ್ಲಿ ಒಬ್ಬೊಬ್ಬನು, ತಾಂಡ ಸ್ತಾನಕಿಂಜ ಬಲ್ಯದಾಯಿತ್ ಗೇನ ಮಾಡತಿ, ಅಂವೊಂಗ್ ಎಚ್ಚಕ್ ನಂಬಿಕೇನ ದೇವ ಪಾಲ್ ಮಾಡಿತ್ ತಂದಿತೋ, ಅದ್ಂಗ್ ತಕ್ಕಂತೆ ಗೇನ ಮಾಡಿಯಂಡ್ ಚಾಯಿ ಮನಸ್ಸ್‌ಲ್ ಇರೀಂದ್ ದೇವ ನಾಕ್ ತಂದಿತುಳ್ಳ ಕೃಪೇರಗುಂಡ್ ನಿಂಗ ಒಬ್ಬೊಬ್ಬಂಗು ಎಣ್ಣ್‌ವಿ. 4ಎನ್ನಂಗೆಣ್ಣ್‌ಚೇಂಗಿ, ನಂಗಡ ಒರ್ ತಡೀಲ್ ಬೋರೆ ಬೋರೆ ಬಾಗ ಇಂಜತೇಂಗಿಯು, ಎಲ್ಲಾ ಬಾಗವು ಒರೇ ಕೆಲಸ ಮಾಡಿಯಂಡಿಲ್ಲೆ. 5ಅನ್ನನೆ ದುಂಬ ಜನಳಾಯಿತುಳ್ಳ ನಂಗಳು, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಒರೇ ತಡಿಯಾಯಿತುಂಡ್. ನಂಗೆಲ್ಲಾರು ಒಬ್ಬೊಬ್ಬಂಡ ಕೂಡೆ ಒಬ್ಬ ಕೂಡಿತ್ ತಡೀರ ಬೋರೆ ಬೋರೆ ಬಾಗವಾಯಿತುಂಡ್. 6ದೇವಡ ಕೃಪೆಯಿಂಜ ನಂಗಕ್ ಬೋರೆ ಬೋರೆ ವರ ಕ್‍ಟ್ಟಿತುಂಡ್. ಆನಗುಂಡ್ ದೇವ, ಒಬ್ಬಂಗ್ ಪ್ರವಾದನೆ ಎಣ್ಣುವ ವರತ್‍ನ ಕೊಡ್‍ತಿತುಂಡೇಂಗಿ, ಅಂವೊಂಗ್ ದೇವ ಕೊಡ್‍ತ ನಂಬಿಕೇರ ಅಳ್‌ತೆರಚ್ಚಕ್ ಪ್ರವಾದೆನೆ ಎಣ್ಣಂಡು. 7ಸೇವೆ ಮಾಡ್‌ವ ವರ ಎಣ್ಣ್‌ಚೇಂಗಿ ಅಂವೊ ಸೇವೆ ಮಾಡಡ್; ಬೋದನೆ ಮಾಡ್‌ವದಾಚೇಂಗಿ, ಅಂವೊ ಬೋದನೆ ಮಾಡಡ್. 8ಪುರ್‌ಡ್ ಕೊಡ್‍ಪ ವರ ಎಣ್ಣ್‌ಚೇಂಗಿ, ಅಂವೊ ಪುರ್‌ಡ್ ಕೊಡ್‌ಕಡ್; ಬೋರೆಯಿಂಗಡ ಅವಸ್ಯಕ್ ಸಹಾಯ ಮಾಡ್‌ವ ವರ ಎಣ್ಣ್‌ಚೇಂಗಿ, ಅಂವೊ ದಾರಾಳವಾಯಿತ್ ಸಹಾಯ ಮಾಡಡ್; ತಕ್ಕಾಮೆರ ವರ ಎಣ್ಣ್‌ಚೇಂಗಿ, ಅಂವೊ ಅದ್‍ನ ಜಾಗ್ರತೆಲ್ ಮಾಡಡ್. ಕರುಣೆ ಕಾಟುವ ವರ ಎಣ್ಣ್‌ಚೇಂಗಿ, ಅಂವೊ ಅದ್‍ನ ಕುಶೀಲ್ ಮಾಡಡ್.
ಪ್ರೀತಿ
9ನಿಂಗಡ ಪ್ರೀತಿ ಕಪಟ ಇ‍ಲ್ಲತದಾಯಿತ್ ಇರಡ್, ಕೆಟ್ಟದ್‍ನ ದ್ವೇಶ ಮಾಡಿತ್, ನಲ್ಲದ್‍ನ ಪುಡ್‍ಚೊಳಿ. 10ಅಣ್ಣತಮ್ಮಣಂಗ ಒಬ್ಬೊಬ್ಬಂಡ ಕೂಡೆ ಚಾಯಿ ಪ್ರೀತಿಲ್ ಇರಿ; ಗನ ಪಡ್‌ತ್‍ವದ್‍ಲ್ ಎಲ್ಲಾರ್ಕಿಂಜ ಮಿಂಞ ನಿಂಗಳೇ ಮಾಡ್‌ವಯಿಂಗಳಾಯಿತಿರಿ. 11ಸೋಮಾರಿಯಾಯಿತ್ ಇಕ್ಕತೆ, ದುಂಬ ಜಾಗ್ರತೆಲ್ ಇರಿ; ಆತ್ಮತ್‍ಲ್ ಕಮ್ಮಿ ಆಕತಿ, ಒಡೆಯಂಗ್ ಸೇವ ಮಾಡಿ. 12ನಿರಿಕ್ಷೇಲ್ ಕುಶಿಯಾಯಿತಿರಿ, ಕಷ್ಟತ್‍ಲ್ ಪೊರುಮೆಯಾಯಿತಿರಿ, ಪ್ರಾರ್ಥನೆ ಮಾಡ್‌ವದ್‍ಲ್ ಸ್ತಿರವಾಯಿತ್ ಮಾಡಿಯಂಡಿರಿ. 13ದೇವಡ ಮಕ್ಕಡ ಕಷ್ಟತ್‍ಲ್ ಅಯಿಂಗಕ್ ಬೋಂಡಿಯಾನದ್‍ನ ಮಾಡಿ, ನಿಂಗಡ ಪಕ್ಕ ಬಪ್ಪಯಿಂಗಳ ಚಾಯಿ ನೋಟಿಯೊಳಿ. 14ನಿಂಗಕ್ ಹಿಂಸೆ ಮಾಡ್‌ವಯಿಂಗಳ ಆಶೀರ್ವಾದ ಮಾಡಿ. ಅಯಿಂಗಕ್ ಶಾಪ ಕೊಡ್‌ಕತಿ. ದೇವ ಅಯಿಂಗಳ ಆಶೀರ್ವಾದ ಮಾಡಂಡೂಂದ್ ಪ್ರಾರ್ಥನೆ ಮಾಡಿ. 15ಕುಶೀಲ್ ಉಳ್ಳಯಿಂಗಡ ಕೂಡೆ ಕುಶೀಲ್ ಇರಿ, ಮೊರಟಂಡುಳ್ಳಯಿಂಗಡ ಕೂಡೆ ಮೊರಡಿ. 16ಎಲ್ಲಾಡ ಕೂಡೆ ಒರೇ ಮನಸ್ಸುಳ್ಳಯಿಂಗಳಾಯಿತಿರಿ; ಜಂಬ ಮಾಡತೆ, ಕಮ್ಮಿಯಾಯಿತ್ ಉಳ್ಳಯಿಂಗಡ ಕೂಟ್‍ಕ್ ಕೂಡಿ. ನಿಂಗಳ ನಿಂಗಳೇ ಬುದ್ದಿವಂತಯಿಂಗಾಂದ್ ಗೇನ ಮಾಡತಿ. 17ಕೆಟ್ಟದ್ ಮಾಡ್‍ನಯಿಂಗಕ್, ನಿಂಗ ಪುನಃ ಕೆಟ್ಟದ್ ಮಾಡತಿ; ಎಲ್ಲಾಡ ಮಿಂಞತ್ ಏದ್ ಯೋಗ್ಯವಾನದೋ, ಅದ್‍ನ ಮಾಡ್‌ವಕ್ ಎಚ್ಚರತ್‍ಲ್ ಇರಿ. 18ಕಯ್ಯುವಚ್ಚಕ್, ಎಲ್ಲಾಡ ಕೂಡೆ ಸಮಾದಾನತ್‍ಲ್ ಇರಿ. 19ನಾಡ ಪ್ರೀತಿರ ಜನಳೇ, ಪಗೆ ತ್‍ೕಪದ್ ನಾಡ ಕೆಲಸ, ನಾನೇ ಪಗೆ ತ್‍ೕಪೀಂದ್ ಒಡೆಯ ಎಣ್ಣಿತುಂಡ್‍ೕಂದ್ ಒಳ್‍ದಿತುಳ್ಳಾಂಗ್, ನಿಂಗ ದಾರ್‌ಕು ಪಗೇನ ತ್‍ೕಕತೆ, ದೇವಡ ಬಲ್ಯ ಚೆಡಿಕ್ ಬುಟ್ಟ್ ಕೊಡಿ.#12.19 ದರ್ಮಶಾಸ್ತ್ರ ಪುಸ್ತಕ 32.35 20ಅದಲ್ಲತೆ,
ನೀಡ ವಿರೋದಿಕ್ ಕೆಲ ಪಯಿಚಂಡಿಂಜತೇಂಗಿ, ಅಂವೊಂಗ್ ಕೂಳ್ ಕೊಡ್;
ಅಂವೊ ಬಾಯರಿಕೆಲ್ ಇಂಜತೇಂಗಿ ಅಂವೊಂಗ್ ಕುಡಿಪಕ್ ಕೊಡ್.
ನೀನ್ ಇನ್ನನೆ ಮಾಡ್‍ಚೇಂಗಿ, ನೀನ್ ಅಂವೊಂಡ ಮಂಡೆಕ್ ಕತ್ತಿಯಂಡುಳ್ಳ ತಿತ್ತ್ ಕಂಡ ಕೂಟ್‌ವನೆಕೆ, ಮಾಡ್‌ವಿಯ.#12.20 ಜ್ಞಾನ ಪುಸ್ತಕ 25.21,22
21ನೀನ್ ಕೆಟ್ಟದ್ ಮಾಡಿತ್ ಗೆಲ್ಲ್‌ವಕಿಂಜ, ಕೆಟ್ಟದ್‍ನ ನಲ್ಲದ್ ಮಾಡಿತ್ ಗೆಲ್ಲ್.
Currently Selected:
ರೋಮ್ 12: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
