ಪ್ರಕಟನೆ 18
18
ಬಾಬೇಲ್ ಬುದ್ದ್ ಪೋನದ್
1ಇದಾನ ಪಿಂಞ, ಇಂಞೊರ್ ದೇವದೂತ ದುಂಬ ಬಲ್ಯ ಅದಿಕಾರ ಉಳ್ಳಂವೊನಾಯಿತ್ ಪರಲೋಕತ್ಂಜ ಇಳ್ಂಜಿತ್ ಬಪ್ಪದ್‍ನ ಕಂಡಿಯೆ; ಅಂವೊಂಡ ಮಹಿಮೇರಗುಂಡ್ ಬೂಲೋಕ ಪ್ರಕಾಶತ್‍ಲ್ ಮಿನ್ನ್‌ಚಿ. 2ಅಂವೊ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‌ತಂಡ್:
ಮಹಾ ಬಾಬೇಲ್ ಬುದ್ದತ್! ಬುದ್ದತ್!
ಅದ್ ಪಿಶಾಚಿ ವಾಸ ಮಾಡ್‌ವ ಜಾಗವು, ಎಲ್ಲಾ ತರತ್‍ರ ಕೂಳಿಯಡ ಮನೆಯ,
ಅಶುದ್ದವು ಅಸಹ್ಯವು ಉಳ್ಳ ಎಲ್ಲಾ ತರ ಪಕ್ಷಿರ ಗೂಡು ಆಯಿತುಂಡ್.
3ಅವಡ ವೇಶಿತನತ್‍ರ ಬಲ್ಯ ಚೆಡಿರ ಕಳ್ಳ್‌ನ ಎಲ್ಲಾ ಜಾತಿಯಳು ಕುಡಿಚತ್;
ಬೂಮಿರ ರಾಜಂಗ ಅವಡ ಕೂಡೆ ವೇಶಿತನ ಮಾಡ್‍ಚಿ;
ಬೂಮಿರ ವ್ಯಾಪಾರಿಯಂಗ, ಅವಡ ದುಂಬ್‍ನ ಐಶ್ವರ್ಯತ್‍ರಗುಂಡ್ ಐಶ್ವರ್ಯವಂತಂಗಳಾಚೀಂದ್ ಎಣ್ಣ್‌ಚಿ.
4ಪಿಂಞ, ಇಂಞೊರ್ ವಾಣಿ ಪರಲೋಕತ್ಂಜ ಕ್‍ೕಟತ್.
ಅದ್: ನಾಡ ಜನಳೇ,
ನಿಂಗ ಅವಡ ಪಾಪಕ್ ಕೂಡತೆ, ಅವಕ್ ಬಪ್ಪ ನಾಶತ್‍ಲ್ ಚಿಕ್ಕತನೆಕೆ,
ಅವಳ ಬುಟ್ಟಿತ್ ಪೊರಮೆ ಬಾರಿ.
5ಅವಡ ಪಾಪ ಬಾನತ್‍ರಚ್ಚಕ್ ಮುಟ್ಟ್‌ಚಿ.
ಅವ ಮಾಡ್‍ನ ಅನ್ಯಾಯತ್‍ನ ದೇವ ಗೇನ ಮಾಡ್‍ಚಿ.
6ಅವ ನಿಂಗಕ್ ಮಾಡ್‍ನನೆಕೆ ಅವಕ್ ನಿಂಗ ಬದ್‍ಲ್ ಮಾಡಿ;
ಅವಡ ಕೆಲಸಕ್ ತಕ್ಕಂತದ್‍ನ ಅವಕ್ ದಂಡ್‍ರಚ್ಚಕ್ ಅಳ್‌ತೆಲ್ ನಿಂಗ ಮಾಡಂಡು;
ಅವ ನಿಂಗಕ್ ಕಲ್‍ಕಿತ್ ಕೊಡ್‍ತ ಪಾತ್ರತ್‍ಲ್,
ಅವಕ್ ದಂಡ್ ಪಾಲ್ ಜಾಸ್ತಿ ಕಲ್‍ಕಿತ್ ಕೊಡಿ.
7ಅವ ಅವಕ್ ಮಹಿಮೆ ಕೊಡ್‌ತಿತ್,
ಎಚ್ಚಕ್ ಐಶ್ವರ್ಯವಂತವಳಾಯಿತ್ ಬದ್‍ಕ್‍ಚೋ,
ಅಚ್ಚಕ್ ಬಾದೇನ, ದುಃಖತ್‍ನ ಅವಕ್ ಕೊಡಿ.
ಅವ ಅವಡ ಹೃದಯತ್‍ಲ್ ನಾನ್ ರಾಣಿಯಾಯಿತ್ ಅಳ್‌ತಿತ್ ಉಳ್ಳ,
ನಾನ್ ವಡಿಯ ಚತ್ತ ಪೊಣ್ಣಾಳ್ ಅಲ್ಲ,
ನಾಕ್ ದುಃಖ ಬಪ್ಪದೇ ಇಲ್ಲೇಂದ್ ಅವ ಗೇನ ಮಾಡ್‍ಚಿ.
8ಆಚೇಂಗಿ ಅವಕ್ ಬಪ್ಪ ಬಾದೆಯಾನ ಚಾವ್,
ದುಃಖ, ಬರಗಾಲ ಎಣ್ಣುವಂತ ಕಷ್ಟ ಒರೇ ದಿವಸತ್‍ಲ್ ಬಪ್ಪ;
ಅವ ತಿತ್ತ್‌ಲ್ ಚುಟ್ಟ್ ಪೋಪ,
ಅವಕ್ ನ್ಯಾಯತೀರ್ಪ್ ಕೊಡ್‍ಪ ಒಡೆಯನಾನ ದೇವ ಶಕ್ತಿವಂತಂವೊ.
9ಅವಡ ಕೂಡೆ ವ್ಯಬಿಚಾರ ಮಾಡಿತ್, ಅವಡ ಐಶ್ವರ್ಯತ್‍ರ ಬಲ್ಯ ಕುಶೀಲ್ ಇಂಜ ಬೂಮಿರ ರಾಜಂಗ, ಅವ ತಿತ್ತ್‌ಲ್ ಬೆಂಜಂಡ್ ಉಳ್ಳ ಪೊಗೇ‍ನ ನೋಟಿತ್ ದೂರತ್‍ಲ್ ನಿಂದಿತ್ ಅಯಿಂಗ ಗೋಳಾಡಿಯಂಡ್, 10ಅವಕ್ ಕ್‍ಟ್ಟ್‌ನ ಬಾದೆರಗುಂಡ್ ಬೊತ್ತಿತ್, ಎದೆ ಬಡ್‍ಚಂಡ್,
ಅಯ್ಯೋ! ಅಯ್ಯೋ! ಎಣ್ಣಿಯಂಡ್, ಮಹಾ ಪಟ್ಟಣವಾನ ಬಾಬೆಲೇ,
ಎಚ್ಚಕ್ ಬಲಶಾಲಿಯಾಯಿತ್ಂಜ,
ಒರೇ ಗಳಿಗೆಲ್ ನೀಕ್ ಈ ನ್ಯಾಯತೀರ್ಪ್ ಬಾತಲ್ಲಾಂದ್ ಎಣ್ಣಿಯಂಡ್ ಇಪ್ಪ.
11ಇದ್‍ಲ್ಲತೆ, ಬೂಲೋಕತ್‍ಲ್ ಉಳ್ಳ ವ್ಯಾಪಾರಿಯ ಗೋಳಾಡಿಯಂಡ್, ಪೊನ್ನ್, ಬೊಳ್ಳಿ, ರತ್ನ, ಮುತ್ತ್, ನಯಿಸಾನ ಬಟ್ಟೆ, ನೀಲಿ ಪಿಂಞ ಚೋಂದ ರಂಗ್‍ರ ಬಟ್ಟೆ, ರೇಶ್ಮೆ ಬಟ್ಟೆ, ಚೋಪಾನ ಬಟ್ಟೆ 12ಎಲ್ಲಾ ತರತ್‍ರ ವಾಸನೆ ಮರ, ಎಲ್ಲಾ ತರತ್‍ರ ಕೊಂಬ್‍ರ ಸಾಮಾನ, ಬಲ್ಯ ಬೆಲೆ ಉಳ್ಳ ಮರ, ಚೆಂಬ್, ಇರ್‍ಂಬ್, ಚಂದ್ರಕಾಂತ ಕಲ್ಲ್, 13ಏಲ, ಲವಂಗ ಪಟ್ಟೆ, ದೂಪ, ಸಾಂಬ್ರಾಣಿ, ತೈಲ, ಸುಗಂದ ವಾಸನೆರ ಸಾಂಬ್ರಾಣಿ, ದ್ರಾಕ್ಷಿರಸ, ಆಲಿವ್ ಎಣ್ಣೆ, ನಲ್ಲ ಒಂತ್‍ನ ಪೊಡಿ, ಗೋದಿ, ಅತ್ತ, ಆಡ್ ಪಿಂಞ ಕೊರಿ, ಕುದ್‌ರೆ, ರಥ, ಅಡಿಯಾಳ್‍ರ, ಮನುಷ್ಯಂಡ ಪ್ರಾಣ ಇದೆಲ್ಲಾ ಎಡ್‍ಪಯಿಂಗ ದಾರೂ ಇಲ್ಲತಗುಂಡ್ ಅವಕಾಯಿತ್ ಮೊರಟಂಡ್ ಗೋಳಾಡುವ.
14ನೀಡ ಆತ್ಮ ಕುಶಿಪಟ್ಟ ಪಣ್ಣ್ ಫಲ ನಿನ್ನ ಬುಟ್ಟಿತ್ ಪೋಚಿ; ನೀಡ ಸುಕ ಪಿಂಞ ಕೀರ್ತಿ ಎಲ್ಲಾ ನಿನ್ನ ಬುಟ್ಟಿತ್ ಪೋಚಿ; ಇಂಞು ಮಿಂಞಕ್ ಅದ್‍ನ ನೀನ್ ಕಾಂಬದೇ ಇಲ್ಲೆ. 15ಇದ್‍ನೆಲ್ಲಾ ಬೆಚ್ಚಿತ್ ಅವಡ ಕೂಡೆ ವ್ಯಾಪಾರ ಮಾಡಿತ್ ಐಶ್ವರ್ಯವಂತಂಗಳಾನಯಿಂಗ ಅವಕ್ ಕ್‍ಟ್ಟ್‌ನ ಬಾದೇನ ಕಂಡಿತ್ ಪೋಡಿಯಾನಗುಂಡ್, ದೂರತ್‍ಲ್ ನಿಂದಂಡ್:
16ಅಯ್ಯೋ! ಅಯ್ಯೋ! ನಾರ್ ಬಟ್ಟೇನ,
ನೀಲಿ ಪಿಂಞ ಚೋಂದ ರಂಗ್‍ರ ಬಟ್ಟೇನ, ಚೋಪ್‍ರ ಬಟ್ಟೇನೆ ಇಟ್ಟಿತ್,
ಪೊನ್ನ್‌ರಗುಂಡ್, ಬೊಳ್ಳಿರಗುಂಡ್, ರತ್ನತ್‍ರಗುಂಡ್, ಮುತ್ತ್‌ರಗುಂಡ್,
ಅಲಂಕಾರ ಮಾಡಿತ್ಂಜ ಮಹಾ ಪಟ್ಟಣವೇ,
17ಒರೇ ಗಳಿಗೆಲ್ ಇಚ್ಚಕ್ ಐಶ್ವರ್ಯವು ನಾಶ ಆಯಿ ಪೊಚಲ್ಲಾಂದ್ ಎಣ್ಣಿತ್ ಗೋಳಾಡುವ.
ಇದ್‍ಲ್ಲತೆ ಕಪ್ಪಲ್ ಬುಡ್‍ವಂವೊ ಎಲ್ಲಾರು, ಕಪ್ಪಲ್ ಪ್ರಯಾಣ ಮಾಡ್‌ವಯಿಂಗ ಎಲ್ಲಾರು, ಹಡಗ್‍ಲ್ ಕೆಲಸ ಮಾಡ್‌ವಯಿಂಗ ಎಲ್ಲಾರು, ಸಮುದ್ರತ್‍ಲ್ ಕೆಲಸ ಮಾಡಿತ್ ಜೀವನ ಮಾಡ್‌ವಯಿಂಗ ಎಲ್ಲಾರು ದೂರತ್‍ಲ್ ನಿಂದಿತ್: 18ಅವ ಬೇವಕ ಬಪ್ಪ ಪೊಗೇ‍ನ ಕಂಡಿತ್: ಈ ಪಟ್ಟಣಕ್ ಸಮವಾನ ಪಟ್ಟಣ ಏದ್ ಉಂಡ್‍ೕಂದ್ ಎಣ್ಣಿಯಂಡ್ ಜೋರಾಯಿತ್ ಮೊರಡ್‍ವ. 19ಅಯಿಂಗ ದುಃಖತ್‍ಲ್ ಅಯಿಂಗಡ ಮಂಡೆರ ಮೇಲೆ ಮಣ್ಣ್‌ನ ಇಟ್ಟಂಡ್,
ಅಯ್ಯೋ! ಅಯ್ಯೋ! ಮಹಾ ಪಟ್ಟಣವೇ,
ಸಮುದ್ರತ್‍ಲ್ ಕಪ್ಪಲ್ ಉಳ್ಳಯಿಂಗೆಲ್ಲ,
ಇವಡ ಬೆಲೆಯುಳ್ಳ ವಸ್ತುರಗುಂಡ್ ಐಶ್ವರ್ಯವಂತಂಗಳಾಚಲ್ಲ!
ಒರೇ ಗಳಿಗೆಲ್ ಅವ ಪಾಳಾಯಿರ್‌ತಲ್ಲಾಂದ್ ಎಣ್ಣಿಯಂಡ್ ಗೋಳಾಡಿಯಂಡ್ ಮೊರಟಂಡ್ ಇಪ್ಪ.
20ಓ ಪರಲೋಕವೇ, ಪವಿತ್ರವಾನ ಅಪೊಸ್ತಲಂಗಳೇ, ಪ್ರವಾದಿಯಳೇ,
ಇವ ನಿಂಗಕ್ ಮಾಡ್‍ನಂಗಾಯಿತ್ ದೇವ ನ್ಯಾಯತೀರ್ಪ್ ಮಾಡ್‍ನಗುಂಡ್,
ಇವಕಾಯಿತ್ ನಿಂಗ ಕುಶಿ ಪಡಿರಿ.
21ಅಕ್ಕ, ಶಕ್ತಿವಂತ ದೂತ ಒಬ್ಬ ಒರ್ ಬಲ್ಯ ಬೀಜುವ ಕಲ್ಲ್‌ರನೆಕೆ ಉಳ್ಳ ಒರ್ ಕಲ್ಲ್‌ನ ಎಡ್‍ತಿತ್ ಸಮುದ್ರತ್‍ಲ್ ಚಾಡ್‍ಚಿ:
ಇನ್ನನೆ ಬಾಬೇಲ್ ಎಣ್ಣುವ ಮಹಾ ಪಟ್ಟಣ ಬೆರಿಯ ಅಡಿಕ್ ಪೋಯಿರುವ,
ಇಂಞು ಮಿಂಞಕ್ ದಾರೂ ಕಾಂಗತನೆಕೆ ಆಪಾಂದ್ ಎಣ್ಣ್‌ಚಿ.
22ವೀಣೆಕಾರ, ಸಂಗೀತಕಾರ, ಪಾಂಗೊಳ ಊದ್‍ವಯಿಂಗ, ವಾಲಗ ಊದ್‍ವಯಿಂಗಡ ಸ್ವರ ನೀಡಯಿಂಜ ಕ್‍ೕಪುಲೆ;
ಏದ್ ತರ ವ್ಯಾಪಾರಿಯು ನೀಡ ಕೂಡೆ ಇಪ್ಪುಲೆ.
ಬೀಜುವ ಕಲ್ಲ್‌ರ ಸದ್ದ್ ಇಂಞು ಮಿಂಞಕ್ ನೀಡಲ್ಲಿ ಕ್‍ೕಪುಲೆ.
23ಬೊಳ್‍ಚತ್‍ರ ಬೊಳಿ ನೀಡ ಪಕ್ಕ ಕಾಂಬುಲೆ;
ಮಂಗಲಕಾರಂಡ ಮಂಗಲಕರ್ತಿರ ಸ್ವರ ಇಂಞು ಮಿಂಞಕ್ ನೀಡಲ್ಲಿ ಕ್‍ೕಪುಲೆ;
ನೀಡ ವ್ಯಾಪಾರಿಯ ಬೂಮಿಲ್ ಬಲ್ಯ ಮನುಷ್ಯಂಗಳಾಯಿತ್ಂಜತಲ್ಲಾ?
ನೀನ್ ಮಾಡ್‍ನ ಮಾಟತ್ಂಜ ಎಲ್ಲಾ ಜಾತಿಯಳು ಮೋಸ ಆಯಿಪೋಚಿ.
24 ಪ್ರವಾದಿಯಡ ಚೋರೆ, ದೇವಡ ಮಕ್ಕಡ ಚೋರೆ,
ಪಿಂಞ ಬೂಮಿಲ್ ಕೊಂದಯಿಂಗ ಎಲ್ಲಾಡ ಚೋರೆ ನೀಡಲ್ಲಿ ಕಂಡತ್‍ೕಂದ್ ಎಣ್ಣ್‌ಚಿ.
Currently Selected:
ಪ್ರಕಟನೆ 18: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
