ಪ್ರಕಟನೆ 1
1
1ಇಂಞು ಮಿಂಞಕ್ ಬೆರಿಯ ಆಪಕುಳ್ಳ ವಿಷಯತ್‍ನ ತಾಂಡ ಸೇವಕಂಗಕ್ ಕಾಂಬ್‌ಚಿಡುಕಾಯಿತ್ ದೇವ ಯೇಸು ಕ್ರಿಸ್ತಂಗ್ ಕೊಡ್‍ತ ಪ್ರಕಟನೆ ಇದ್. ಅಂವೊ ಅದ್‍ನ ತಾಂಡ ದೂತಂಡ ಮೂಲಕ ತಾಂಡ ಸೇವಕನಾನ ಯೋಹಾನಂಗ್ ಗೊತ್ತ್ ಮಾಡಿ ಕೊಡ್‍ತತ್. 2ಇಂವೊ ದೇವಡ ವಾಕ್ಯತ್‍ರ ವಿಷಯತ್ ಪಿಂಞ ಯೇಸು ಕ್ರಿಸ್ತಂಡ ಸಾಕ್ಷಿರ ವಿಷಯತ್ ಎಂತಲ್ಲಾ ಕಂಡತೋ ಅದ್‍ನೆಲ್ಲಾ ಅರಿಚಿಟ್ಟಿತುಂಡ್. 3ಈ ಪ್ರವಾದನೆರ ವಾಕ್ಯತ್‍ನ ಓದ್‍ವಯಿಂಗ, ಕ್‍ೕಪಯಿಂಗ ಪಿಂಞ ಇದ್‍ಲ್ ಎಣ್ಣ್‌ನನೆಕೆ ಮಾಡ್‌ವಯಿಂಗ ಎಲ್ಲಾರು ಆಶೀರ್ವಾದ ಪಡ್ಂದಯಿಂಗ, ಎನ್ನಂಗೆಣ್ಣ್‌ಚೇಂಗಿ, ಕಾಲ ಪಕ್ಕ ಬಾತ್.
ವಂದನೆ
4ಆಸ್ಯ ಪ್ರಾಂತ್ಯತ್‍ಲ್ ಉಳ್ಳ ಏಳ್ ಸಬೇಕ್ ಯೋಹಾನ ಒಳ್‍ದ್‍ವದ್ ಎಂತ ಎಣ್ಣ್‌ಚೇಂಗಿ: ಇಕ್ಕ ಇಪ್ಪಂವೊನು, ಮಿಂಞ ಇಂಜಂವೊನು, ಮಿಂಞಕ್ ಬಪ್ಪಕುಳ್ಳಂವೊನು ಆಯಿತುಳ್ಳ ಯೇಸು ಕ್ರಿಸ್ತಂಡ ಕೃಪೆ ಪಿಂಞ ಸಮಾದಾನ ನಿಂಗಕ್ ಕ್‍ಟ್ಟಡ್. ಯೇಸು ತಾಂಡ ಸಿಂಹಾಸನತ್‍ರ ಮಿಂಞತ್‌ ವಾಸ ಮಾಡಿಯಂಡುಳ್ಳ ಏಳ್ ಆತ್ಮತ್‍ರಗುಂಡ್, 5ನೇರಾನ ಸಾಕ್ಷಿ ಉಳ್ಳಂವೊನಾಯಿತು, ಚತ್ತಯಿಂಗಡ ಮದ್ಯತ್ಂಜ ಆದ್ಯವಾಯಿತ್ ಜೀವತ್‍ಲ್ ಎದ್ದಂವೊನಾಯಿತು, ಈ ಲೋಕತ್‍ರ ರಾಜಂಗಕೆಲ್ಲಾ ಅದಿಪತಿಯಾಯಿತು ಉಂಡ್. ಅಂವೊ ನಂಗಳ ಪ್ರೀತಿ ಮಾಡಿತ್, ತಾಂಡ ಸ್ವಂತ ಚೋರೆನಗುಂಡ್ ನಂಗಳ ಪಾಪತ್ಂಜ ಬುಡ್‍ಗಡೆ ಮಾಡಿತ್, 6ಅಂವೊಂಡ ದೇವನಾಯಿತುಳ್ಳ ಅಪ್ಪಂಡ ಸನ್ನಿದಾನತ್‍ಲ್ ನಂಗಳ ರಾಜಂಗಳಾಯಿತು, ಯಾಜಕಂಗಳಾಯಿತು ಮಾಡ್‍ಚಿ. ಅಂವೊಂಗ್ ಕಾಲಕಾಲಕು ಮಹಿಮೆಯು, ಶಕ್ತಿಯು ಇರಡ್. ಆಮೆನ್.
7ಇದಾ, ಅಂವೊ ಮೋಡತ್‍ರ ಕೂಡೆ ಬಂದಂಡುಂಡ್!
ಎಲ್ಲಾರು ಅಂವೊನ ಕಾಂಬ.
ಅಂವೊನ ಕುತ್ತ್‌ನಯಿಂಗ ಸಹ ಅಂವೊನ ಕಾಂಬ.
ಈ ಲೋಕತ್‍ರ ಎಲ್ಲಾ ಕುಲತ್‍ರ ಜನವು ಅಂವೊನ ಕಾಂಬಕ ಗೋಳಾಡುವ.
ಅದ್ ಅನ್ನನೆ ಆಪ, ಆಮೆನ್.
8ನಾನ್ ಅಲ್ಫಾವು ಓಮೆಗಾವು,#1.8 ಗ್ರೀಕ್ ತಕ್ಕ್‌ಲ್ ಅಲ್ಫ ಪಿಂಞ ಒಮೆಗ ಎಣ್ಣುವದ್ ಆದ್ಯ ಪಿಂಞ ಆಕೀರ್ ಒಳ್‍ತ್. ಆದ್ಯವು ಆಕೀರು, ಇಕ್ಕ ಇಪ್ಪಂವೊನು, ಮಿಂಞ ಇಂಜಂವೊನು, ಮಿಂಞಕ್ ಬಪ್ಪಕುಳ್ಳಂವೊನು ಸರ್ವ ಶಕ್ತಿವಂತಂವೊನು ಆಯಿತುಳ್ಳ ಒಡೆಯನಾನ ದೇವ ಎಣ್ಣಿಯಂಡ್ ಉಳ್ಳ.
ಕ್ರಿಸ್ತಂಡ ದರ್ಶನ
9ನಿಂಗಡ ಅಣ್ಣನು, ಯೇಸುಕಾಯಿತ್ ಬಪ್ಪ ಹಿಂಸೆಕು, ಅಂವೊಂಡ ರಾಜ್ಯಕು, ಅಂವೊಂಡ ಪೊರುಮೆಕು ನಿಂಗಡ ಕೂಡೆ ಪಾಲ್‍ದಾರನಾಯಿತುಳ್ಳ ಯೋಹಾನನಾನ ನಾನ್ ದೇವಡ ವಾಕ್ಯಕಾಯಿತು, ಯೇಸುರ ವಿಷಯತ್ ಸಾಕ್ಷಿಕಾಯಿತು ಪತ್ಮೊಸ್#1.9 ರೋಮ್ ರಾಜ್ಯತ್‍ರ ಕೈದಿಯಳ ಇಡ್‌ವ ಒರ್ ದ್ವೀಪ ಎಣ್ಣುವ ದ್ವೀಪತ್‍ಲ್ ಇಂಜ. 10ಒಡೆಯಂಡ ದಿವಸತ್‍ಲ್ ಪವಿತ್ರಾತ್ಮಂಡ ಶಕ್ತಿ ನನ್ನ ಅಂವೊಂಡ ಪುಡ್‍ತತ್‍ಲ್ ಬೆಚ್ಚತ್. ಅಕ್ಕ ನಾಡ ಬಯ್ಯ ವಾಲಗತ್‍ರ ಸದ್ದ್‌ರನೆಕೆ ಒರ್ ಜೋರಾನ ಬಲ್ಯ ವಾಣಿ ನಾಕ್ ಕ್‍ೕಟತ್.
11ಆ ವಾಣಿ: ನಾನ್ ಅಲ್ಫಾವು ಓಮೆಗಾವು ಆದ್ಯವು ಆಕೀರ್‍ವಾಯುತುಳ್ಳ. ನೀನ್ ಕಂಡಂಡುಳ್ಳದ್‍ನ ಒರ್ ಪುಸ್ತಕತ್‍ಲ್#1.11 ಚರ್ಮತ್‍ರಗುಂಡ್ ಮಾಡ್‍ನದ್ ಒಳ್‍ದಿತ್ ಆಸ್ಯ ಪ್ರಾಂತ್ಯತ್‍ಲ್ ಉಳ್ಳ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲದೆಲ್ಫಿಯ, ಲವೊದಿಕೀಯ ಎಣ್ಣುವ ಪಟ್ಟಣತ್‍ಲ್ ಉಳ್ಳ ಏಳ್ ಸಬೇಕ್ ಅಯಿಕಂಡೂಂದ್ ಎಣ್ಣ್‌ಚಿ. 12ಅಕ್ಕ ನಾಡ ಕೂಡೆ ತಕ್ಕ್ ಪರ್ಂದಂಡುಳ್ಳ ಸದ್ದ್‌ನ ಕಾಂಬಕಾಯಿತ್ ಬಯ್ಯಕ್ ತಿರಿತ್ ನೋಟಿಯೆ. ಅನ್ನನೆ ನಾನ್ ಬಯ್ಯಕ್ ತಿರಿತ್ ನೋಟ್‍ವಕ, ಪೊನ್ನ್‌ರ ಏಳ್ ಕುತ್ತ್ ಬೊಳ್‌ಚತ್‍ನ ಅಲ್ಲಿ ಕಂಡಿಯೆ. 13ಆ ಏಳ್ ಕುತ್ತ್ ಬೊಳ್‍ಚತ್‍ರ ಮದ್ಯತ್‍ಲ್ ಮನುಷ್ಯಕುಮಾರಂಡನೆಕೆ ಒಬ್ಬನ ಕಂಡಿಯೆ. ಅಂವೊ ಕಾಲ್‍ಕತ್ತನೆ ಉಳ್ಳ ಬಟ್ಟೇನ ಇಟ್ಟಿತ್, ತಾಂಡ ಎದೇಲ್ ಪೊನ್ನ್‌ರ ಪಟ್ಟಿನ ಕೆಟ್ಟಿತ್ಂಜತ್. 14ಅಂವೊಂಡ ಮಂಡೆ ಪಿಂಞ ತಲ್‍ಮಿ ಬೊಳ್‍ತ ಪರ್ತಿರನೆಕೆಯು, ಮಂಜಿರನೆಕೆಯು ಬೊಳ್‌ತಿತ್ ಇಂಜತ್; ಅಂವೊಂಡ ಕಣ್ಣ್ ಕತ್ತಿಯಂಡಿಪ್ಪ ತಿತ್ತ್‌ರ ಜ್ವಾಲತ್‌ರನೆಕೆ ಇಂಜತ್. 15ಅಂವೊಂಡ ಕಾಲ್‍ರ ಅಡಿ ಪಿಚ್ಚೋಳೆನ ತಿತ್ತ್‌ಲ್ ಇಡ್‍ವಕ ಪಳಪಳಾಂದ್ ಇಪ್ಪನೆಕೆ ಇಂಜತ್; ಅಂವೊಂಡ ಸ್ವರ ಒಕ್ಕಿಯಂಡ್ ಬಪ್ಪ ದುಂಬ ನೀರ್‌ರ ಸದ್ದ್‌ರನೆಕೆ ಇಂಜತ್. 16ತಾಂಡ ಬಲ್‌ತೆ ಕೈಯಿಲ್ ಏಳ್ ನಕ್ಷತ್ರತ್‍ನ ಪೊರ್‍ತಂಡ್ ಇಂಜತ್, ಅಂವೊಂಡ ಬಾಯಿಂಜ ದಂಡ್ ಪಕ್ಕವು ಚೂಪಾಯಿತುಳ್ಳ ಬಾಳ್ ಕತ್ತಿ ಪೊರಟಿತ್ ಬಾತ್; ಅಂವೊಂಡ ಮೂಡ್ ಮಜ್ಜಣತ್‍ರ ಸೂರ್ಯನೆಕೆ ಮಿನ್ನಿಯಂಡಿಂಜತ್. 17ನಾನ್ ಅಂವೊನ ಕಾಂಬಕ, ಚತ್ತನೆಕೆ ಅಂವೊಂಡ ಕಾಲ್‌ಕ್ ಬುದ್ದ್ ಪೋನ; ಆಚೇಂಗಿ, ಅಂವೊ ತಾಂಡ ಬಲ್‌ತೆ ಕೈಯಿನ ನಾಡ ಮೇಲೆ ಬೆಚ್ಚಿತ್, ನನ್ನ ನೋಟಿತ್: ನೀನ್ ಬೊತ್ತತೆ, ನಾನ್ ಆದ್ಯವು ಆಕೀರು, ಜೀವ ಉಳ್ಳಂವೊನು ಆಯಿತುಂಡ್. 18ನಾನ್ ಚತ್ತ್‌ಪೋನ, ಆಚೇಂಗಿಯು ಇದಾ, ನಾನ್ ಎಕ್ಕಾಲು ಬದ್‍ಕಿಯಂಡುಳ್ಳ. ಚಾವ್ ಪಿಂಞ ಪಾತಾಳತ್‍ರ ಬೀತ್‍ಕೈ ನಾಡ ಪಕ್ಕ ಉಂಡ್.
19ಇಕ್ಕ, ನೀನ್ ಕಂಡದ್‍ನ, ಇಕ್ಕ ಉಳ್ಳದ್‍ನ ಪಿಂಞ ಇಂಞು ಮಿಂಞಕ್ ಆಪಕುಳ್ಳದ್‍ನ ಒಳ್‍ದ್. 20ನಾಡ ಬಲ್‌ತೆ ಕೈಯಿಲ್ ನೀನ್ ನೋಟ್‌ನ ಏಳ್ ನಕ್ಷತ್ರತ್‍ರ ಮರ್ಮತ್‍ನ ಪಿಂಞ ಕುತ್ತ್ ಬೊಳ್‍ಚತ್‍ರ ಮರ್ಮತ್‍ನ ಒಳ್‍ದ್. ಆ ಏಳ್ ನಕ್ಷತ್ರ, ಏಳ್ ಸಬೆರ ದೂತಂಗ; ನೀನ್ ನೋಟ್‌ನ ಏಳ್ ಕುತ್ತ್ ಬೊಳ್‍ಚ ಏಳ್ ಸಬೇಂದ್ ಎಣ್ಣ್‌ಚಿ.
Currently Selected:
ಪ್ರಕಟನೆ 1: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
