ಜ್ಞಾನತ್‌ರ ಪಡಿಮ 7
7
1ನಾಡ ಮೋನೇ, ನಾಡ ತಕ್ಕ್‌ನ ಜಾಗ್‌ರತೆಲ್‌ ಕ್‍ೕಳ್. ನಾಡ ಆಜ್ಞೆನ ಬಂಡಾರತ್‌ರನೆಕೆ ಕಾಪಾಡಿಯ.
2ನಾಡ ಆಜ್ಞೆರ ಪ್ರಕಾರ ನಡ್‌ಂದಿತ್‌ ಜೀವತ್‌ನ ಪಡ್‌ಂದ. ನಾಡ ಬೋದನೆನ ನೀಡ ಕಣ್ಣ್‌ ಗುಡ್ಡೆನ ಬದ್ರತ್‌ಲ್‌ ಕಾಪಾಡುವನೆಕೆ ಕಾಪಾಡಿಯ.
3ಅದ್‌ನೆಲ್ಲಾ ನೀಡ ಬೆರಕ್‌ ಕಟ್ಟಿಯಂಡ್, ನೀಡ ಹೃದಯತ್‌ರ ಓಳ್‌ತ ಕಲ್ಲ್‌ಲ್ ಒಳ್‌ದಿ ಬೆಚ್ಚ.
4ನೊಣೆ ತಕ್ಕ್‌ ಪರಿವ ವ್ಯಬಿಚಾರಿಯಾನ ಕೈಯಿಂಜ ಕಾಪಾಡಿತ್, ಇಞ್ಞೊಬ್ಬಂಡ ಪೊಣ್ಣಾಳ್‌ರ ಕೈಯಿಂಜ ನಿನ್ನ ದೂರ ಬೆಚ್ಚಿತ್‌ ಕಾಪಾಡಿಯೊಕಾಯಿತ್,
5ಜ್ಞಾನತ್‌ನ ನೋಟಿತ್ ನೀಡ ಅಕ್ಕಾ ಎಣ್ಣಿಯುಂಡು, ವಿವೇಕತ್‌ನ ನೋಟಿತ್ ನಾಡ ಬೆಂದ್‌ಕಾಂದು ಎಣ್ಣ್.
6ಒಮ್ಮ ನಾಡ ಮನೆರ ಕಿಡ್‌ಕೆರ ಪಕ್ಕ ನಿಂದಂಡ್, ಗಾಳಿ ಕ್‌ಡ್‌ಕೆ ಮೂಲಕ ಪೊರಮೆ ನೋಟ್‌ವಕ,
7ಸಾದು ಬಾಲೆಕಾರಂಗಡ ಮದ್ಯತ್‌ ಒಬ್ಬನ ನೋಟಿತ್, ದಡ್ಡನಾನ ಒರ್‌ ಬಾಲೆಕಾರನ ಕಂಡ.
8ಅಂವೊ ಅಂದಿಮಂದಿ ನೇರತು, ಬಯಿಟ್ ಇರ್‌ಟ್ ನೇರತು,
9ಅವ ಉಳ್ಳ ಬೀದಿರ ಮೂಲೆಕ್‌ ಪೋಯಿತ್, ಅವಡ ಮನೆರ ಪಕ್ಕ ಬೈಯಿಟಟಪ್ಪಕ ನಡ್‌ಂದ್‌ ಪೋಚಿ.
10ಅದಾ, ಅಕ್ಕ ಆ ಪೊಣ್ಣಾಳ್‌ ವೇಶಿರನೆಕೆ ಬಟ್ಟೆ ಇಟ್ಟಂಡ್, ಬಟ್ಟೆಲ್‌ ಅಂವೊನ ಕಾಂಬಕ್‌ ಪೊರಮೆ ಬಾತ್.
11ಅವ ದುಂಬ ತಕ್ಕ್‌ ಪರಿಯುವವಳು, ಹಠಮಾರಿಯು ಆಯಿತ್ತಿಂಜತ್. ಅವಡ ಕಾಲ್‌ ಮನೆಲ್ ನಿಪ್ಪಯಿಂಜಿತ್‌ಲ್ಲೆ.
12ಅವ ಚೆನ್ನ ಸಮಯ ಪೊರಮೆ ನಿಂದಂಡ್ ಇಪ್ಪ, ಚೆನ್ನ ಸಮಯ ಬೀದಿಲ್‌ ನಿಂದಂಡಿಪ್ಪ, ಇಲ್ಲೇಂಗಿ ಮೂಲೆ ಮೂಲೆಲ್‌ ಪದ್‌ಂಗಿ ಕಾತಂಡಿಪ್ಪ.
13ಅವ ಆ ಬಾಲೆಕಾರನ ಪುಡ್‌ಚಿತ್‌ ಮುತ್ತ್‌ಕೊಡ್‌ತಿತ್, ಒಚ್ಚಿಕು ಞಾಣ ಇಲ್ಲತೆ ಅಂವೊನ ನೋಟಿತ್,
14ನಾನ್‌ ಸಮಾದಾನ ಬಲಿನ ಕೊಡ್‌ಕಂಡಿಂಜತ್. ಇಂದ್‌ ನಾಡ ಪರ್‌ಕೆನ ತೀತಿತ್‌ ಬಂದ.
15ಆನಗುಂಡ್, ನಾನ್‌ ನಿನ್ನ ಕಾಂಬಕಾಯಿತ್‌ ಪೊರ್‌ಟಿತ್‌ ಬಂದ, ನೀಡ ಮೂಡ್‌ನ ಕಾಂಗಂಡೂಂದ್‌ ತುಡ್‌ಚಿತ್‌ ತ್‍ೕಡ್‌ನ. ಇಕ್ಕ ನಾನ್‌ ನಿನ್ನ ಕಂಡ್‌ಪುಡ್‌ಚ.
16ನಾಡ ಮೆತ್ತೆಕ್‌ ಐಗುಪ್ತ ದೇಶತ್‌ಲ್‌ ಚಾಯಿ ರಂಗ್‌ರ, ನಯವಾನ ಪಿಂಞ ಚೋಂದ ನೂಲ್‌ಲ್‌ ಮಾಡ್‌ನ ಮೆತ್ತೆಬಟ್ಟೆನ ಇಟ್ಟಿತುಳ್ಳ.
17ನಾಡ ಮೆತ್ತೆಕ್‌ ರಕ್ತಬೋಳ, ಲೋಳಿಸರ ಪಿಂಞ ಪಟ್ಟೆಯಿಂಜ ತಯಾರ್‌ ಮಾಡ್‌ನ ಸುಗಂದ ದ್ರವ್ಯತ್‌ನ ಇಟ್ಟಿತುಳ್ಳ.
18ನಾಡ ಕೂಡೆ ಬಾ, ಪೊಲಾಕಕತನೆ ನಂಗ ಕುಶೀಲ್‌ ಇಂಜಿತ್, ಸುಕ ಪಡನ.
19ನಾಡ ವಡಿಯ ಮನೇಲ್‌ ಇಲ್ಲೆ, ಅಂವೊ ದುಂಬ ದೂರತ್‌ರ ಜಾಗಕ್‌ ಪ್ರಯಾಣ ಮಾಡಿತ್.
20ಅಂವೊ, ಪನಚೀಲನ ಎಡ್‌ತಂಡ್‌ ಪೋಯಿತುಂಡ್, ಆನಗುಂಡ್ ಗೊತ್ತ್‌ಮಾಡ್‌ನ ದಿವಸತ್‌ ಅಂವೊ ಬಪ್ಪಾಂದ್‌ ಎಣ್ಣ್‌ಚಿ.
21ಅವ ಮೊದ್ರವಾಯಿತ್‌ ದುಂಬ ತಕ್ಕ್‌ ಪರ್‌ಂದಿತ್‌ ಆ ಬಾಲೆಕಾರನ ತಾಂಡ ವಶಕ್‌ ಬಪ್ಪಕ್‌ ಮಾಡಿತ್, ತಾಂಡ ನೊಣೆ ತಕ್ಕ್‌ಯಿಂಜ ಅಂವೊನ ತಾಂಗ್‌ ಒತ್ತೊನೆಕೆ ಮಾಡ್‌ಚಿ.
22ಒಮ್ಮಕೆ ಅಂವೊ ಅವಡ ಬಯ್ಯ ಪೋಚಿ. ಒರ್‌ ಎತ್ತ್‌ ಅರ್ಪಕಾಯಿತ್‌ ಪೋಪನೆಕೆಯು, ಒರ್‌ ಮೂಡ ತಾಂಗ್‌ ಸರ್ಪಣಿ ಇಟ್ಟಿತ್‌ ದಂಡನೆಕ್‌ ಪೋಪನೆಕೆಯು,
23ಒರ್‌ ಪಕ್ಷಿ ತಾಂಡ ಜೀವ ಪೋಪಾಂದ್‌ ಗೊತ್ತಿಲ್ಲತೆ ಬಲೆಕ್‌ ಬೂವಕ್‌ ಅವಸರತ್‌ಲ್‌ ಇಂಜನೆಕೆಯು, ಅವಡ ಬಯ್ಯತ್‌ ಪೋಚಿ, ತಾಂಡ ಪ್ರಾಣ ಪೋಪದ್‌ ಅಂವೊಂಗೇ ಗೊತ್ತಿಲ್ಲತ ಇಂಜತ್#7.23 ಅಂಬ್ ಅಂವೊಂಡ ಕಲಿಜನ (ಪೂಯರ್ಚಿನ) ಕುತ್ತ್‌ಚಿ.
24ಆನಗುಂಡ್ ಮಕ್ಕಳೇ, ನಾಡ ತಕ್ಕ್‌ನ ಕ್‍ೕಳಿ, ನಾನ್‌ ಎಣ್ಣುವ ತಕ್ಕ್‌ಕ್‌ ಕೆಮಿ ಕೊಡಿ.
25ನೀಡ ಹೃದಯ ಅಂತ ಪೊಣ್ಣಾಳ್‌ರ ಬರಿಕ್‌ ಪೋಕತೆ ಇರಡ್, ಅವಡ ಬದ್‌ಕ್‌ರ ಬಟ್ಟೆಲ್‌ ತಿರ್‌ಗಾಡತೆ.
26ಅವ ಸುಮಾರ್‌ ಜನಳ ಗಾಯ ಪಡ್‌ತಿತ್, ಬುದ್ದ್ ಪೋಪಕ್‌ ಮಾಡಿತ್. ಅವ ದುಂಬ ಶಕ್ತಿವಂದ ಆಣಾಳ್‌ವಳ ಕೊಂದಿತ್.
27ಅವಡ ಮನೆಕ್‌ ಪೋಪ ಬಟ್ಟೆ ಪಾತಾಳಕ್‌ ಪೋಪ ಬಟ್ಟೆ ಆಯಿತುಂಡ್, ಅದ್‌ ಚಾವುರ ಕೋಂಬರೆಕ್‌ ಕೊಂಡ್‌ ಪೋಪ.
Currently Selected:
ಜ್ಞಾನತ್‌ರ ಪಡಿಮ 7: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
