ಜ್ಞಾನತ್‌ರ ಪಡಿಮ 4
4
1ನಾಡ ಮಕ್ಕಳೇ, ನಿಂಗಡ ಅಪ್ಪಂಡ ಬೋದನೇನ ಕ್ೕಟಿತ್, ಬುದ್ದಿ ತಕ್ಕ್‌ನ ಅರ್ಥ ಮಾಡುವಕ್‌ ಎಚ್ಚರ ಎಡ್‌ತೊಳಿ.
2ಎನ್ನಂಗೆಣ್ಣ್‌ಚೇಂಗಿ ನಾನ್‌ ನಲ್ಲ ಬೋದನೇನ ತಂದಂಡುಳ್ಳ; ನಾಡ ಉಪದೇಶತ್‌ನ ಬುಟ್ಟಿತ್‌ ಪೋಕತಿ.
3ನಾನ್‌ ಸಹ ನಾಡ ಅಪ್ಪಂಗ್‌ ಕೊದಿರ ಮೋಂವೊನಾಯಿತು, ನಾಡ ಅವ್ವಂಗ್‌ ಇಂಞು ಕೊದಿರ ಮೋಂವೊನಾಯಿತ್‌ ಇಂಜ.
4ನಾಡ ಅಪ್ಪ ನಾಕ್‍ ಬೋದನೆ ಮಾಡಿತ್:
ನಾಡ ತಕ್ಕ್‌ನ ನೀಡ ಹೃದಯತ್‌ ಬೆಚ್ಚ. ನಾಡ ಆಜ್ಞೇರನೆಕೆ ನಡೆ; ಅಕ್ಕ ನೀನ್‌ ಚಾಯಿತೆ ಬದುಕುವಿಯಾಂದ್‌ ಎಣ್ಣ್‌ಚಿ.
5ಜ್ಞಾನಿಯಾಯಿತ್‌ ಇಪ್ಪಕು, ನಾಡ ಉಪದೇಶತ್‌ನ ಅರ್ಥ ಮಾಡ್‌ವಕು ನೀನ್‌ ಪಡಿ. ನಾಡ ತಕ್ಕ್‌ನ ಮರೆಕತೆ, ನಾನ್‌ ಎಣ್ಣುವಾನ ಬುಟ್ಟಿತ್‌ ಪೋಕತೆ ಇರ್.
6ಜ್ಞಾನತ್‌ನ ಬುಟ್ಟಿತ್‌ ಬೋರೆ ಕಡೆಕ್‌ ತಿರಿತ್‌ ಪೋಕತೆ. ಅದ್‌ ನಿನ್ನ ಕಾಪಾಡುವ. ಅದ್‌ನ ಪ್ರೀತಿ ಮಾಡ್. ಅದ್‌ ನಿನ್ನ ಕಾಪ.
7ಜ್ಞಾನವೇ ಎಲ್ಲಾಕಿಂಜ ಮುಕ್ಯವಾನದ್, ಆನಗುಂಡ್‌ ಜ್ಞಾನತ್‌ನ ಸಂಪಾದನೆ ಮಾಡ್; ಎಂತ ಸಂಪಾದನೆ ಮಾಡುಚೇಂಗಿಯು ಬುದ್ದಿನ ಸಂಪಾದನೆ ಮಾಡತೆ ಬುಡತೆ.
8ನೀನ್‌ ಜ್ಞಾನತ್‌ನ ಗನಪಡ್‌ತ್, ಅಕ್ಕ ಅದ್‌ ನಿನ್ನ ಬಲ್ಯ ಸ್ತಾನಕ್‌ ಕೊಂಡ ಪೋಪ; ಅದ್‌ನ ಗಟ್ಟಿಯಾಯಿತ್‌ ಪುಡ್‌ಚತ್ತೇಂಗಿ, ಅದ್‌ ನಿನ್ನ ಗನಪಡ್‌ತುವ.
9ಜ್ಞಾನ ನೀಡ ಮಂಡೆಕ್‌ ಚಿಂಗಾರಮಯವಾನ ಪೂಮಾಲೆನ ಇಡ್‌ವ; ಅದ್‌ ನೀಕ್‌ ಕೀರ್ತಿರ ಕಿರೀಟತ್‌ನ ತಪ್ಪ.
10ನಾಡ ಮೋನೇ, ನಾನ್‌ ಎಣ್ಣ್‌ವ ತಕ್ಕ್‌ನ ಕ್ೕಟಿತ್ ಅದ್‌ನ ಸ್ವೀಕಾರ ಮಾಡ್; ಅಕ್ಕ ನೀನ್‌ ದುಂಬ ಕಾಲ ಬದ್‌ಕ್‌ವಿಯ.
11ನಾನ್‌ ನೀಕ್‌ ಜ್ಞಾನತ್‌ರ ಬಟ್ಟೆನ ಎಣ್ಣಿ ತಂದಿತುಳ್ಳ; ನಾನ್‌ ನೇರಾನ ಬಟ್ಟೆಲ್‌ ನಿನ್ನ ನಡ್‌ತಿತುಳ್ಳ.
12ನೀನ್‌ ಅದ್‌ ಕಾಟುವ ಬಟ್ಟೆಲ್‌ ನಡ್‌ಪಕ ಏದೂ ನಿನ್ನ ತಡ್‌ಪುಲೆ; ನೀನ್‌ ಅದ್‌ಲ್‌ ಓಡುವಕ ನೀನ್‌ ಅಡಿಕ್‌ ಬೂವುಲೆ.
13ಬೋದನೇನ ಗಟ್ಟಿಯಾಯಿತ್‌ ಪುಡ್‌ಚ, ಅದ್‌ನ ಬುಟ್ಟಿತ್‌ ಪೋಕತೆ; ಅದ್‌ನ ಬದ್ರತ್‌ಲ್‌ ಕಾಪಾಡ್, ಅದೇ ನೀಡ ಜೀವ.
14ದುಷ್ಟಂಗ ಬದ್‌ಕ್‌ವನೆಕೆ ಬದ್‌ಕತೆ. ಕ್‍ೕಡ ಮಾಡುವಯಿಂಗಡ ಬಟ್ಟೆಲ್‌ ಪೋಕತೆ.
15ಅಯಿಂಗಡ ಬಟ್ಟೆನ ಬುಟ್ಟಿತ್‌ ಕಡೆಗಟ್ಟಿತ್‌ ಪೋ; ಅದ್‌ನ ದಾಟಿತ್‌ ಮಿಂಞಕ್‌ ಪೋ.
16ಎನ್ನಂಗೆಣ್ಣ್‌ಚೇಂಗಿ, ಕ್‍ೕಡ್‌ ಮಾಡ್‌ವಯಿಂಗಕ್‌ ಕ್‍ೕಡ್‌ ಮಾಡತೆ ವರ್‌ಕ್‌ ಬಪ್ಪುಲೆ; ದಾರ್‌ನಾಚೇಂಗಿ ಬೂವಕ್‌ ಮಾಡ್‌ವಕತ್ತನೆ ಅಯಿಂಗಕ್‌ ಆರಾಮ್‌ಲ್‌ ವರ್ವಕ್‌ ಕಯ್ಯುಲೆ.
17ದುಷ್ಟತನವೇ ಅಯಿಂಗಡ ಆಹಾರ, ಕ್ರೂರತನವೇ ಅಯಿಂಗಡ ಪಾನ.
18ನೀತಿವಂತಂಯಿಂಗಡ ಬಟ್ಟೆ ಪೊಲಾಕತ್‌ರ ಬೊಳೀರನೆಕೆ ಇಪ್ಪ, ಅದ್‌ ಎನ್ನನೆ ಎಣ್ಣ್‌ಚೇಂಗಿ ಮಜ್ಜಣತ್‌ರ ಬೊಳಿ ಪ್ರಕಾಶ ಆಯಂಡೇ ಇಪ್ಪನೆಕೆ ಜಾಸ್ತಿ ಆಯಿತ್‌ ಇಪ್ಪ.
19ಆಚೇಂಗಿ ದುಷ್ಟಂಗಡ ಬದ್‌ಕ್‌ ಪೂರ್ತಿ ಇರ್‌ಟಾಯಿತ್‌ಪ್ಪ; ಅಯಿಂಗಳ ತಡ್‌ತಿತ್‌ ಬೂವನೆಕೆ ಮಾಡ್‌ವದ್‌ ಎಂತದ್‍ೕಂದ್‌ ಅಯಿಂಗಕ್‌ ಗೊತ್ತಾಪುಲೆ.
20ನಾಡ ಮೋನೇ, ನಾನ್‌ ಎಣ್ಣುವಾನ ಎಚ್ಚರ ಎಡ್‌ತಿತ್‌ ಕೇಳ್; ನಾಡ ತಕ್ಕ್‌ಕ್‌ ಕೆಮಿ ಕೊಡ್.
21ನೀಡ ದೃಷ್ಟಿ ಎಕ್ಕಾಲು ಅದ್‌ಂಡ ಮೇಲೆ ಇರಡ್; ಅದ್‌ನ ನೀಡ ಹೃದಯತ್‌ರ ಆಳತ್‌ ಪತ್‌ರವಾಯಿತ್‌ ಬೆಚ್ಚ.
22ಅದ್‌ನ ಕಂಡ್‌ ಪುಡಿಪಯಿಂಗಕ್‌ ಅದ್‌ ಜೀವವಾಯಿತ್‌ ಇಪ್ಪ; ಅಯಿಂಗಡ ಪೂರ್ತಿ ತಡಿಕ್‌ ಆರೋಗ್ಯತ್‌ನ ತಪ್ಪ.
23ನೀಡ ಹೃದಯತ್‌ನ ಜಾಗೃತೆಲ್‌ ಚಾಯಿತೆ ಬೆಚ್ಚ; ಎನ್ನಂಗೆಣ್ಣ್‌ಚೇಂಗಿ ಅದ್‌ಂಜಲೇ ಜೀವತ್‌ರ ಎಲ್ಲಾ ವಿಜಯವು ಜಲನೀರ್‌ರನೆಕೆ ಬಪ್ಪ.
24ಕಪಟ ತಕ್ಕ್‌ನ ನಿನ್ನಿಂಜ ನೀಕಿರ್; ಬಟ್ಟೆತಪ್ಪುವ ತಕ್ಕ್‌ ಪರಿಯುವದ್‌ನ ನಿನ್ನಿಂಜ ದೂರಮಾಡ್.
25ನೀಡ ದೃಷ್ಟಿ ಎಕ್ಕಾಲು ನೇರೆ ಇರಡ್. ನೀಡ ಕಣ್ಣ್‌ ನೀಡ ಮಿಂಞಕ್‌ ಉಳ್ಳದ್‌ನ ನೋಟಿಯಂಡ್‌ ಇರಡ್.
26ನೀನ್‌ ನಡ್‌ಪ ಬಟ್ಟೆಲ್‌ ಎಚ್ಚರ ಎಡ್‌ತ. ಅಕ್ಕ ನೀಡ ಬದ್‌ಕ್‌ ದೃಡವಾಯಿತ್ತಿಪ್ಪ.
27ಬಲ್‌ತ ಬರಿಯಾಡ್‌ ಎಡ್‌ತ ಬರಿಯಾಡ್‌ ತಿರರ್‌ಗತೆ, ಕ್‍ೕಡಾನ ಬಟ್ಟೆಯಿಂಜ ನೀಡ ಕಾಲ್‌ನ ಕಾಪಾಡಿಯ.
Currently Selected:
ಜ್ಞಾನತ್‌ರ ಪಡಿಮ 4: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
